‏6 ایہہ اُوہو ہے جیہڑا پانڑی تے خون دے وسیلہ نال آیا^a ہئی یعنی یسوع مسیح۔ اوہ نہ فقط پانڑی دے وسیلہ نال بلکہ پانڑی تے خون ڈوہائیں دے وسیلہ نال آیا ہئی تے رُوح القُدس اُوندی گواہی ڈیندے کیوں جو رُوح ای بَرحق ہے۔ ‏7 تے گواہی ڈیوݨ آلے تَرے ہِن ‏8 یعنی رُوح، پانڑی تے خُون، تے ایہہ تَریحے ہِکو گالھ اُتے مُتفق ہِن۔ ‏9 جِیں وَیلے اَساں اِنساناں دی گواہی قبول کر گِھندے ہئیں تاں خُدا دی گواہی کتنی وَدھ ہے تے ایہہ اُوہو گواہی ہے جیہڑی اُونیں آپنڑے پوتر دے حق ءچ ڈِتی۔ ‏10 جیہڑا خُدا دے پوتر اُتے اِیمان رکھیندے، اوہ آپنڑے آپ ءچ اِیہو گواہی رکھیندے۔ جئیں خُدا اُتے یقین نئیں رکھیا، اُونیں خُدا کُوں کُوڑا آکھیا کیوں جو اوہ اُوں گواہی اُتے اِیمان نئیں رکھیندا جیہڑی خُدا نیں آپنڑے پوتر دے حق ءچ ڈِتی ہے۔ ‏11 تے اوہ گواہی ایہہ ہے جو خُدا نیں ساکُوں ہمیشاں دی زِندگی عطا فرمائی تے ایہہ زِندگی اُوندے پوتر ءچ ہے۔ ‏12 جِیندے کولھ پوتر ہے، اُوندے کولھ زندگی ہے، پَر جِیندے کولھ خُدا دا پوتر نئیں، اُوندے کولھ زندگی وی نئیں۔

‏13 میں تُہاکُوں جیہڑے خُدا دے پوتر دے ناں اُتے اِیمان گِھن آئے ہِیوے، ایہہ گالھیں اِیں واسطے لکھیاں ہِن جو تُہاکُوں معلوم تھیوے جو تُہاڈے کولھ ہمیشاں دی زندگی ہے۔ ‏14 ساکُوں خُدا اُتے ایہہ اعتماد ہے جو اَساں جیہڑا کُجھ اُوندی مرضی دے مطابق منگدے ہئیں، اوہ ساڈی سُنڑدے۔ ‏15 جِیں وَیلے ساکُوں معلوم ہے جو جیہڑا کُجھ اَساں اُوں کنُوں منگدے ہئیں، اوہ ساڈی سُنڑدے تاں ایہہ وی جانڑدے ہئیں جو جیہڑا کُجھ منگیا ہے، اوہ مِل وی گِیاہے۔

‏16 جے کوئی آپنڑے بِھرا کُوں ایجھا گُناہ کریندے ڈیکھے جِیندا انجام مَوت نئیں تاں دُعا کرے تاں خُدا اُونکُوں زندگی بخشیسی۔ پَر فقط اُنہائیں کُوں جِنہاں نیں ایجھا گُناہ نئیں کیتا، جِیندا اَنجام موت ہووے۔ گُناہ ایجھا وی ہوندے جیہڑا مَوت گِھن آندے۔ میں اُوندے کیتے دُعا کرݨ دی حمایت نئیں کریندا۔ ‏17 اُونویں تاں ہر قِسم دی بُرائی گُناہ ہے پَر ایجھا گُناہ وی ہے جِیندا اَنجام مَوت نئیں۔

‏18 اَساں جانڑدے ہئیں جو جیہڑا کوئی خُدا دا فرزند بنڑ گِیا ہے، اوہ گُناہ نئیں کریندا کیوں جو خُدا دا پوتر اُوندی حفاظت کریندا ہے تے اِبلیس^b اُونکُوں نقصان نئیں پُچا سگدا۔

‏19 اَساں جانڑدے ہئیں جو اَساں خُدا کنُوں ہئیں، بھانویں ساری دُنیا اِبلیس دے قبضہ ءچ ہے۔

‏20 تے اَساں ایہہ وی جانڑدے ہئیں جو خُدا دا پوتر آ گِیا ہے تے اُونیں ساکُوں سمجھ بخشی ہے تاں جو بَر حق خُدا کوں جانڑوں۔ تے اَساں اُوندے ءچ ہئیں جیہڑا بَر حق ہے یعنی اُوندے پوتر یسوع مسیح ءچ۔ حقیقی خُدا تے ہمیشاں دی زندگی اِیہو ہے۔

‏21 اے بالو! آپنڑے آپ کُوں بُتاں کنُوں بچائی رکھو۔