‏4 اے بالو! تُساں خُدا کنُوں ہِیوے تے اُنہاں^a اُتے غالب آ گئے ہِیوے، کیوں جو جیہڑا تُہاڈے ءچ ہے، اوہ اُوں کنُوں جیہڑا دُنیا ءچ ہے بہُوں وَڈا ہے۔ ‏5 اوہ دُنیا کنُوں ہِن، اِیں واسطے دُنیا دے گالھیں کریندے ہِن تے دُنیا آلے اُنہاں دی سُنڑدے ہِن۔ ‏6 پَر اَساں خُدا کنُوں ہئیں تے جیہڑا کوئی خُدا کُوں جانڑدے اوہ ساڈی سُنڑدے۔ پَر جیہڑا خُدا کنُوں نئیں اوہ ساڈی نئیں سُنڑدا۔اِینویں اَساں سچائی دی رُوح تے گُمراہی دی رُوح ءچ فرق کر گِھندے ہئیں۔

‏7 اے عزیزو! آؤ اَساں ہِک ڈوجھے نال محبت رکھوں کیوں جو محبت خُدا دی طرفوں ہے تے جیہڑا کوئی محبت رکھیندے اوہ خُدا دا فرزند ہے تے خُدا کُوں جانڑدے۔ ‏8 پَر جیہڑا محبت نئیں رکھیندا اوہ خُدا کُوں نئیں جانڑدا کیوں جو خُدا محبت ہے۔ ‏9 جیہڑی محبت خُدا ساڈے نال رکھیندے، اُونکُوں اُونیں اِینویں ظاہر کیتا جو اُونیں آپنڑے کلھے پوتر کُوں دُنیا ءچ بھیج ڈِتا تاں جو ساکُوں اُوندے وسیلےغیر فانی زندگی مِلے۔ ‏10 محبت ایہہ نئیں جو اَساں خُدا دے نال محبت کیتی بلکہ ایہہ ہے جو اُونیں ساڈے نال محبت کیتی تے آپنڑے پوتر کُوں بھیجیا تاں جو اوہ ساڈے گُناہاں دا کفارہ بنڑے۔

‏11 اے عزیزو! جِیں وَیلے خُدا نیں ساڈے نال ایجھی محبت کیتی تاں ساکُوں وی چاہیدے جو ہِک ڈوجھے نال محبت رکھوں۔ ‏12 خُدا کُوں کہیں نیں کڈھائیں نئیں ڈِٹھا پَر جے اَساں ہِک ڈوجھے نال محبت رکھیندے ہئیں تاں خُدا ساڈے ءچ رَہندے تے اُوندی محبت ساڈے ءچ کامل تھی وَیندی ہے۔

‏13 کیوں جو اُونیں آپنڑا رُوح القُدس ساکُوں عطا فرمائے اِیں واسطے اَساں جانڑدے ہئیں جو خُدا ساڈے ءچ رَہندے تے اَساں اُوندے ءچ۔ ‏14 اَساں ڈیکھ گِھدے تے ہُنڑ گواہی ڈیندے ہئیں جو باپ نیں آپنڑے پوتر کُوں دُنیا دا نجات ڈیوݨ آلا بنڑا تے بھیج ڈِتے۔ ‏15 جیہڑا کوئی اِقرار کریندے جو یسوع خُدا دا پوتر ہے، خُدااُوندے ءچ رَہندے تے اوہ خُدا ءچ۔ ‏16 جیہڑی محبت خُدا کُوں ساڈے نال ہے، اَساں اُونکُوں جاݨ گئے ہئیں تے ساکُوں اُوندا یقین ہے۔

خُدا محبت ہے تے جیہڑا محبت ءچ قائم رَہندے، اوہ خُدا ءچ قائم رَہندے تے خُدا اُوندے ءچ۔ ‏17 بس محبت ساڈے ءچ کامل تھی گئی ہے تاں جو اَساں عدالت دے ڈینہہ دلیری نال خُدا دا سامنڑا کر سگوں کیوں جو جِیویں مسیح ہے، اُونویں ای اساں وی اِیں دُنیا ءچ ہئیں۔ ‏18 محبت ءچ خوف نئیں ہوندا بلکہ کامل محبت خوف کُوں دور کر ڈیندی ہے کیوں جو خوف دا تعلق سزا نال ہوندے تے جیہڑا ڈردے، اُوندے ءچ محبت کامل نئیں تھیندی۔

‏19 اَساں اِیں واسطے محبت رکھیندے ہئیں جو پہلے خُدا نیں ساڈے نال محبت رکھی۔ ‏20 جے کوئی آکھے جو اوہ خُدا نال محبت رکھیندے پَر آپنڑے بِھرا نال دُشمنڑی رکھیندے تاں اوہ کُوڑا ہے ۔جیہڑا آپنڑے بِھرا نال جِینکُوں اُونیں ڈِٹھے، محبت نئیں رکھیندا تاں اوہ خُدا نال کِیویں محبت کر سگدے جِینکُوں اُونیں نئیں ڈِٹھا؟ ‏21 ساکُوں تاں اُوندی طرفوں ایہہ حُکم مِلیا ہے جو جیہڑا کوئی خُدا نال محبت رکھیندے، اوہ آپنڑے بِھرا نال وی محبت رکھے۔