‏5 فرشتہ نیں عورتاں کُوں آکھیا، نہ ڈرو ۔ میں جانڑدا ہا ں جو تُساں یسُوع کُوں گولھیندیاں پئیاں ہِوے جیہڑا مصلُوب تھیّا ہا ۔ ‏6 اوہ اِتھاں نئیں کیوں جو جیویں اُونیں آکھیا ہا، زندہ تھی گئے ۔ آؤ ڈیکھو، اوہ جاہ جِتھاں خُداوند پِیا ہا ۔ ‏7 تے جلدی وَنج تے اُوندے شاگرداں کُوں آکھو جو اوہ مُردیاں ءچوں زندہ تھی گئے تے ڈیکھو اوہ تُہاڈے کنُوں پہلے گلیل کُوں ویندے، تُساں اُونکُوں اُتھاں ڈیکھسو ۔ ڈیکھو میں تُہاکُوں ڈسا ڈتے ۔

‏8 اوہ ڈر تے وَڈی خُوشی نال قبر کنُوں فوراً باہر آئیاں تے دَرکدیاں دَرکدیاں گئیاں تاں جو شاگرداں کُوں خبر پُچاوݨ ۔

‏9 تے ڈیکھو یسُوع اُنہاں کُوں مِلیا تے آکھیا سلام! اُنہاں کولھ آتے اُوندے پیر پکڑ گھِدے تے اُونکُوں سِجدہ کیتا ۔ ‏10 وَل یسُوع اُنہاں کُوں آکھیا، نہ ڈرو ۔ وَنجو میڈے بِھراواں کُوں آکھو جو گلیل کُوں چلے ونجنڑ ۔ اُتھاں میکُوں ڈیکھ سن ۔

‏11 جِیں وَیلے اوہ وَیندیاں پئیاں ہَن تاں ڈیکھو ، پہرے داراں ءچوں کُجھ شہر گئے تے سردار کاہِناں کُوں سارا واقعہ سُنڑایا ۔ ‏12 اُنہاں بزرگاں نال صلاح کیتی تے سپاہیاں کُوں ہِک وَڈی رقم ڈِے تے آکھیا ‏13 تُساں ایہہ اَکھائے جو رات دے وَیلے اَساں سُتے پئے ہاسے تے اُوندے شاگرد آ تے اُونکُوں چوری گھِن گئے ۔ ‏14 تے جے ایہہ گالھ حاکم دے کَن تَئیں پُجی تاں اَساں اُونکُوں سمجھا تے تُہاکُوں خطرے تُوں بچا گھِنسوں ۔

‏15 بس سپاہیاں رقم گھِن گھِدی تے جیویں اُنہاں کُوں سِکھایا گِیا ہا اُونویں ای کیتا ۔ ایہہ گالھ اَج تَئیں یہُودیاں ءچ مشہور ہے ۔

‏16 وَل یارھاں شاگرد گلیل گئے تے اُوں پہاڑ اُتے جمع تھئے جیہڑا یسُوع نیں اُنہاں کیتے مقرّر کیتا ہا ۔ ‏17 اُنہاں اُونکُوں ڈِٹھا تاں اُونکُوں سِجدہ کیتا پَر کُجھ نیں شک کیتا ۔

‏18 یسُوع اُنہاں دے کولھ آتے اُنہاں کُوں آکھنڑ لگا، اَسمان تے زمین دا کُل اِختیار میکُوں ڈِتا گِیا ہے ۔ ‏19 اِیں واسطے تُساں وَنجو تے ساری قوماں کُوں شاگرد بنڑاؤ تے اُنہاں کُوں باپ تے بیٹے تے رُوح القُدس دے ناں ءچ بپتسمہ ڈیؤ ۔ ‏20 تے اُنہاں کُوں ایہہ تعلیم ڈیؤ جو اُنہاں سبھ گالھیں اُتے عمل کرݨ جِیندا میں تُہاکُوں حُکم ڈِتے تے ڈیکھو میں دُنیا دے آخر تَئیں ہمیشاں تُہاڈے نال ہاں ۔