‏3 جِیں وَیلے اُوندے پکڑواوݨ آلے یہُوداہ ایہہ ڈِٹھا جو اوہ مُجرم کھڑایا گِیا ہے تاں پچھتایا تے چاندی دے اوہ تَریح سِکے سردار کاہِناں تے بزرگاں دے کولھ واپس گِھن تے آکھنڑ لگا ‏4 میں گُناہ کیتے جو ہِک بے قصور کُوں قتل کیتے پکڑوایا ۔

اوہ آکھنڑ لگے ساکُوں کیا ؟ تُوں جاݨ ۔

‏5 تے اوہ پیسیاں کُوں مَقدِس ءچ سَٹ تے چلیا گِیا تے پھانسی گِھن گِھدی ۔

‏6 سردار کاہِناں پیسے چا گھِدے تے آکھنڑ لگے ایہہ رقم تاں خون دی قیمت ہے اِنہاں کُوں ہیکل دے خزانے ءچ ڈیوݨ جائز نئیں ۔ ‏7 وَل صلاح مشورے دے بعد اُنہاں اُوں رقم نال کمہار دا کھیت مُل گھِدا تاں جو اُتھاں پردیسیاں کیتے قبرستان بنڑایا وَنجے ۔ ‏8 اِیہو وجہ ہے جو اوہ کھیت اَج تَئیں خون دا کھیت اکھویندا ہے ۔

‏9 اُوں وَیلے اوہ گالھ پُوری تھی گئی جیہڑی یرمیاہ نبی دی معرفت آکھی گئی ہَئی جو

‏11 یسُوع حاکم دے سامنڑے کھڑا ہا، تے حاکم اُونکُوں پُچھنڑ لگا کیا تُوں یہُودیاں دا بادشاہ ہیں ؟

یسُوع جواب ڈِتّا ایہہ تُوں آپ آہدھیں ۔ ‏12 جِیں وَیلے سردار کاہِن تے بزرگ اُوندے اُتے الزام لیندے پئے ہَن تاں اُونیں کُجھ جواب نہ ڈِتّا۔

‏13 اِیں پاروں پِیلاطُس اُونکُوں آکھیا ڈیکھ ایہہ تیڈے خِلاف کیا کیا آہدھے پئے ہِن، کیا تُوں سُنڑدا نئیں پیا ؟

‏14 اُونیں جواب ءچ ہِک لفظ وی نہ آکھیا، ایہہ تئیں جو حاکم بہُوں حیران تِھیّا ۔

‏15 تے حاکم دا قانون ہا جو اوہ عید اُتے ہِک قیدی کُوں جِینکُوں لوک آہدھے ہِن چھوڑ ڈیندا ہا ۔ ‏16 اُوں وَیلے برابّا ناں دا ہِک مشہور قیدی ہا ۔ ‏17 جِیں وَیلے اوہ لوک کٹھے تھئے تاں پِیلاطُس اُنہاں کنُوں پُچھیا تُساں کیں کُوں چاہندے ہِوے جو میں تُہاڈی خاطر چھوڑ ڈیواں ؟ برابّا کُوں یا یسُوع کُوں جیہڑا المسیح اَکھویندے؟ ‏18 کیوں جو اُونکُوں پتا ہا جو اُنہاں اُونکُوں حسد دی وجہ کنُوں پکڑوائے ۔

‏19 تے جیہڑے وَیلے پِیلاطُس تختِ عدالت اُتے بیٹھا ہا تاں اُوندی ذال اُونکُوں ایہہ پیغام بھیجیا جواِیں نیک آدمی دے خِلاف کُجھ نہ کر کیوں جو میں اَج خواب ءچ اِیندی وجہ کنُوں بہُوں ڈُکھ چاتے ۔

‏20 پَر سردار کاہِناں تے بزرگاں، لوکاں کُوں اُکسایا جو برابّا کُوں مَنگ گِھننڑ تے یسُوع کُوں مروا چھوڑن ۔ ‏21 حاکم اُنہاں کنُوں پُچھیا جو تُساں اِنہاں ڈوہاں ءچوں کَیں کُوں چاہندے ہِوے جو میں تُہاڈے کیتے چھوڑ ڈیواں ؟ اُنہاں آکھیا برابّا کُوں ۔

‏22 پِیلاطُس اُنہاں کُوں آکھیا وَلا میں یسُوع کُوں جیہڑا المسیح اَکھویندے، کیا کراں؟

سبھ آکھنڑ لگے جو اوہ مصلُوب تھیوے ۔

‏23 اُونیں آکھیا کیوں، اُونیں کیہڑی بُرائی کیتی ہے؟

پَر اوہ بِیا وی چِلا چِلا تے آکھنڑلگے جو اوہ مصلُوب تھیوے ۔

‏24 جِیں وَیلے پِیلاطُس ڈِٹھا جو کُجھ نئیں بنڑدا بلکہ اُلٹا ہنگامہ تھیوݨ لگ پئے تاں اُوں پانڑی گِھن تے لوکاں دے سامنڑے آپنڑے ہَتھ دھوتے تے آکھیا میں اِیں راستباز دے خون کنُوں بَری ہاں ۔ تُساں جانڑو ۔

‏25 تے سارے لوکاں جواب ڈِتّا اِیندا خون ساڈے اُتے تے ساڈی نسل دی گردن اُتے!

‏26 اِیں تے پِیلاطُس اُنہاں کیتے برابّا کُوں بَری کر ڈِتا تے یسُوع کُوں کوڑے مروا تے اُنہاں دے سپُرد کیتا جو مصلُوب تھیوے ۔

‏27 وَل حاکم دے سپاہی یسُوع کُوں قِلعہ دے اندر گِھن گئے تے فوجی دستے دے سپاہیاں اُونکُوں چارے پاسوں گھیر گھِدا ۔ ‏28 تے اُوں دے کپڑے لَہا تے اُونکُوں قرمزی چوغہ پَوا یا ۔ ‏29 تے کَنڈیاں دا تاج بنڑا تے اُوندے سِر اُتے رکھیا تے اُوندے سجے ہَتھ ءچ ہِک سرکنڈا پکڑوا ڈِتا تے اُوندے سامنڑے گوڈے ٹیک تے اُوندا مذاق بنڑاوݨ لگ پئے جو اے یہُودیاں دے بادشاہ آداب! ‏30 تے اُوندے اُتے تُھکیا تے اُوہو سرکنڈا گھِن تے اُوندے سِر اُتے مارݨ لگے ۔ ‏31 جیہڑے وَیلے اُوندا ٹھٹھا کر گھِدا تاں چوغہ لَہا تے وَل اُوندے آپنڑے کپڑے اُونکُوں پوائے تے اُونکُوں مصلُوب کرݨ کیتے گھِن گئے ۔

‏32 جِیں وَیلے باہر آئے تاں اُنہاں کُوں ہِک کُرینی آدمی مِلیا جِیندا ناں شمعون ہا، اُنہاں بیگار ءچ اُونکُوں پکڑیا جو اوہ اُوندی صلیب چاوے ۔ ‏33 تے گُلگتا ناں دی جاہ اُتے پُجے، جیہڑی کھوپڑی دی جاہ اَکھویندی ہے ۔ ‏34 اُتھاں اُنہاں یسُوع کُوں پِت رَلی ہوئی مَے پیہوݨ کیتے ڈِتی پَر اُونیں چکھ تے اُونکُوں پیہوݨ کنُوں اِنکار کر ڈِتّا۔

‏35 اُنہاں اُوں کُوں مصلُوب کیتا تے قرعہ سَٹ تے اُوندے کپڑے آپس ءچ ونڈ گھِدے ۔ ‏36 تے اُتھاں بہہ تے اُوندی نگرانی کرݨ لگے ۔ ‏37 تے اُوں دا اِلزام لکھ تے اُوندے سِر اُتے لا ڈِتا جو ایہہ یہُودیاں دا بادشاہ یسُوع ہے ۔ ‏38 اُوں وَیلے اُوں دے نال ڈو ڈاکو وی مصلُوب تھئے، ہِک سجے تے ہِک کھبے پاسوں۔

‏39 اُتھوں کنُوں لنگھنڑ آلے سارے لوک سِر ہِلا ہلا تے اُونکُوں لعن طعن کریندے تے اَکھیندے ہَن ‏40 اے مَقدِس کُوں سَٹ تے تَرے ڈینہہ ءچ بنڑاوݨ آلے، آپنڑے آپ کُوں بچا۔ جے تُوں خُدا دا پوتر ہیں تاں صلیب تُوں لہہ آ۔

‏41 اِیں طرحاں سردار کاہِن وی فقیہاں تے بزرگاں نال مِل تے اُوندا ٹھٹھا کریندے ہوئے آہدھے ہَن ‏42 اِیں بئیاں کُوں بچائے پَر آپنڑے آپ کُوں نہ بچا سگیا ۔ ایہہ تاں اِسرائیل دا بادشاہ ہے ہُنڑ وی صلیب کنُوں لہہ آوے تاں اَساں اُوندے اُتے اِیمان گھِن آؤں ۔ ‏43 اِیندا بھروسہ خُدا اُتے ہے، جے اوہ اِینکُوں چاہندے تاں ہُنڑ وی اِینکُوں بچا گھِنے، کیوں جو اِینیں آکھیا ہا جو میں خُدا دا پوتر ہاں ۔

‏44 اِیویں ای ڈاکو وی جیہڑے اُوندے نال مصلُوب تھئے ہَن، اُونکُوں لعن طعن کریندے ہَن ۔

‏45 تے ڈوپہر کنُوں گھِن تے تَریجھے پہر تَئیں سارے مُلک ءچ اندھارا چھایا ریہا ۔ ‏46 تَریجھے پہر دے نیڑے یسُوع وَڈی اُچی آواز ءچ چِلا تے آکھیا ایلی، ایلی، لَما شَبقتَنِی؟ جِیندا مطلب ہے، اےمیڈے خُدا! اے میڈے خُدا ! تُوں میکُوں کیوں چھوڑ ڈِتّا؟

‏47 جیہڑے لوک اُتھاں کھڑے ہَن اُنہاں ءچوں کُجھ نیں ایہہ سُنڑ تے آکھیا جو ایہہ تاں ایلیّاہ کُوں سڈیندے ۔ ‏48 تے اُنہاں ءچوں ہِک آدمی فوراً بھج تے سپنج کُوں سرکہ ءچ پُسا تے گھِن آیا تے اُونکُوں ہِک سرکنڈے اُتے رکھ تے اُونکُوں چُسایا ۔

‏49 پَر کُجھ لوکاں آکھیا کھڑو۔ ڈیکُھوں جو ایلیّاہ اُونکُوں بچاوݨ کیتے آندے یا نئیں ۔

‏50 وَل یسُوع وَڈے زور نال آواز کَڈھ تے جان ڈے ڈِتی ۔

‏51 تے مَقدِس دا پردہ اُتوں کنُوں تَلے تَئیں پھٹ تے ڈو ٹکڑے تھی گِیا تے زمین کَمب گئی تے چٹاناں تِڑک گئیاں ۔ ‏52 تے قبراں کھُل گئیاں تے بہُوں سارے مُقدّس لوک جیہڑے سُتے پئے ہَن، زندہ تھی گئے ۔ ‏53 یسُوع دے زندہ تھیوݨ دے بعد اوہ قبراں ءچوں نِکل تے مُقدّس شہر ءچ گئے تے بہُوں سارے لوکاں کُوں ڈِکھالی ڈِتے ۔

‏54 وَل صوبیدار تے اُوندے ساتھی جیہڑے یسُوع دی نگرانی کریندے پئے ہَن، زلزلہ تے سارا واقعہ ڈیکھ تے بہُوں ای ڈر تے آکھنڑ لگےجو بے شک ایہہ خُدا دا پوتر ہا ۔

‏55 تے اُتھاں بہُوں ساریاں عورتاں جیہڑیاں گلیل کنُوں یسُوع دی خدمت کریندیاں ہوئیاں اُوندے پِچُھوں پِچُھوں آئیاں ہَن، پَرے کنُوں ڈیدھیاں پَیّاں ہَن ۔ ‏56 اُنہاں ءچ مریم مگدلینی ہئی، تے یعقوب تے یوسیس دی ماں مریم تے زبدی دے پوتراں دی ماں ۔

‏57 جِیں وَیلے شام تھئی تاں یُوسف ناں دا، ارِمَتِیاہ دا ہِک دولت مند آدمی آیا جیہڑا خود وی یسُوع دا شاگرد ہا ۔ ‏58 اُوں پِیلاطُس دے کولھ وَنج تے یسُوع دی لاش منگی تے پِیلاطُس ڈے ڈیوݨ دا حُکم ڈِتا۔ ‏59 یُوسف لاش کُوں گھِن تے ہِک مہین چادر ءچ ولھیٹیا ۔ ‏60 تے اُونکُوں آپنڑیں نویں قبر ءچ جیہڑی اُوں چٹان ءچ کھدوائی ہئی رکھ ڈِتّا۔ وَل اوہ ہِک وَڈا پتھر قبر دے مُنہ اُتے ریڑھ تے چلا گِیا ۔ ‏61 مریم مگدلینی تے ڈوجھی مریم اُتھاں قبر دے سامنڑے بیٹھیاں ہَن ۔

‏62 اَگلے ڈینہہ جیہڑا تیاری دے بعد دا ڈینہہ ہا، سردار کاہِناں تے فریسیاں رَل تے پِیلاطُس دے کولھ وَنج تے آکھیا ‏63 مالک! ساکُوں یاد ہے جو اُوں دھوکے باز آپنڑے زندہ ہوندے آکھیا ہا جو میں تَرے ڈینہہ دے بعد زندہ تھی ویساں ۔ ‏64 بس حُکم ڈے جو تَریجھے ڈینہہ تَئیں قبر دی نگرانی کیتی وَنجے ۔ کِتھائیں اِیویں نہ تھیوے جو اُوندے شاگرد آتے لاش کُوں چوری کر تے گھِن وَنجنڑ تے لوکاں کُوں آکھ ڈیوݨ جو اوہ مُردیاں ءچوں زندہ تھی گِیا ہے، تے ایہہ بعد دا دھوکا پہلے آلے دھوکے کنُوں وی بُرا ہووے ۔

‏65 پِیلاطُس جواب ڈِتّا تُہاڈے کولھ پہرے دار ہِن پئے، اُنہاں کُوں گھِن وَنجو تے جِتھاں تَئیں تھی سگے قبر دی نگرانی کرو۔

‏66 بس اوہ پہرے داراں کُوں نال گھِن تے گئے تے پتھر اُتے مُہر لا تے قبر دی نگرانی کیتی ۔