مسیح دا مُردیاں ءچوں زندہ تھی ونجنڑا ں
16
1 جِیں وَیلے سَبت دا ڈینہہ گزر گِیا تاں مریم مگدلینی تے یعقوب دی ماں مریم تے سلومی نیں خوشبودار چیزاں مُل گِھدیاں تاں جو آتے اُوندے اُتے مَلنڑ ۔ 2 اوہ ہفتے دے پہلے ڈینہہ بہُوں سویرے سورج نِکلدے ای قبر اُتے آئیاں ۔ 3 تے آپس ءچ آکھنڑ لگیاں جو ساڈے کیتے قبر دے مُنہ اُتوں پتھر کُوں کوݨ ریڑھیسی؟ 4 جِیں وَیلے اُنہاں نگاہ کیتی تاں ڈِٹھا جو اوہ پتھر پہلے کنُوں ای ریڑھیا پئے ،کیوں جو او ہ بہُوں ای وَڈا ہا ۔ 5 تے قبر دے اندرداخل تھی تے اُنہاں ہِک جوان کُوں چِٹا چولا پاتے سَجے پاسوں بیٹھے ڈِٹھا تے بہُوں حیران تھئیاں ۔6 اُونیں اُنہاں کُوں آکھیا ایجھیاں حیران نہ تھیو ٔ۔ تُساں یسُوع ناصری کُوں گولھیندیاں ہِوے جیہڑا مصلُوب تھیّا ہا ۔ اوہ زندہ تھی گئے۔ اوہ اِتھاں کائنیں ۔ ڈیکھو ایہہ او ہ جاہ ہے جِتھاں اُنہاں اُونکُوں رکھیا ہا ۔ 7 پَر تُساں وَنج تے اُوندے شاگرداں تے پطرس کُوں آکھو جو اوہ تُہاڈے کنُوں پہلے گلیل کُوں ویسی ۔ تُساں اُتھائیں اُونکُوں ڈیکھسو جیویں اُونیں تُہاکُوں آکھیا ہا ۔
8 تے اوہ جلدی نال قبر کنُوں باہر نِکل تے بھج پِئیاں کیوں جو کمبڑیں تے ہیبت اُنہاں اُتے غالب آگئی ہئی، تے اُنہاں کہیں کُوں کُجھ نہ آ کھیا کیوں جو او ڈردیاں ہَن ۔
یسُوع مریم مگدلینی اُتے ظاہر تھیندے
9 ہفتے دے پہلے ڈینہہ جِیں وَیلے اوہ صبح سویرے زندہ تھی گِیا تاں سبھ کنُوں پہلے مریم مگدلینی اُتے ظاہر تھیّا ، جِیندے ءچوں اُونیں سَت بدرُوحاں کڈھیاں ہَن ۔ 10 اُونیں وَنج تے اُوندے ساتھیاں کُوں جیہڑے غم دی وجہ کنُوں روندے تے ماتم کریندے ہَن ، خبر ڈِتی ۔ 11 اُنہاں ایہہ سُنڑ تے جو اوہ زندہ ہے تے اُونکُوں ڈِکھالی ڈِتے ، یقین نہ کیتا ۔
یسُوع آپنڑے ڈو پیروکاراں اُتے ظاہر تھیندے
12 اِیندے بعد اوہ ڈوجھی صورت ءچ ڈو آدمیاں کُوں جیہڑے وَیلے اوہ دیہات اَل پیدل ویندے پئے ہَن ، ظاہر تھیّا ۔ 13 اُنہاں وی وَنج تے باقی لوکاں کُوں خبر ڈِتی پَر اُنہاں نیں اُنہاں دا وی یقین نہ کیتا ۔
یسُوع یارہا ں شاگرداں اُتے ظاہر تھیندے
14 وَل اوہ یارہاں کُوں جِیں وَیلے اوہ کھانڑا کھاوݨ بیٹھے ہَن ظاہر تھیّا ، تے اُونیں اُنہاں دی بے اعتقادی تے سخت دِلی اُتے اُنہاں کُوں ملامت کیتی، کیوں جو جنہاں اُوندے زندہ تھیوݨ تُوں بعد اُونکُوں ڈِٹھا ہا اُنہاں نیں، اُنہاں دا یقین نہ کیتا ہا ۔ 15 اُونیں اُنہاں کُوں آکھیا جو تُساں ساری دُنیا ءچ وَنج تے ساری خلقت دے سامنڑے اِنجیل دی تبلیغ کرو۔ 16 جیہڑا اِیمان گِھن آوے تے بپتسمہ گِھنے او ہ نجات پَیسی پَر جیہڑا اِیمان نہ گِھن آوے اوہ مُجرم کھڑایا ویسی۔ 17 تے اِیمان گِھن آوݨ آلیاں دے ءچ ایہہ معجزے تھیسن ، اوہ میڈے ناں نال بدرُوحاں کُوں کڈھیسن ، نویاں نویاں زباناں بولیسن ، 18 سَپاں کُوں چا گھِنسن، تے جے کوئی مہلک چیز پی گھِنسن تاں اُنہاں کُوں کُجھ نُقصان نہ تھیسی ۔ اوہ بیماراں اُتے ہَتھ رکھیسن تے اوہ چنگے تھی ویسن ۔
یسُوع اَسمان اُتےچایا ویندے