اُونیں جواب ءچ آکھیا تُوں خود آہدھیں ۔

‏3 تے سردار کاہن اُوندے اُتے بہُوں سارے گالھیں دا اِلزام لیندے ریہے ۔ ‏4 پِیلاطُس اُونکُوں وَلا پُچھیا جو تُوں کوئی جواب نئیں ڈیندا ؟ ڈیکھ ایہہ تیڈے اُتے کتنے اِلزام لیندے پئے ہِن ۔

‏5 یسو ع وَل وی کُجھ جواب نہ ڈِتا ، ایہہ تَئیں جو پِیلاطُس بہُوں حیران تھیّا ۔

‏6 پِیلاطُس عید اُتے ہِک قیدی کُوں چھوڑ ڈیندا ہا جِیندی رہائی کیتے لوک درخاست کریندے ہَن ۔ ‏7 تے برابّا ناں دا ہِک آدمی اُنہاں باغیاں دے نال قید ءچ ہا جنہاں بغاوت ءچ خون کیتا ہا ۔ ‏8 تے بِھیڑ اُتے چڑھ تے اُونکُوں درخاست کرݨ لگی جو آپنڑے دستور دے مطابق ساڈے کیتے کر ۔ ‏9 پِیلاطُس جواب ءچ آکھیا کیا تُساں چاہندے ہِوے جو تُہاڈے کیتے یہُودیاں دے بادشاہ کُوں چھوڑ ڈیواں ؟ ‏10 کیوں جو اُونکُوں پتا ہا جو سردار کاہناں اِینکُوں حسد نال میڈے حوالے کیتے ۔

‏11 پَر سردار کاہناں بِھیڑ کُوں اُکسایا تاں جو پِیلاطُس اُنہاں کیتے برابّا کُوں ای چھوڑ ڈیوے ۔ ‏12 پِیلاطُس اُنہاں کُوں ڈوجھی واری آکھیا وَل اُوندے نال میں کیا کراں جِینکُوں تُساں یہُودیاں دا بادشاہ آہدھے ہِوے ؟

‏13 اوہ وَل چیخے جو اوہ مصلُوب تھیوے ۔

‏14 تے پِیلاطُس اُنہاں کُوں آکھیا کیوں اُونیں کیا بُرائی کیتی ہے ؟

اوہ بِیا شور مچاوݨ لگے جو اوہ مصلُوب تھیوے ۔

‏15 پِیلاطُس لوکاں کُوں خوش کرݨ دی غرض نال برابّا کُوں چھوڑ ڈِتا ، تے یسُوع کُوں مصلُوب کرݨ کیتے کوڑے مَروا تے سپاہیاں دے حوالے کر ڈِتا ۔

‏16 تے سپاہی اُونکُوں اُوں صحن ءچ گِھن ‎گئے جیہڑا پَریتورین اَکھویندے تے ساری پلٹن کُوں سَڈوا گِھدا ۔ ‏17 اُنہاں اُونکُوں ارغوانی چوغہ پوایا تے کنڈیاں دا تاج بنڑا تے اُوندے سِر اُتے رکھ ڈِتا ۔ ‏18 تے اُونکُوں سلام کر تے آکھنڑ لگے جو اے یہُودیاں دے بادشاہ سلام ! ‏19 تے اوہ اُوندے سِر اُتے سرکنڈے مَریندے تے اُوندے اُتے تُھکیندے تے گوڈے ٹیک تے اُونکُوں سِجدہ کریندےریہے ۔ ‏20 تے جِیں وَیلے اُوندا مذاق بنڑا گِھدا تاں اُوندے اُتوں ارغوانی چوغہ لہا تے اُوندے آپنڑے کپڑے اُونکُوں پوا ڈِتے ، وَل اُونکُوں صلیب چڑھاوݨ کیتے باہر گِھن گئے ۔

‏21 شمعون ناں دا ہِک کُرینی آدمی ، سکندر تے رُوفُس دا پیُو ، دیہات تُوں آندے ہوئے اُتھوں لنگھیا ۔ اُنہاں اُونکُوں وِنگار ءچ پکڑ گِھدا جو اُوندی صلیب چاوے ۔ ‏22 تے اوہ اُونکُو ں گُلگُتا دے مقام تے گِھن آئے جِیندا ترجمہ ہے کھوپڑی دی جاہ ۔ ‏23 تے اُونکُوں مُر ^a مِلی ہوئی مَے پیہوݨ کیتے ڈِتی پَر اُونیں نہ پیتی ۔ ‏24 تے اُنہاں اُونکُوں مصلُوب کیتا تے قُرعہ پا تے اُوندے کپڑے آپس ءچ ونڈ گِھدے ۔ ‏25 اُنہاں سویر دے پہلے پہر دے نیڑے اُونکُوں مصلُوب کیتا ۔ ‏26 تے اُوندا اِلزام لکھ تے اُوندے اُتے لا ڈِتا گِیا جو ایہہ یہُودیاں دا بادشاہ ہے ۔ ‏27 اُنہاں ڈو ڈاکوو اں کُوں وی اُوندے نال مصلُوب کیتا ، ہِک کُوں اُوندے سَجے پاسوں تے ڈوجھے کُوں کَھبے پاسوں ۔ ‏28 تے وَل ایہہ گالھ پوری تھئی جو اوہ بدکاراں دے نال شمار کیتا گِیا ۔

‏29 تے اُتھوں کنُوں لنگھنڑ آلے سِر ہِلا ہِلا تے اُونکُوں لعن طعن کریندے تے اَکھیندے ہَن جو واہ ! مَقدِس کُوں ڈھا تے تَرے ڈینہہ ءچ بناوݨ آلے ، ‏30 صلیب کنُوں لہہ تے آپنڑے آپ کُوں بچا ۔

‏31 اِیویں ای سردار کاہن وی فقیہاں نال رَل تے آپس ءچ اُوندا مذاق بنڑیندے ہوئے آہدھے ہَن، اِیں بئیاں کُوں بچایا پَر آپنڑے آپ کُوں نئیں بچا سگدا ۔ ‏32 اِسرائیل دے بادشاہ، المسیح ، ہُنڑ صلیب تُوں لہہ آ تاں جو اَساں ڈیکھ تے اِیمان گِھن آؤں تے جیہڑے اُوندے نال مصلُوب تھئے ہَن اوہ وی اُونکُوں لعن طعن کریندے ہَن ۔

‏33 جِیں وَیلے ڈوپہر تھئی تاں سارے مُلک ءچ اندھارا تھی گِیا تے تَریجھے پہر تَئیں ریہا ۔ ‏34 تے تَریجھے پہر کُوں یسُوع وڈی آواز نال چِلایا جو اِلوہی اِلوہی لما شبقتنی؟جِیندا ترجمہ ہے اے میڈے خُدا ! اے میڈے خُدا! تُوں میکُوں کیوں چھوڑ ڈِتا؟

‏35 جیہڑے کولھ کھڑے ہَن ، اُنہاں ءچوں کُجھ نیں ایہہ سُنڑ تے آکھیا ڈیکھو اوہ ایلیّاہ کُوں سَڈیندے ۔ ‏36 تے ہِک نیں بھج تے سپنج کُوں سِرکے ءچ بوڈ تے سرکنڈے اُتے رکھ تے اُونکُوں چُسایا تے آکھنڑ لگا ذرا کھڑونجو ، ڈیکھوں تاں ایلیّاہ اُونکُوں لہاوݨ آندے یا نئیں ۔

‏37 وَل یسُوع وَڈی آواز نال چِلا تے دَم ڈے ڈِتا ۔

‏38 تے مَقدِس دا پردہ اُتوں کنُوں تَلے تَئیں پَھٹ تے ڈو ٹکڑے تھی گِیا ۔ ‏39 تے جیہڑا صوبہ دار اُوندے سامنڑے کھڑا ہا ، اُونیں اُونکُوں اِیویں دَم ڈیندے ہوئے ڈیکھ تے آکھیا سچ مچ ایہہ بندہ خُدا دا پوتر ہا ۔

‏40 کئی عورتاں دُور کنُوں ڈیدھیاں پِیاں ہَن ۔ اُنہاں ءچ مریم مگدلینی تے چھوٹے یعقوب تے یوسیس دی ماں مریم تے سلومی ہَن ۔ ‏41 جِیں وَیلے اوہ گلیل ءچ ہا ، ایہہ عورتاں اُوندے پچُھوں ٹُر پوندیاں تے اُوندی خدمت کریندیاں ہَن۔ تے بئیاں وی بہُوں ساریاں عورتاں ہَن جیہڑیاں اُوندے نال یروشلِیم ءچ آیاں ہَن ۔

‏42 جِیں وَیلے شام تھی گئی تاں اِیں واسطے جو تیاری دا ڈینہہ ہا جیہڑا سَبت کنُوں ہِک ڈینہہ پہلے ہوندا ہے ‏43 اَرمتیہ دا رَہنڑ آلا یُوسف آیا جیہڑا صدر ِ عدالت دا معزز ممبر ہا تے خود وی خُدا دی بادشاہی دا منتظر ہا ۔ اُونیں جرأت نال پِیلاطُس دے کولھ وَنج تے یسُوع دی لاش منگی ۔ ‏44 پِیلاطُس تعجُب کیتا جو اوہ اِتنی جلدی مَر گِیا تے صوبیدار کُوں سَڈ تے پُچھیا جو اُونکُوں موئے کتنی دیر تھی گئی ہے ؟ ‏45 جِیں وَیلے صوبیدار کنُوں حقیقت دا پتا چلیا تاں لاش یُوسف کُوں ڈے ڈِتی ۔ ‏46 اُونیں ہِک مہین چادر مُل گِھدی تے لاش کُوں لہا تے اُوں چادر ءچ کفنا یا ،تے ہِک قبر ءچ رکھ ڈِتا جیہڑی چٹان ءچ بنڑائی گئی ہئی تے قبر دے مُنہ اُتے ہِک پتھر ریڑھ ڈِتا ۔ ‏47 تے مریم مگدلینی تے یوسیس دی ماں مریم ڈیدھیاں پئیاں ہَن جو اُونکُوں کِتھاں رکھیا گِیا ہے ۔