مُقدّس لوقا ہِک حکیم ہَن ، جنہاں کئی واری پولُس رسول دے نال سفر کیتے ۔ اُنہاں ایہہ اِنجیل غالباً ٦٠ کنُوں ٦٥ عیسوی ءچ ہِک معزز یُونانی شخص تھیفلُس کیتے لکھی ۔ مُقدّس لُوقا اِیں اِنجیل ءچ یسُوع مسیح کُوں دُنیا اُتے کامل اِنسان وانگوں پیش کیتے ۔ یسُوع مسیح دے ہِک کُنواری کنُوں پیدا تھیوݨ دے واقعہ کنُوں ایہہ اِنجیل شروع کریندن۔ اِیندے متعلق جیہڑی تفصیلات اُنہاں پہنچائیاں ہِن او ساکُوں بِیا کِتھائیں نئیں مِلدیاں ۔ وَل اُنہاں گلیل ءچ یسُوع مسیح دی خدمت تے اُوندے بعد یسُوع مسیح دی بیت اُلمَقدس شہر ءچ سفر دا حال بہُوں تفصیل نال لکھدن ۔ آخر ءچ یسُوع مسیح دی سولی اُتے مَوت دے بعد یسُوع مسیح دے وَلا زندہ تھی وَنجنڑ کنُوں یسُوع مسیح دے شاگرد خوشی منیندے تے اَسمان کنُوں نازل تھیوݨ آلی قوت یعنی رُوح القُدس دا اِنتظار کریندے ڈِکھائی ڈیندے ہَن ۔

جِتھاں مَقدِس متّی رسول آپنڑے اِنجیلی بیان ءچ یسُوع مسیح کُوں بادشاہ تے مُقدّس مرقُس یسُوع مسیح کُوں خُدا دے خادم وانگوں پیش کریندے ہِن ، اُتھاں مُقدّس لُوقا یسُوع مسیح کُوں ہِک ایجھے کامل اِنسان تے خُداوند وانگوں پیش کریندن جَیندا شجرہ نسب حضرت آدم تَئیں پہنچدے۔ (٣ ٢٨ تا ٣٨ )

یسُوع مسیح تاریخ ِ عالم دی ہِک عظیم ترین ہستی ہِن ۔ مُقس لُوقا یسُوع مسیح کُوں دُنیا دے واقعات دا مرکز قرار ڈیندن ۔ یسُوع مسیح دی تعلیم اُوندی زندگی ، صلیبی مَوت تے مُردئیں ءچوں زندہ تھیوݨ نال یسُوع مسیح دی اُچی شان ظاہر تھیندی ہے ۔