‏3 جے کوئی غلط تعلیم ڈیندے تے خُداوند یسوع مسیح دے صحیح کلام تے اُوں تعلیم کُوں نئیں مَنیندا جیہڑی خُداپرستی دے مطابق ہے، ‏4 تاں اوہ مغرور ہے تے کُجھ نئیں جانڑدا۔ اُونکُوں فقط فضول بحث تے لفظی تکرار کرݨ دا مرض ہے جِیندا نتیجہ حَسد، جھیڑا، بدگوئیاں تے بد گُمانیاں ہے۔ ‏5 تے اُنہاں لوکاں ءچ جِنہاں دی عقل وِگڑ گئی ہے، تنازع پیدا تھیندا ہے۔ اوہ حق کنُوں محروم تھی گئے ہِن تے دینداری کُوں نفع دا ذریعہ سمجھدے ہِن۔

‏6 جے دینداری قناعت دے نال ہووے تاں وَڈے نفع دا ذریعہ ہے۔ ‏7 کیوں جو اَساں دُنیا ءچ نہ کُجھ گِھن تے آئے ہئیں، نہ کُجھ اُوندے ءچوں گِھن تے وَنج سگدے ہئیں۔ ‏8 بس جے ساڈے کولھ کھاوݨ پاوݨ کُوں ہے تاں اُونہئی اُتے قناعت کروں۔ ‏9 جیہڑے لوک دولت مند تھیونڑا چاہندے ہِن تاں اوہ اَزمایش ءچ مُبتلا تھی تے بہُوں بے ہُودہ تے نقصاندہ خواہشاں دے پھندے ءچ پھس وَیندے ہِن تے تباہی تے ہلاکت دے دریا ءچ غرق تھی وَیندے ہِن۔ ‏10 کیوں جو زَر دوستی ہر قِسم دی بُرائی دی جڑ ہے تے کُجھ لوک دولت دے لالچ ءچ آ تے آپنڑا اِیمان وَنجا بیٹھے تے قِسم قِسم دے غماں کنُوں آپنڑے آپ کُوں چَھلنی کر گھدا۔

‏11 پَر اے خُدا دے بندے ! تُوں اِنہاں کنُوں بھج تے راستبازی، دینداری،ایمان، محبت ، صبر تے حلیمی دا طالب تھی۔ ‏12 اِیمان دی چنگی کُشتی لَڑ۔ ہمیشاں دی زندگی اُتے قبضہ کر گِھن جِیندے کیتے تُوں سَڈیا گِیا ہَویں تے تَیں بہُوں سارے گواہاں دے سامنڑے چنگا اِقرار کِیتا ہا۔ ‏13 میں اُوں خُدا کُوں جیہڑا ہر چیز کُوں زندگی ڈیندے تے اُوں مسیح یسوع کُوں جئیں پُنطیُس پِلاطُس دے سامنڑے چنگا اِقرار کیتا ہا، گواہ بنڑا تے تیکُوں تاکید کریندا ہاں، ‏14 جو جیہڑا حُکم تیکُوں ڈِتا گِیا ہے اُوندے اُتے بغیر کہیں غلطی تے ناکامی دے عمل کر جئیں تئیں ساڈا خُداوند یسوع مسیح ظاہر نہ تھی وَنجے۔ ‏15 خُدا مناسب وقت اُتے مسیح کُوں ظاہر کریسی۔ خُدا مُبارک تے واحد حاکم ہے، بادشاہاں دا بادشاہ، خُداونداں دا خُداوند ہے۔ ‏16 فقط اُوہو لافانی ہے، تے اوہ اُوں نُور ءچ رَہندے جئیں تئیں کوئی پُج نئیں سگدا۔ اُونکُوں کہیں اِنسان نیں نئیں ڈِٹھا تے نہ ڈیکھ سگدے۔ اُوندی عزت تے سلطنت ہمیشاں تئیں قائم رَہوے۔ آمین۔

‏17 اِیں موجودہ جہان دے دولت منداں کُوں حُکم ڈے جو اوہ مغرور نہ تھیوݨ تے دولت جیہی فانی چیز اُتے نئیں بلکہ خُدا اُتے اُمید رکھنڑ جیہڑا ساڈی خوشی کیتے ساریاں چیزاں ساکُوں کثرت نال ڈیندے۔ ‏18 اُنہاں کُوں حُکم ڈے جو اوہ نیکی کرݨ تے نیک کَماں دے لحاظ نال دولت مند بننڑ تے ہمیشاں سخاوت کرتے ڈوجھیاں دی مدد کرݨکیتے تیار رَہوݨ۔ ‏19 اِینویں اوہ آپنڑے کیتے ہِک چنگا خزانہ جمع کریسن یعنی مُستقبل کیتے ہِک ٹھوس بنیاد، تے اِینویں حقیقی زندگی اُتے قبضہ کرݨ۔

‏20 اے تِیمُتھِیُس! اِیں امانت دی جیہڑی تیڈے سپُرد کیتی گئی ہے، حفاظت کر، تے بے دینی دی بے ہُودہ بکواس تے مُخالفت کنُوں کِنارہ کر کیوں جو ایجھے علم کُوں عِلم آکھنڑا ای غلط ہے۔ ‏21 کُجھ لوک ایجھے علم دی خاطر آپنڑے اِیمان کنُوں برگشتہ تھی گئے ہِن۔

خُدا دا فضل تُہاڈے نال رَہوے۔