جماعت دے مختلف لوکاں دے نال سلُوک
5
1 کہیں وَڈی عُمر آلے کُوں بُرا بھلا نہ آکھ بلکہ اُونکُوں آپنڑا پِیُو جاݨ تے نصیحت کر، تے نوجواناں کُوں بِھرانواں وانگوں، 2 وَڈی عُمر آلی عورتاں کُوں ماں، تے جوان عورتاں کُوں پاکیزگی نال بھینڑاں جاݨ تے۔3 اُنہاں بیواواں دی جیہڑیاں واقعی ضرورت مند ہِن، عزت کر۔ 4 جے کہیں بیوہ دے چھوہر یا پوترے ہووݨ تاں اوہ آپنڑے خاندان کُوں سمبھال تے ماں پِیُو دا حق ادا کرنڑا سِکھنڑ کیوں جو ایہہ خُدا دی نگاہ ءچ پسندیدہ ہے۔ 5 جیہڑی واقعی بیوہ ہے تے اُوندا کوئی نئیں، اوہ خُدا اُتے اُمید رکھیندی ہے تے ڈینہہ رات خُدا کنُوں مدد مَنگ تے دُعا کریندی ہے۔ 6 پَر جیہڑی بیوہ عیاشی ءچ زندگی گُزریندی ہووے، اوہ زندہ ہوندے ہوئے وی مُردہ ہے۔ 7 اِنہاں گالھیں دے بارے ءچ اُنہاں کُوں نصیحت کر تاں جو اوہ بے اِلزام رَہوݨ۔ 8 جیہڑا شخص آپنڑے رشتہ داراں، خاص کر آپنڑے گھر آلیاں دی خبر گیری نئیں کریندا اوہ اِیمان دا مُنکر ہے تے غیر اِیمانداراں کنُوں وی بدتر ہے۔
9 بیواواں دی فہرست ءچ صرف اُوں بیوہ کُوں درج کرو جیہڑی سٹھ سال کنُوں گَھٹ نہ ہووےتے ہِک پائے دی زال ریہی ہووے، 10 نیک کَم کرݨ ءچ مشہور ہووے یعنی اُونیں آپنڑے بالاں دی تربیت کیتی ہووے، پَردیسیاں دی مہمان نوازی کیتی ہووے، مُقدساں دے پیر دھوتے ہووݨ ، مصیبت دے ماریاں دی مدد کیتی ہووے تے ہر نیک کَم کرݨ ءچ مشغول ریہی ہووے۔
11 پَر جوان بیواواں دے ناں درج نہ کرو کیوں جو اوہ مسیح دی بجائے آپنڑی نفسانی خواہش دے تابع تھی تے وَلا شادی کرݨ چاہندیاں ہِن۔ 12 تے قصُوروار تھیندیاں ہِن کیوں جو اُنہاں نیں آپنڑے پہلے اِیمانa کُوں چھوڑ ڈِتا ہے۔ 13 اِیندے علاوہ اوہ گھر گھر بیکار پِھردیاں ہِن تے نہ فقط بیکار رَہندیاں ہِن بلکہ بک بک کریندیاں ہِن تے ڈوجھیاں دے معاملات ءچ دَخل اندازی وی کریندیاں ہِن تے غیر شائستہ گالھیں آہدھیاں ہِن۔ 14 اِیں واسطے میں جوان بیواواں کُوں صلاح ڈیندا ہاں جو اوہ شادی کرݨ ، بچے پیدا کرݨ ،آپنڑا گھر سنبھالنڑ تے کہیں مخالف کُوں بد گوئی کرݨ دا موقع نہ ڈیوݨ۔ 15 کیوں جو کُجھ گُمراہ تھی تے شیطان دی پیروی کرݨ لگ گیاں ہِن۔ 16 جے کہیں اِیماندار عورت دے خاندان ءچ بیواواں ہووݨ تاں اوہ اُنہاں دی مدد کر ے تے کلیسیا اُتے بھار نہ سَٹیا وَنجے تاں جو اوہ اُنہاں دی مدد کر سگے جیہڑیاں واقعی بے سہارا ہِن۔
17 جیہڑے بزُرگ چنگی رہنمائی کریندے ہِن، خاص کر اوہ جیہڑے کلام سُنڑیندے ہِن تے تعلیم ڈیندے ہِن، ڈُگنڑی عزت دے حقدار ہِن۔ 18 کیوں جو خُدا دا کلام آہدھا ہے جو ”گہائی کریندے وقت ڈاند دا مُنہ نہ بَدھائے“ تے ایہہ وی جو ”مزدور آپنڑی مزدوری دا حقدار ہے ۔“ 19 کہیں بزُرگ اُتے لائے وَنجنڑ آلے کہیں وی اِلزام کُوں ڈو یا تَرے گواہاں دے بغیر قبُول نہ کرائے۔ 20 گُناہ کرݨ آلیاں کُوں ساریاں دے سامنڑے ملامت کر تاں جو ڈوجھیاں کُوں وی عبرت تھیوے۔
21 میں خُدا، مسیح یسوع تے برگزیدہ فرشتیاں کُوں گواہ بنڑا تے تیکُوں تاکید کریندا ہاں جو اِنہاں گالھیں اُتےبغیر تعصب دے تے بغیر طرفداری دے عمل کر۔ 22 کہیں شخص اُتے ہَتھ رَکھ تے اُونکُوں خِدمت کیتے مُقرر کرݨ ءچ جلدی نہ کر تے نہ ڈوجھیاں دے گُناہاں ءچ شریک تھی۔ آپنڑے آپ کُوں پاک رکھ۔
23 اَگوں تُوں صِرف پانڑی ای نہ پِیتا کر بلکہ آپنڑے معدہ تے اکثر بیمار رَہوݨ دے سببّوں تھوڑی جِیہی تازہ مَےوی اِستعمال کیتا کر۔