تھِسّلُنیکیاں دے ناں پولُس رسُول دا ڈُوجھا خط
پیش لفظ
تھِسّلُنِیکے شہر دے ایمانداراں کُوں پولُس رسُول پہلے ہِک خط لِکھیا ہا جیندے ءچ اُوں یسُوع مسیح دے واپس آوݨ دے بارے ءچ بیان کیتا ہا، جڈاں بدکاراں کُوں سزا تے ایمانداراں کُوں ڈُکھاں تُوں رہائی، خُوشی تے جلال مِلسی۔ پر کُجھ دیر بعد غلط تعلیم ڈیوݨ آلے ایہ سِکھاوݨ لگے جو مسیح دی ڈُوجھی آمد تھی گئی ہے۔ اِیں واسطے پولُس رسُول اِیں ڈُوجھے خط ءچ سمجھیندے جو مسیح دی آمد تُوں پہلے بہُوں سارے لوک ہِک بدکار دے پِچُھوں لگ تے خُدا دے خلاف تھی ویسن، پر مسیح آ تے اُنہاں سبھ کُوں ختم کر ڈیسی۔ اُوندی آمد تئیں اِیمانداراں کُوں سُستی نئیں کرنڑی چاہیدی بلکہ آپنڑے کماں تے خدمت ءچ مصروف راہونڑا چاہیدے۔