خُدا دا اِجڑ
5
1 تُہاڈے ءچ جیہڑے لوک کلیسیا دے بزُرگ ہِن، میں اُنہاں کُوں ہِک بزُرگ ، مسیح دے ڈُکھاں دا گواہ تے اُوندے ظاہر تھیوݨ آلے جلال ءچ شریک ہووݨ دی حیثیت نال ایہہ نصیحت کریندا ہاں جو 2 تُساں خُدا دے اِجڑ دی جیہڑا تُہاڈے سُپرد کیتا گِیا ہے، نگہبانی کرو۔ مجبوری نال نئیں بلکہ خُدا دی مرضی دے مطابق خُوشی نال، مال دولت دے لالچ کیتے نئیں بلکہ دِلی شوق نال۔ 3 تے جیہڑے لوک تُہاڈے سُپرد ہِن اُنہاں اُتے حُکم نہ چلاؤ بلکہ اِجڑ کیتے چنگا نمونہ بنڑو۔ 4 تے جِیں وَیلے سردار آجڑی ظاہر تھی سی تاں تُساں جلال دا ایجھا انعامی تاج پے سو جِیندا جلال کڈھائیں ختم نہ تھی سی۔5 اِینویں ای اے نوجوانو! تُساں بزُرگاں دے تابع رَہو تے عاجزی نال ہِک ڈوجھے دی خدمت کرݨ کیتے تیار رَہو کیوں جو
”خُدا مغروراں دی مخالفت کریندا ہے
پَر عاجزی کرݨ آلیاں اُتے فضل کریندا ہے۔“
6 بس خُدا دے مضبوط ہَتھ دے تَلے عاجزی نال رَہو تے اوہ تُہاکُوں مناسب وقت اُتے سرفراز کریسی۔ 7 آپنڑیاں ساریاں فِکراں اُوندے اُتے سَٹ ڈیؤ کیوں جو اوہ تُہاڈی فِکر کریندا ہے۔
8 ہوشیار تے خبردار رَہو کیوں جو تُہاڈا دُشمنڑ اِبلیس دھاڑدے شیر وانگوں گولھیندا وَدا ہے جو کہیں کُوں پھاڑ کھاوے۔ 9 اِیمان ءچ مضبوط رَہندے ہوئے اُوندا مُقابلہ کرو تے جاݨ گِھنو جو تہاڈے بِھرا وی پُوری دُنیا ءچ اِینویں ای ڈُکھ سَہندے پئےہِن۔ 10 خُدا نیں جیہڑا سارے فضل دا سرچشمہ ہے، مسیح دے ذریعہ تُہاکُوں آپنڑے اَبدی جلال ءچ شریک تھیوݨ کیتے سڈیا ہے،تے بھانویں تُساں کُجھ مُدت تئیں ڈُکھ چَیندے ہِیوے پَر بعد ءچ اوہ تُہاکُوں کامل، مضبوط ، زور آور تے قائم کریسی۔ 11 سلطنت ہمیشاں تئیں اُوندی رَ ہوے ۔آمین۔
اِختتامی سلام
12 میں سِلوانُس دے ہَتھ جیہڑا میڈی نِگاہ ءچ ہِک دیانتدار بِھرا ہے ایہہ مختصر خط لکھوا تے تُہاکُوں بھیجیا ہے تاں جو تُہاڈی حوصلہ افزائی تھیوے۔میں گواہی ڈیندا ہاں جو خُدا دا سچا فضل اِیہو ہے، اِیندے اُتے قائم رَہو۔