خُدا کیتے زندگی گُزارنڑا
4
1 جِیں وَیلے مسیح نیں جِسم دے اعتبار نال ڈُکھ چاتا تاں تُساں وی اُوندے وانگوں ڈُکھ چاوݨ کیتے تیار تھی وَنجو کیوں جو ڈُکھ سَہونڑا ایہہ ظاہر کریندے جو تُساں گُناہ کُوں ترک کر ڈِتے۔ 2 ہُنڑ تُساں دُنیا ءچ آپنڑی باقی زندگی انسان دی نفسانی خواہشاں دے مطابق نئیں بلکہ خُدا دی مرضی دے مطابق گُزارو۔ 3 تُساں پہلے ای آپنڑی زندگی دا بہُوں وقت اِینویں گُزار ڈِتا ہے جِیویں غیر قوماں کُوں پسندہے یعنی شہوت پرستی، بُری خواہشاں، شراب نوشی، نَچنڑ گاوݨ ، نشے بازی تے مکروہ قِسم دی بُت پرستی ءچ۔ 4 تے ہُنڑ تُساں ایجھی بدچلنی ءچ اُنہاں دا ساتھ نئیں ڈیندے تاں اُنہاں کُوں حیرت تھیندی ہے تے اوہ تُہاکُوں بُرا بھلا آہدھے ہِن۔ 5 پَر اُنہاں کُوں اُونکُوں حساب ڈیونڑا پوسی جیہڑا زندیاں تے مُردیاں دی عدالت کرݨ کُوں تیار ہے۔ 6 تے اُنہاں کُوں جیہڑے ہُنڑ مَر گئے ہِن، اِیں واسطے خوشخبری سُنڑائی گئی ہئی جو جِسمانی لحاظ نال تاں اُنہاں دی عدالت اِنساناں دے مطابق ہووے پَر رُوحانی لحاظ نال اوہ خُدا دے مطابق زندہ رَہوݨ۔خُدا دیاں نعمتاں دے چنگے مُختار
7 ساریاں چیزاں دے خاتمے دا وقت نیڑے ہے۔ اِیں واسطے دُعا کرݨ کیتے ہوشیار تے تیار رَہو۔ 8 سبھ کنُوں اہم گالھ تاں ایہہ ہے جو آپس ءچ گھاٹی محبت رکھو کیوں جو محبت بہُوں سارے گُناہاں اُتے پڑدہ پا ڈیندی ہے۔ 9 بُڑ بُڑ کیتے بغیر مسافر پروری ءچ لگے رَہو۔ 10 ہَر ہِک کُوں کوئی نہ کوئی نعمت عطا کیتی گئی ہے۔ اِیں واسطے اِنہاں مختلف نعمتاں کُوں خُدا دے چنگے مُختاراں آلی کار ہِک ڈوجھے دی خدمت کرݨ ءچ استعمال کرو۔ 11 جے کوئی کُجھ بیان کرے تاں اِینویں کرے جِیویں خُدا اُوندے ذریعے کلام کریندا پِیا ہے۔ جے کوئی خدمت کرے تاں خُدا کنُوں طاقت گِھن تے کرے تاں جو سارے گالھیں ءچ یسوع مسیح دے وسیلہ نال خُدا دا جلال ظاہر تھیوے۔ جلال تے سلطنت ہمیشاں تئیں اُوندی ای ہے۔ آمین۔
مسیحی ہووݨ دے پارُوں ڈُکھ سَہونڑا
12 اے عزیزو! جیہڑی مُصیبت بھاہ آلی کار تُہاڈی اَزمائش کیتے تہاڈے اُتے آئی ہے اُوندے کنُوں حیران تھی تے ایہہ نہ سوچو جو ساڈے نال انوکھی گالھ تھئی ہے۔ 13 بلکہ خوشی مناؤ جو تُساں مسیح دے ڈُکھاں ءچ شریک تھی گئے وے تاں جو جیں وَیلے اُوندا جلال ظاہر تھیوݨ دا وَیلہ آوے تاں تُساں مزید وی خوش تھی سگو۔ 14 جے مسیح دے ناں دے سببّوں تُہاکُوں لعن طعن کیتا وَیندا ہے تاں تُساں مُبارک ہِیوے کیوں جو خُدا دا جلالی رُوح القُدس تُہاڈے اُتے چھاں کیتی پِیا ہے۔ 15 پَر تُہاڈے ءچوں کوئی وی ایجھا نہ ہووے جیہڑا کہیں کُوں قتل کرݨ ، چوری یا بدکاری کرݨ یا ڈوجھیاں دے کَم ءچ دخل ڈیوݨ دی وجہ کنُوں ڈُکھ چاوے۔ 16 پَر جےکوئی مسیح دا بندہ ہووݨ دے سببّوں ڈُکھ چاوے تاں شرماوے نہ بلکہ خُدا دی تعریف کرے جو اوہ اِیں ناں تُوں سَڈیا وَیندا ہے۔
17 کیوں جو اوہ وَیلہ آگِیا ہے جو خُدا دے گھر آلیاں تُوں عدالت شروع تھیوے۔ تے جِیں وَیلے عدالت دی ابتدا ساڈے کنُوں ای تھیسی تاں اُنہاں دا انجام کیا ہوسی جیہڑے خُدا دی خوشخبری کُوں نئیں مَنیندے۔
18 تے ”جِیں وَیلے راستباز وی مشکل نال نجات پا سگسی، تاں بے دین تے گُنہگاردا کیا بنڑسی؟“
19 بس جیہڑے لوک خُدا دی مرضی دے مطابق ڈُکھ سَہندے ہِن، اُنہاں کُوں چاہیدے جو اوہ آپنڑے آپ کُوں آپنڑے وفادار خالق دے سُپرد کرݨ تے نیکی کریندے رَہوݨ۔