‏3 جے اَساں اُوندے حُکماں اُتے عمل کریسوں تاں ساکُوں یقین تھی ویسی جو اَساں اُونکُوں جاݨ گِھدا ہے۔ ‏4 جیہڑا ایہہ آہدھے جو ”میں مسیح کُوں جاݨ گِھدے“ پَر اوہ اُوندے حُکماں اُتے عمل نئیں کریندا تاں اوہ کُوڑا ہے تے سچائی اُوندے ءچ نئیں۔ ‏5 پَر جیہڑا کوئی اُوندے کلام اُتے عمل کریندا ہے تاں اُوندے ءچ یقیناً خُدا دی محبت کامل تھی گئی ہے۔ اِیندے نال ساکُوں پتہ چلدے جو اَساں اُوندی رفاقت ءچ ہئیں۔ ‏6 جیہڑا کوئی آہدھے جو اوہ خُدا ءچ قائم ہے تاں اُونکُوں چاہیدے جو اوہ وی اُونویں ای زندگی گُزارے جِیویں مسیح نیں گُزاری۔

‏7 اے عزیزو! میں تُہاکُوں کوئی نواں حُکم نئیں لکھدا بلکہ اُوہو پُرانڑا حُکم ہے جیہڑا شروع کنُوں تُہاکُوں مِلیا ہے۔ ایہہ پُرانڑا حُکم اُوہو پیغام ہے جِینکُوں تُساں سُنڑ چُکے ہِیوے^b۔ ‏8 پَر میں جیہڑا حُکم تُہاکُوں لکھ تے بھجیندا پِیا ہاں، اوہ اِیں لحاظ نال نواں ہےجو اُوندی سچائی مسیح ءچ تے تُہاڈی زندگی ءچ نِظر آندی ہے۔کیوں جو تاریکی مِٹدی وَیندی ہے تے حقیقی نُور چمکنڑ لگیا ہے۔

‏9 جیہڑا کوئی نُور ءچ ہووݨ دا دعویٰ کریندا ہے پَر آپنڑے بِھرانواں نال دُشمنڑی رکھیندا ہے، اوہ ہُنڑ تئیں اَندھارے ءچ ہے۔ ‏10 جیہڑا کوئی آپنڑے بِھرانواں نال محبت رکھیندے اوہ نُور ءچ رَہندے تے اُوندے ءچ ٹھوکر کھواوݨ آلی کوئی چیز نئیں۔ ‏11 پَر جیہڑا آپنڑے بِھرانواں نال دُشمنڑی رکھیندا ہے،اوہ اَندھارے ءچ ہے تے اَندھارے ءچ ای ٹُردا ہے۔اوہ نئیں جانڑدا جو کِتھاں وَیندا ہے کیوں جواَندھارے نیں اُونکُوں اَندھا کر ڈِتا ہے۔

‏12 اے بالو! میں تُہاکُوں اِیں واسطے لکھدا پِیا ہاں جو مسیح دے ناں دے وسیلے نال تُہاڈے گُناہ معاف کر ڈِتے گئے ہِن۔

‏13 اے بزُرگو! میں تُہاکُوں اِیں واسطے لکھدا پِیا ہاں کیوں جو تُساں اُونکُوں جیہڑا اَزل کنُوں موجود ہے، جاݨ گِھدے۔

اے نوجوانو! میں تُہاکُوں اِیں واسطے لکھدا پِیا ہاں جو تُساں اِبلیس^c اُتے غالب آ گئے ہِیوے۔

اے بالو! میں تُہاکُوں اِیں واسطے لکھیا ہے جو تُساں خُدا باپ کُوں جاݨ گئے ہِیوے۔

‏14 اے بزُرگو! میں تُہاکُوں اِیں واسطے لکھیا ہے جو تُساں اُونکُوں جیہڑا اَزل کنُوں موجود ہے، جاݨ گِھدے۔

اے نوجوانو! میں تُہاکُوں اِیں واسطے لکھیا ہے جو تُساں مضبوط ہِیوے تے خُدا دا کلام تُہاڈےدِلاں ءچ وسدا ہے۔ تے تُساں اِبلیس اُتے غالب آ گئے ہِیوے۔

‏15 نہ دُنیا نال مُحبت رکھو، نہ دُنیا دی چیزاں نال۔ جیہڑا کوئی دُنیا نال محبت رکھیندے اُوندے ءچ باپ دی مُحبت نئیں۔ ‏16 کیوں جو جیہڑا کُجھ دُنیا ءچ ہے یعنی جِسم تے اَکھیں دی بُری خواہش تے زندگی دی شیخی، اوہ باپ دی طرفوں نئیں بلکہ دُنیا دی طرفوں ہے۔ ‏17 دُنیا تے اُوندی خواہشاں ڈوہائیں ختم تھی وَیندیاں ہِن پَر جیہڑا خُدا دی مرضی اُتے چلدے اوہ ہمیشاں تئیں قائم رَہندے۔

‏18 اے بالو! ایہہ دُنیا دا آخری وقت ہے۔ جِیویں تُساں سُنڑیا ہے جو مسیح دا مخالف آوݨ آلا ہے، اُوندے مطابق ہُنڑ بہُوں سارے مسیح دے مخالف اُٹھی کھڑے تھئے ہِن۔ اِیں کنُوں ساکُوں معلوم تھیندے جو آخری وقت آ گِیا ہے۔ ‏19 ایہہ لوک ساڈے ءچوں نِکلے تاں ہَن پَر اصل ءچ ساڈے ءچوں نہ ہَن۔جے ہوندے تاں ساڈے نال رَہندے۔ہُنڑ جِیں وَیلے ایہہ لوک ساڈے ءچوں نِکل گئے ہِن تاں ثابت تھی گِیا ہے جو ایہہ ساڈے ءچوں نہ ہَن۔

‏20 پَر تُساں تاں اُوں قدُوس دی طرفوں مسح^d کیتے گئے ہِیوے تے تُساں سارے سچائی کُوں جانڑدے ہِیوے۔ ‏21 میں تُہاکُوں اِیں واسطے نئیں لکھیا جو تُساں سچائی کُوں نئیں جانڑدے بلکہ اِیں واسطے جو تُساں اُونکُوں جانڑدے ہِیوے تے ایہہ وی جو کوئی کُوڑ سچائی دی طرفوں نئیں ہوندا۔

‏22 وَل کُوڑا کوݨ ہے؟ اُوہو جیہڑا یسوع دے مسیح ہووݨ دا اِنکار کریندے تے جیہڑا باپ تے پوتر دا اِنکار کریندا ہے، اُوہو مسیح دا مخالف ہے۔ ‏23 جیہڑا کوئی پوتر دا اِنکار کریندے، اُوندے کولھ باپ وی نئیں۔ تے جیہڑا پوتر دا اِقرار کریندے، اُوندے کولھ باپ وی ہے۔

‏24 اوہ پیغام جیہڑا تُساں شروع کنُوں سُنڑدے آئے ہِیوے، تُہاڈے دِل ءچ قائم رَہوے۔ جے اوہ پیغام تُہاڈے ءچ قائم رَہسی تاں تُساں وی باپ تے اُوندے پوتر ءچ قائم رَہسو۔ ‏25 تے جیہڑا وعدہ اُونیں ساڈے نال کیتا ہے اوہ ہمیشاں دی زِندگی ہے۔

‏26 میں ایہہ گالھ اُنہاں دے بارے ءچ لکھی ہے جیہڑے تُہاکُوں گُمراہ کرݨ دی کوشش کریندے ہِن۔ ‏27 پَر اوہ رُوح القُدس جِیندے نال تُہاکُوں مسح کیتا گِیا ہے، تُہاڈے دِلاں ءچ قائم رَہندے، اِیں کیتے ضرورت نئیں جو کوئی تُہاکُوں سِکھاوے۔رُوح القُدس ای تُہاکُوں سارے گالھیں سِکھیندے تے جیہڑا کُجھ اوہ سِکھیندے،سچائی ہے کُوڑ نئیں۔ تے جِیویں اُونیں تُہاکُوں سِکھایا ہے، اُونویں ای تُساں مسیح ءچ قائم رَہو۔

‏28 غرض اے بالو! مسیح ءچ قائم رَہو تاں جو جِیں وَیلے اوہ ظاہر تھیوے تاں ساکُوں دلیری ہووے تے اُوندے آوݨ اُتے اَساں اُوندے سامنڑے شرمندہ نہ تھیؤں۔ ‏29 جِیں وَیلے تُساں جانڑدے ہِیوے جو مسیح راستباز ہے تاں تُہاکُوں ایہہ وی جاننڑا چاہیدے جو جیہڑا کوئی راستبازی دے کَم کریندے، اوہ رُوحانی طور تے خُدا دا فرزند ہے۔