‏4 جیہڑا کوئی گُناہ کریندے اوہ شریعت دی مخالفت کریندے، کیوں جو گُناہ شریعت دی مخالفت ای ہے۔ ‏5 تے تُساں جانڑدے ہِیوے جویسوع اِیں واسطے ظاہر تھیّا ہئی جو گُناہاں کُوں چا گِھن وَنجے تے اوہ خُود گُناہ کنُوں پاک ہے۔ ‏6 جیہڑا کوئی اُوندے ءچ قائم رَہندا ہے اوہ گُناہ نئیں کریندا۔ جیہڑا کوئی گُناہ کریندے، اُونیں نہ تاں مسیح کُوں پچھانڑیا تے نہ اُونکُوں جانڑیا ہے۔

‏7 اے بالو! کہیں دے دوکھے ءچ نہ آوائے۔ جیہڑا کوئی راستبازی دے کَم کریندے، اوہ راستباز ہے جِیویں مسیح راستباز ہے۔ ‏8 جیہڑا کوئی گُناہ کریندا رَہندے، اوہ اِبلیس دا بندہ ہے، کیوں جو اِبلیس شروع کنُوں ای گُناہ کریندا رِیہا ہے۔ خُدا دا پوتر اِیں واسطے ظاہر تھیّا ہے جو اِبلیس دے کَماں کُوں برباد کر ڈِیوے۔

‏9 جیہڑا کوئی خُدا دا فرزند بنڑیا ہے، اوہ گُناہ نئیں کریندا کیوں جو اُوندےءچ خُدا دی فطرت^a رَہندی ہے ۔اُوندے کیتے گناہ کرنڑا ناممکِن ہے کیوں جو اوہ خُدادا فرزند ہے۔ ‏10 اِتھوں پتہ چلدےجو کیہڑے خُدا دے فرزند ہِن تے کیہڑے اِبلیس دے۔ جیہڑا راستبازی دے کَم نئیں کریندا تے آپنڑے بِھرانواں نال محبت نئیں رکھیندا، اوہ خُدا دا بندہ نئیں۔

‏11 ایہہ اُوہو پیغام ہے جیہڑا تُساں شروع کنُوں سُنڑیا جو ہِک ڈوجھے نال محبت رکھو۔ ‏12 قائن وانگوں نہ بنڑو جیہڑا اُوں شریر ^b دا بندہ ہا تے جئیں آپنڑے بِھرا کُوں قتل کیتا۔ اُونیں کیوں اُونکُوں قتل کیتا؟ اِیں واسطے جو اُوندے سارے کَم بُرے ہَن پَر اُوندے بِھرا دے راستبازی دے۔

‏13 ایں واسطے اے بِھراؤ! جے دُنیا تُہاڈے نال دُشمنڑی رکھیندی ہے تاں حیران نہ تھیوو۔ ‏14 اَساں جانڑدے ہئیں جو اَساں مُوت کنُوں نِکل تے زندگی ءچ داخل تھی گئے ہئیں، کیوں جو اَساں بِھرانواں نال محبت رکھیندے ہئیں۔ جیہڑا کوئی محبت نئیں رکھیندا، اوہ ہنڑ تئیں مَوت دی حالت ءچ ہے۔ ‏15 جیہڑا کوئی آپنڑے بِھرا نال دُشمنڑی رکھیندے، اوہ خونی ہے۔ تے تُساں جانڑدے ہِیوے جو کہیں خونی ءچ ہمیشاں دی زندگی نئیں ہوندی۔ ‏16 اَساں محبت کُوں اِتھوں جانڑیا ہے جو یسوع مسیح نیں ساڈے کیتے آپنڑی جان قُربان کر ڈِتی تے ساڈے اُتے وی ایہہ فرض ہے جو اَساں آپنڑے بِھرانواں کیتے آپنڑی جان قُربان کر ڈیؤں۔ ‏17 جے کہیں دے کولھ دُنیا دا مال موجود ہے پَر اوہ آپنڑے بِھرانواں کُوں مُتھاج ڈیکھ تے اُنہاں اُتے رحم نئیں کریندا تاں خُدا دی محبت اُوندے ءچ کیویں قائم رہ سگدی ہے؟ ‏18 اے بالو! اَساں محض کلام تے زبان نال ای نئیں بلکہ سچائی تے آپنڑے اعمال نال وی محبت کروں۔

‏19 اِیں کنُوں اَساں جاݨ گِھنسوں جو اَساں سچائی دے ہئیں تے خُدا دے حضور ءچ دلیری حاصل کریسوں۔ ‏20 جے ساڈا دِل ساکُوں اِلزام ڈیوے تاں خُدا تاں ساڈے ضمیر کنُوں وَڈا ہے تے اوہ سارا کُجھ جانڑدا ہے۔ ‏21 اے عزیزو! جے ساڈا ضمیر ساکُوں اِلزام نئیں ڈیندا تاں اَساں دلیری نال خُدا دے سامنڑے آ سگدے ہئیں۔ ‏22 تے اَساں جیہڑا کُجھ اُوں کنُوں مَنگدے ہئیں اوہ ساکُوں اُوندی طرفوں مِل وَیندے، کیوں جو اَساں اُوندے حُکماں اُتے عمل کریندے ہئیں تے اُوہو کریندے ہئیں جیہڑا اُونکُوں پسند ہوندے۔ ‏23 تے اُوندا حُکم ایہہ ہے جو اَساں اُوندے پوتر یسوع مسیح دے ناں اُتے اِیمان رکھوں تے اُوندے حُکم دے مطابق ہِک ڈوجھے نال محبت رکھوں۔ ‏24 جیہڑا کوئی خُدا دے حُکماں اُتے عمل کریندے اوہ خُدا ءچ قائم رَہندے تے خُدا اُوندے ءچ۔ تے جیہڑا رُوح القُدس خُدا نیں ساکُوں بخشیا ہے، اَساں اُوندے ذریعہ جانڑدے ہئیں جو خُدا ساڈے ءچ قائم رَہندا ہے۔