‏3 خُدا باپ تے باپ دے پوتر یسوع مسیح دی طرفوں فضل، رحم تے اِطمینان، سچائی تے محبت سمیت ساڈے نال رَہسِن۔

‏4 جِیں وَیلے میکُوں پتا چلیا جو تیڈے کُجھ فرزند باپ دے حُکم دے مطابق، حق اُتے چلدے ریہے ہِن تاں میکُوں بہُوں خوشی تھئی۔ ‏5 تے ہُنڑ اے بی بی! میں تیکُوں کوئی نواں حُکم نئیں لِکھدا پِیا بلکہ اُوہو جیہڑا شروع کنُوں ساڈے کولھ ہے۔ میں مِنت کریندا ہاں جو اَساں ہِک ڈوجھے نال محبت رکھوں۔ ‏6 تے محبت ایہہ ہے جو اَساں خُدا دے حُکماں اُتے چلوں۔ ایہہ اُوہو حُکم ہے جیہڑا تُساں شروع کنُوں سُنڑیا ہے، تُہاکُوں اُوندے اُتے عمل کرنڑا چاہیدا ہے۔

‏7 اِیں واسطے جو گُمراہ کرݨ آلے بہُوں سارے لوک دُنیا ءچ آئے وَدے ہِن جیہڑے یسوع مسیح دے مُجسم تھی تے آوݨ دا اِقرار نئیں کریندے۔ ایجھا ہر شخص گُمراہ کرݨ آلا تے مسیح دا مخالف ہے۔ ‏8 خبردار رَہو جو جیہڑی محنت اَساں کیتی ہے اوہ تُہاڈے ہَتھ کنُوں نِکل نہ وَنجے بلکہ تُہاکُوں اُوندا پورا اجر مِلے۔ ‏9 ہر کوئی جیہڑا اَگوں وَدھ وَیندے تے مسیح دی تعلیم اُتے قائم نئیں رَہندے، اُوندے کولھ خُدا نئیں۔ جیہڑا یسوع دی تعلیم اُتے قائم رَہندے اُوندے کولھ باپ تے پوتر ڈوہائیں ہِن۔ ‏10 جے کوئی تُہاڈے کولھ آوے پَر ایہہ تعلیم نہ ڈیوےتاں اُونکُوں گھر ءچ داخل نہ تھیوݨ ڈیؤ بلکہ سلام وی نہ کرو۔

‏11 کیوں جو جیہڑا کوئی ایجھے شخص کُوں سلام کریندے اوہ اُوندے بُرے کَماں ءچ شریک تھیندے۔

‏12 میکُوں لکھنڑاں تاں بہُوں کُجھ ہے پَر سیاہی نال کاغذ اُتے لکھ تے نئیں بھیجنڑا چاہندا بلکہ اُمید رکھیندا ہاں جو تُہاڈے کولھ آ تے آمنڑے سامنڑے آکھاں تاں جو ساڈی خوشی پوری تھی وَنجے۔

‏13 تیڈی بھینڑ دے فرزند جِنہاں کُوں خُدا نیں چُنڑ گِھدا ہے، تیکُوں سلام آہدھے ہِن۔