‏2 میڈے عزیز! میں ایہہ دُعا کریندا ہاں جو جِیویں تُوں رُوحانی طور تے ترقی کریندا پِیا ہئیں، اُونویں ای سارے گالھیں ءچ ترقی کریں تے تندرست رَہویں۔ ‏3 میکُوں اِیں گالھ کنُوں بہُوں خوشی تھئی جو بِھرانواں نیں آ تے تیڈے متعلق گواہی ڈِتی جو تُوں حق دے مطابق زندگی گُزریندا پئیں۔ ‏4 میڈے کیتے اِیں کنُوں وَدھ بئی کوئی خوشی نئیں، جو میں آپنڑے بالاں کُوں حق دے مطابق زندگی گُزریندے ہوئے سُنڑاں۔

‏5 اے میڈے عزیز! تُوں بِھرانواں کیتے جیہڑا کُجھ کرینداہئیں، بہُوں دیانتداری نال کریندا ہئیں، بھانویں اوہ پردیسی ہِن۔ ‏6 اُنہاں نیں کلیسیا دے سامنڑے تیڈی محبت دی گواہی ڈِتی ہئی۔جے تُوں اُنہاں کُوں خُدا دے خادم سمجھ تے اَگوں سفر کرݨ کیتے اُنہاں دی مدد کریں تاں ایہہ تُوں بہُوں چنگا کریسیں۔ ‏7 کیوں جو اوہ مسیح دے ناں دی خاطر خدمت کرݨ کیتے نِکلے وَدے ہِن۔تے غیر قوماں تُوں کُجھ نئیں گِھندے۔ ‏8 اِیں واسطے ساڈا فرض بنڑدا ہے جو اُنہاں لوکاں دی مدد کروں تاں جو حق دی خاطر اَساں وی اُنہاں دے ہم خدمت بنڑ سگوں۔

‏9 میں اُتھاں دی کلیسیا کُوں کُجھ لکھیا تاں ہا پَر دِیُتِرفِیس جیہڑا کلیسیا دا سردار بننڑ چاہندا ہے، ساکُوں قبُول نئیں کریندا۔ ‏10 جِیں وَیلے میں آساں تاں اُونکُوں اُوندیاں ایہہ حرکتاں جیہڑیاں اوہ کریندا پئے، یاد ڈیویساں جو اوہ ساڈے خلاف بُرے گالھیں آہدھے۔ تے فقط اِیہو نئیں بلکہ بِھرانواں کُوں خود وی قبول نئیں کریندا تے ڈوجھیاں کُوں جیہڑے اُنہاں کُوں قبول کرݨ چاہندے ہِن، روکیندے تے کلیسیا کنُوں کڈھ ڈیندے۔

‏11 اے میڈے عزیز! بُرائی دی نئیں بلکہ نیکی دی راہ اُتے چل۔ نیکی کرݨ آلا خُدا کنُوں ہے تے جیہڑا بُرائی کریندے، اُونیں خُدا کُوں اَصلوں نئیں پچھانڑیا۔

‏12 دِیمِیتِریُس دی سبھ نیں تے خود حق نیں وی تعریف کیتی۔ اَساں وی اِیہو گواہی ڈیندے ہئیں تے تُوں جانڑدا ہئیں جو ساڈی گواہی سچی ہے۔

‏13 میکُوں لکھنڑاں تاں بہُوں کُجھ ہا پَر سیاہی تے قلم نال تیکُوں نئیں لکھنڑاں چاہندا۔ ‏14 بلکہ میں اُمید رکھیندا ہاں جو تیڈے کولھ جلدی آتے آمنڑے سامنڑےگالھیں کریساں۔

‏15 تیکُوں اِطمینان حاصل تھیندا رَہوے۔

اِتھوں دے یکے دوست سلام آہدھے ہِن۔ تُوں اُتھوں دے ہِک ہِک دوست کُوں سلام آکھیں۔