ایہہ خط یہُوداہ کنُوں منسوب ہے جیہڑا یسوع مسیح دا بِھرا ہے تے غالباً پنجیٹھ (٦٥ ) کنُوں سَتر (٧٠) عیسوی دے درمیان لکھیا گِیا۔ یہُوداہ کُوں جیہڑے خطرہ دا سامنڑا ہا، اوہ اِیں خط دے مضمون کنُوں صاف ظاہر ہے۔کلیسیا ءچ بہُوں سارے کُوڑے اُستاد بنڑ گئے ہَن تے یہُوداہ اِنہاں کُوڑے اُستاداں دی غلط تعلیم دے بارے ءچ مسیحی اِیمانداراں کُوں خبردار کرݨ چاہندا ہے۔اِیں واسطے اُونیں ایہہ خط لکھیا۔یہُوداہ نیں اِیں خط ءچ گُزرے زمانہ دے واقعات دی مدد نال ایہہ ڈسایا ہے جو لوکاں دے گُناہ دی وجہ نال خُدا دا غضب اُنہاں اُتے نازل تھیّا ہا تے کُوڑے اُستاداں دی زندگی کیوں اِتنی گندی ہوندی ہے۔اِیں خط دے آخر ءچ اوہ مسیحیاں کُوں نصیحت کریندا ہے جو اوہ آپنڑے اِیمان اُتے قائم رَہوݨ تے اُنہاں مسائل دا مقابلہ کرݨ۔