مَشرِق تُوں آ وݨ آلےمجُوسی
2
1 جِیں وَیلے یسُوع ہیرودیس بادشاہ دے زمانہ ءچ یہُودیہ دے بیت لحم ءچ پیدا تِھیّا تے ڈیکھو مَشرِق تُوں مجُوسی یرُوشلیم ءچ ایہہ پُچھدے ہوئے آئے جو 2 یہُودیاں دا بادشاہ جیہڑا پیدا تھئے اوہ کِتھاں ہے؟ کیوں جو اَساں مَشرِق ءچ اُوندا تارا ڈیکھ تے اُوں کُوں سِجدہ کرݨ آئے ہئیں۔ 3 ایہہ سُنڑ تے ہیرودیس بادشاہ تے اُوندے نال یروشلِیم دے سبھ لوک گھبرا گئے۔ 4 تے اُونیں قوم دے سبھ سردار کاہناں تے فقیہاں کُوں کٹھا کر تے اُنہاں تُوں پُچھیا جو المسیح دی پیدائش کِتھاں ہوونڑیں چاہیدی ہے؟5 اُنہاں اُونکُوں آکھیا یہُودیہ دے بَیت لحم ءچ کیوں جو نبی دی معرفت آکھیا گیا ہےجو
6 اے بَیت لحم، یہُوداہ دے علاقے،
تُوں یہُوداہ دے حاکماں وِچُّوں ہر گز چھوٹا نئیں
کیوں جو تیڈے ءچُوں ہِک حاکم اُٹھسی
جیہڑا میڈی اُمت اِسرائیل دی گلہ بانی کریسی ۔
7 وَل ہیرودیس نیں مجُوسیاں کُوں خاموشی نال آپنڑے کولھ سَڈیا تے اُوں تارے دے ظاہر تھیوݨ دا ٹھیک وَیلہ دریافت کیتا۔ 8 تے ایہہ آکھ تے اُنہاں کُوں بَیت لحم بھیجیا جو وَنجو تے اُوں بال دا ٹھیک ٹھیک پتا کرو تے جِیں وَیلے اوہ مل وَنجے تاں میکُوں وی ڈساؤ تاں جو میں وی وَنج تے اُونکُوں سِجدہ کراں ۔
9 اوہ بادشاہ دی گالھ سُنڑ تے روانہ تھئے تے اوہ تارا جیہڑا اُنہاں کُوں مَشرِق ءچ نِظریا ہا اُنہاں دے اَگوُں اَگوُں ٹُریا، اِتُھوں تَئیں جو اُوں جاہ اُتے وَنج کھڑا تِھیّا جِتھاں اوہ بال ہا۔ 10 اوہ تارے کُوں ڈیکھ تے بہُوں خُوش تھئے۔ 11 وَل اوہ اُوں گھر ءچ داخِل تھئے تے بال کُوں اُوندی ماں مریم دے کولھ ڈیکھ تے اُوندے اَگُوں سِجدہ کیتا تے آپنڑے ڈبے کھول تے سونا تے لُبان تے مُر اُونکُوں نذر کِیتا۔ 12 تے خُدا تُوں خواب ءچ ایہہ ہدایت پا تے جو ہیرودیس دے کولھ وَلا نہ وَنجنڑ اوہ کہیں بئے رستے تُوں آپنڑے وطن دو لگے گئے۔
مِصر دا سفر
13 اُنہاں دے چلے وَنجنڑ دے بعد ڈیکھو خُداوند دا ہِک فرشتہ یُوسف کُوں خواب ءچ ڈِکھالی ڈِتا تے آکھنڑ لگا اُٹّھی ۔بال تے اُوندی ماں کُوں نال گھِن تے مِصر دو بھج وَنج تےجئیں تَئیں مَیں نہ آکھاں اُتھائیں رواہے کیوں جو ہیرودیس اِیں بال کُوں گولھ تے مارݨ چاہندے۔ 14 اوہ فوراً اُٹھی تے رات دے وَیلے بال تے اُوندی ماں کُوں گِھن تے مِصر دو روانہ تھی گیا۔ 15 تے ہیرودیس دی وفات تَئیں اُتھائیں ریہا تاں جو جیہڑی گالھ خُدا وندنیں نبی دی معرفت آکھی ہَئی اوہ پُوری تھیوے جو مَیں مِصر تُوں آپنڑے پوتر کُوں سَڈیا۔
بالاں دا قتل
16 جِیں وَیلے ہیرودیس کُوں پتا لگیا جو مجُوسیاں اُوندے نال دھوکہ کیتے تاں اُونکُوں بہُوں کاوڑلگی تے اُونیں بَیت الحم تے اُوندے چودھارُوں سپاہی بھیج تے سارے بالاں کُوں جیہڑے ڈُو سال یا اِیں تُوں چھوٹے ہَن قتل کروا ڈِتا ۔ اُوں وَیلے دے حساب نال جیہڑی اُونیں مجُوسیاں تُوں تحقیق کیتِی ہَئی۔ 17 اُوں وَیلے اوہ گالھ پُوری تھئ جیہڑی یرمیاہ نبی دی معرفت آکھی گئی ہَئی جو
18 رامہ ءچ آواز سنڑائی ڈِتّی ۔
رو وݨ تے وَڈا ماتم ۔
راخِل آپنڑے بالاں کیتے روندی پئی ہے
تے تسلی قبول نئیں کریندی
اِیں واسطے جو اوہ نئیں ۔
مِصر تُوں واپسی
19 جِیں وَیلے ہیرودیس مَر گِیا تاں خُداوند دے فرشتہ نیں مِصر ءچ یُوسف کُوں خواب ءچ ڈِکھالی ڈے تے آکھیا جو 20 اُٹّھی اِیں بال تے اِیندی ماں کُوں گِھن تے اِسرائیل دے مُلک چلیا وَنج کیوں جو جیہڑے لوک بال کُوں مارݨ چاہندے ہَن اوہ مَر گئے۔ 21 بس اوہ اُٹّھی تے بال تے اُوندی ماں کُوں گِھن تے اِسرائیل دے مُلک ءچ آ گِیا۔
22 پَر ایہہ سُنڑ تے جو اَرخلاؤس آپنڑے پِیُو ہیرودیس دی جاہ تے یہوُدیہ دا بادشاہ بنڑ گِیا ہے تاں اُتھاں وَنجنڑ تُوں ڈریا تے خواب ءچ ہدایت پا تے گلیل دے علاقے کُوں روانہ تھی گِیا ۔ 23 اُتھاں پُج تے ناصرت ناں دے شہر ءچ رَہنڑ لگا تاں جو جیہڑی گالھ نبی دی معرفت آکھی گئی ہئی اوہ پوری تھیوے جو اوہ ناصری اَ کھویسی۔