یِسُوع دی اَزمائش
4
1 وَل رُوح القُدس یسُوع کُوں بیابان ءچ گِھن گِیا تاں جو اِبلِیس تُوں اَزمایا وَنجے۔ 2 تے چالیہ ڈینہہ تے چالیہ رات فاقے دے بعد آخر اُونکُوں بُھک لگی۔ 3 تے اَزماوݨ آلے نیں کولھ آتے اُونکُوں آکھیا جے تُوں خُدا دا پوتر ہیں تاں اِنہاں پتھراں کوں آکھ جو ایہہ روٹیاں بنڑ ونجنڑ۔4 اُونیں جواب ءچ آکھیا لکھیا ہے جو اِ نسان صِرف روٹی نال ای زندہ نہ رَہسی بلکہ ہر گالھ تُوں جیہڑی خُدا دے مُنہ ءچُوں نِکلدی ہے ۔
5 وَل اِبلِیس اُونکُوں مُقدّس شہر ءچ گِھن گِیا تے ہیکل دے منارے اُتے کھڑا کر تےاُونکُوں آکھیا جو 6 جے تُوں خُدا دا پوتر ہیں تاں آپنڑے آپ کُوں تَلے سَٹ ڈے کیوں جو لکھیا ہےجو
اوہ تیڈے کِیتے آپنڑے فرشتیاں کُوں حُکم ڈیسی
تے اوہ تیکوں آپنڑے ہَتّھاں اُتے چا گِھنسن
اِیویں نہ تھیوے جو تیڈے پیراں کُوں پتھر نال ٹھیس لگے ۔
7 یسُوع اُونکُوں آکھیا ایہہ وی لکھیا ہے جو تُوں خُداوند آپنڑے خُدا دی اَزمائش نہ کر۔
8 وَل اِبلیس اُونکُوں ہِک بہُوں اُچے پہاڑ اُتے گِھن گِیا تے دُنیا دی ساریاں بادشاہیاں تے اُنہاں دی شان و شوکت اُونکُوں ڈِکھالی ۔ 9 تے اُونکُوں آکھیا جے تُوں میڈے اَگُوں جھُک تے میکُوں سِجدہ کریں تاں میں ایہہ سبھ کُجھ تیکُوں ڈے ڈیساں ۔
10 یسُوع نیں اُونکُوں آکھیا اے شیطان دُور تھی کیوں جو لکھیا ہے جو تُوں خُداوند آپنڑے خُدا کُوں سِجدہ کر تےصرف اُوندی عبادت کر ۔
11 وَل اِبلیس اُوندے کولُھوں چلا گِیا تے ڈیکھو فرشتہ آتے اُوندی خدمت کرݨ لگے ۔
یسُوع گلیل ءچ خدمت دا آغاز کریندے
12 جِیں وَیلے یسُوع نیں ایہہ سُنڑیا جو یُوحنّا پکڑوا ڈِتا گِیا تاں اوہ گلیل دے علاقے دو وَل گِیا ۔ 13 تے ناصرت کُو ں چھوڑ تے کفرنحُوم ءچ رَہنڑ لگا، جیہڑا جھیل دے کِنارے زبُولُون تے نفتالی دی سرحد اُتے ہے ۔ 14 تاں جو جیہڑا یسعیاہ نبی دی معرفت آکھیا گِیا ہا اوہ پورا تھیوے جو
15 زبُولُون دا علاقہ تے نفتالی دا علاقہ
دریا د ی راہ یَردن دے پار
غیرقوماں دی گلیل ۔
16 یعنی جیہڑے لوک اندھارے ءچ زندگی گزریندے پئے ہَن
اُنہاں وَڈی روشنی ڈِٹھی
تے جیہڑے موت دےمُلک تے سایہ ءچ بیٹھے ہَن
اُنہاں اُتے نُور چمکیا ۔
17 اُوں وَیلے تُوں یسُوع نیں منادی کرݨتے ایہہ آکھنڑشروع کیتا ، تَوبہ کرو کیوں جو اَسمان دی بادشاہی نیڑے آگئی ہے۔
یسُوع دا مچھیریاں کُوں چُنڑنا ں
18 تے اُونیں گلیل دی جھیل دے کِنارے اُتے ٹُردے ہوئے ڈو بِھراواں شمعُون جیہڑا پطرس اَکھویندا ہا تے اُوندے بِھرا اندریاس کُوں جھیل ءچ جال سَٹیندے ڈِٹھا کیوں جو اوہ مچھیرے ہَن ۔ 19 تے اُنہاں کُوں آکھیا میڈے پچُھوں آؤ تے میں تُہاکوں آدم گیر بنڑیساں ۔ 20 اوہ فوراً آپنڑے جال چھوڑ تے اُوندے پچُّھوں تھی پئے ۔
21 تے اُتھوں اَگھّاں وَدھ تے اُونیں بئے ڈو بِھرا یعقوب تے یُوحنّا ڈِٹھے جیہڑے زبدی دے پوتر ہَن تے کشتی ءچ آپنڑے پِیُو نال آپنڑے جالاں دی مُرمّت کریندے پئے ہَن تے اُنہاں کُوں سَڈیا ۔ 22 اوہ فوراً کشتی تےآپنڑے پِیُو کُوں چھوڑ تے اُوندے پِچُّھوں ٹُر پئے ۔
یسُوع تعلیم تے شِفا ڈیندے
23 تے یسُوع سارے گلیل ءچ پھردا ریہا تے اُنہاں دے عبادت خانیاںءچ تعلیم ڈیندا تے بادشاہی دی خُوش خبری سُنڑیندا ریہا تے لوکاں دی ہرطرحاں دی بیماری تے کمزوری کُوں دُور کریندا ریہا۔ 24 تے اُوندی شُہرت سارے سُوریہ ءچ تھی گئی تے لوک سبھ بِیماراں کُوں جیہڑے طرحاں طرحاں دی بیماریاں تے تکلیفاں دے وِکھیڑ ے ءچ ہَن تے جیہڑے مِرگی دے مریض ہَن تے مُفلوج ہَن تے جنہاں ءچ بد رُوحاں ہَن یسُوع دے کولھ گِھن آئے تے اُونیں اُنہاں کُوں شِفا ڈِتّی ۔ 25 تے گلیل تے دکُپُلس تے یروشلِیم تے یہُودیہ تے یردن دے پار تُوں وَڈی بِھیڑ اُوندے پچُّھوں تھی پئی ۔