‏3 مُبارک ہِن اوہ جیہڑے دل دے غریب ہِن

کیوں جو اَسمان دی بادشاہی اُنہئیں دی ہے۔

‏4 مُبارک ہِن اوہ جیہڑے ڈُکھی ہِن

کیوں جو اوہ تسلی پے سن ۔

‏5 مُبارک ہِن اوہ جیہڑے حلیم ہِن

کیوں جو اوہ زمین دے وارِث ہوسن ۔

‏6 مُبارک ہِن اوہ جیہڑے راستبازی دے بُھکے تے پیاسے ہِن

کیوں جو اوہ رَج سن ۔

‏7 مُبارک ہِن اوہ جیہڑے رحم دِل ہِن

کیوں جو اُنہاں اُتّے رحم کیتا ویسی۔

‏8 مُبارک ہِن اوہ جیہڑے پاک دِل ہِن

کیوں جو اوہ خُدا کُوں ڈیکھ سن ۔

‏9 مُبارک ہِن اوہ جیہڑے صُلح کرویندے ہِن

کیوں جو اوہ خُدا دے پوتر اَکھویسن ۔

‏10 مُبارک ہِن اوہ جیہڑے راستبازی دے سببّوں ستائے گئے ہِن

کیوں جو اَسمان دی بادشاہی اُنہئیں دی ہے۔

‏11 مُبارک ہو سو تُساں جِیں وَیلے لوک تُہاکُوں میڈی وجہ تُوں لعن طعن کریسن تے طرحاں طرحاں دِیاں بُریاں گالھیں تُہاڈے بارےءچ نا حق اَکھیسن ۔ ‏12 خُوش تِھوائے تے جشن منائے کیوں جو اَسمان اُتے تُہاڈا اَجر وَڈا ہے اِیں کیتے جو لوکاں نیں تُہاڈے تُوں پہلے نبیاں کُوں وی اِیویں ای ستایا ہا۔

‏13 تُساں زمین دے نمک ہِوے پر جے نمک دا مزہ ویندا رہوے تاں اوہ کیہڑی چیز نال نمکین کیتا ویسی؟ وَل اوہ کہیں کَم دا نئیں سِوائے اِیندے جو باہر سَٹ ڈِتا وَنجے تے لوکاں دے پیراں تَلے لتاڑیا وَنجے۔

‏14 تُساں دنیا دا نُور ہِوے۔ جیہڑا شہر پہاڑ اُتے وَسیا ہے اوہ لُک نئیں سگدا۔ ‏15 تے ڈِیوا بال تے تھاں دے تَلے نئیں بلکہ ڈیواٹ اُتے رکھیندے ہِن تاں اُوندے تُوں گھر دے ساریاں لوکاں کُوں روشنی پُجدی ہے ۔ ‏16 اِیں طرحاں تُہاڈی روشنی لوکاں دے سامنڑے چمکے تاں جو اوہ تُہاڈے نیک کماں کُوں ڈیکھ تے تُہاڈے اَسمانی باپ دی تمجید کرݨ ۔

‏17 ایہہ نہ سمجھو جو میں تَورَیت یا نبیاں دی کتاباں کُوں منسُوخ کرݨ آیا ہاں ۔ منسُوخ کرݨ نئیں بلکہ پورا کرݨ آیا ہاں ۔ ‏18 کیوں جو مَیں تُہاکوں سچ آہدھا ہاں جو جِیں وَیلے تئیں اَسمان تے زمین ٹَل نہ وَنجنڑ ہک نقطہ یا ہِک شوشہ تَورَیت ءچوں ہر گز نہ ٹَل سی جئیں تئیں سبھ کُجھ پورا نہ تھی وَنجے ۔ ‏19 بس جیہڑا کوئی اِنہاں چھوٹے تُوں چھوٹے حُکمَاں ءچوں کہیں کُوں توڑیسی تے ڈوجھیاں کُوں وی اِیویں کرݨ سکھیسی اوہ اَسمان دی بادشاہی ءچ سبھ تُوں چھوٹا اَکھویسی پَر جیہڑا اُنہاں اُتے عمل کریسی تے اُنہاں دی تعلیم ڈیسی اوہ اَسمان دی بادشاہی ءچ وَڈا اکھویسی ۔ ‏20 کیوں جو میں تُہاکوں سچ آہدھا ہاں جو جے تُہاڈی راستبازی فقیہاں تے فریسیاں دی راستبازی تُوں زیادہ نہ ہو سی تاں تُساں اَسمان دی بادشاہی ءچ اَصلُوں نہ وَنج سگسو۔

‏21 تُساں سُنڑ گِھداہے جو پُرانڑے زمانے دے لوکاں کُوں آکھیا گِیا ہا جو خون نہ کرائے تے جیہڑا خون کریسی اوہ عدالت دی سزا دے لائق ہوسی۔ ‏22 پَر میں تُہاکُوں ایہہ آہدھا ہاں جو جیہڑا آپنڑے بِھرا اُتے کَوڑِیندے اوہ عدالت دی سزا دے لائق ہوسی تے جیہڑا آپنڑے بِھرا کُوں پاگل اَکھیسی اوہ وَڈی عدالت دی سزا دے لائق ہوسی تے جیہڑا اُونکُوں احمق اَکھیسی اوہ دوزخ دی بھاہ دا سزا وار ہوسی ۔ ‏23 بس جے قُربان گاہ اُتے نذر چڑھیندے وَ یلے تیکُوں یاد آوے جو تیڈے بِھرا کُوں تَیں تُوں شکایت ہے ۔ ‏24 تاں تُوں آپنڑیں نذر اُتھائیں قربان گاہ دے اَگُوں چھوڑ ڈے تے وَنج تے آپنڑے بِھرا نال صُلح کر گِھن وَل آتے آپنڑیں نذر چڑھا ۔

‏25 جِیں وَیلے تئیں تُوں آپنڑے مدعی نال راہ ءچ ہِیں تُوں اُوندے نال جَلدی صُلح کر گِھن، کِتھائیں اِیویں نہ تھیوے جو اوہ تیکُوں مُنصف دے حوالے کر ڈیوے تے مُنصف تیکُوں سپاہی دے حوالے کر ڈیوے تے تُوں قید خانے ءچ سَٹ ڈِتا وَنجیں ۔ ‏26 مَیں تیکُوں سچ آہدھا ہاں ں جو تُوں جئیں تَئیں پائی پائی ادا نہ کر ڈیویں اُتھوں کُنوں ہرگز نہ چُھٹسیں۔

‏27 تُساں سُنڑگِھدا ہے جو آکھیا گِیا ہا جو زِنا نہ کرا ئے ۔ ‏28 پَر مَیں تُہاکُوں ایہہ آہدھا ہاں جو جئیں کہیں عورت کُوں بُری نگاہ نال ڈِٹھا تاں اُونیں آپنڑے دل ءچ اُوندے نال زِنا کر گِھدا ۔ ‏29 بس جے تیڈی سَجی اَکھ تیڈے گناہ دی وجہ بنڑدی ہے تاں اُونکُوں کَڈھ تے سَٹ ڈے کیوں جو تیڈے کِیتے اِیہو چنگا ہے جو تیڈے اَنگاں ءچوں ہِک اَنگ وَیندا رَہوے بجائے اِیندے جو تیڈا سارا بدن دوزخ ءچ سَٹ ڈِتا وَنجے ۔ ‏30 تے جےتیڈا سَجا ہَتھ تیڈےگناہ دی وجہ بنڑدا ہے تاں اُونکُوں کَپ تے سَٹ ڈے کیوں جو تیڈے کِیتے اِیہو چنگا ہے جو تیڈے سارے اَنگاں ءچوں ہِک اَنگ وَیندا رَہوےبجائے ایندے جو تیڈا سارا بدن دوزخءچ سَٹ ڈِتا وَنجے ۔

‏31 ایہہ وی آکھیا گِیا ہا جو جیہڑا کوئی آپنڑیں ذال کُوں چھوڑے تاں اُونکُوں طلاق لکھ ڈیوے ۔ ‏32 پَر میں تُہاکُوں ایہہ آہدھا ہاں جو جیہڑا کوئی آپنڑیں ذال کُوں بدکاری دے سِوا کہیں بئی وَجہ کُنوں طلاق ڈیندےاوہ اُوندے تُوں زِنا کرویندے تے جیہڑا کوئی اُوں طلاق شدہ عورت نال شادی کریندے اوہ زِنا کریندے۔

‏33 وَل تُساں سُنڑ چُکے ہِوے جو پُرانڑے زمانے دے لوکاں کُوں آکھیا گِیا ہا جو کوئی کُوڑی قسم نہ چاوے بلکہ آپنڑیاں قَسماں خُداوند کِیتے پوریاں کرائے ۔ ‏34 پَر مَیں تُہاکُوں ایہہ آہدھا ہاں جو اَصلُوں قَسم نہ چوائے ۔ نہ اَسمان دی کیوں جو اوہ خُدا دا تخت ہے۔ ‏35 نہ زمین دی کیوں جو اوہ اُوندے پیراں دی چوکی ہے ۔ نہ یرُوشلیم دی کیوں جو اوہ وَڈے بادشاہ دا شہر ہے ۔ ‏36 نہ آپنڑے سِر دی قسم چوائے کیوں جو تُوں آپنڑے ہِک وال کُوں وی چِٹا یا کالا نئیں کر سگدا ۔ ‏37 اِیں واسطے ہاں دی جاہ ہاں تے نہ دی جاہ نہ آکھو کیوں جو جیہڑا اِیں کُنوں زیادہ ہے اوہ بُرائی تُوں ہے۔

‏38 تُساں سُنڑ چُکے ہِوے جو آکھیا گِیا ہا جو اَکھ دے بدلے اَکھ تے ڈَند دے بدلے ڈَند ^a۔ ‏39 پَر میں تُہاکُوں ایہہ آہدھا ہاں جو شریر دا مقابلہ نہ کرائے بلکہ جیہڑا کوئی تیڈی سَجّی گَلھ اُتے چاٹ مارے تاں ڈوجھی وی اُوندے پاسُوں پھیر ڈے ۔ ‏40 جے کوئی تَیں اُتے دعویٰ کر تے تیڈا چولا گِھننڑ چاہوے تاں چوغہ وی اُوندے حوالے کر ڈے ۔ ‏41 تے جے کوئی تیکوں وِنگار ءچ ہِک مِیل گھِن وَنجنڑ چاہوے تاں اُوندے نال ڈو میل لگا وَنج ۔ ‏42 جیہڑا کوئی تَیں تُوں منگے اُونکُوں ڈے تے جیہڑا تَیں تُوں قرض گِھننڑ چاہوے اُونکُوں اِنکار نہ کر ۔

‏43 تُساں سُنڑ چکے ہِوے جو آکھیا گیا ہا جو آپنڑے ہمسائے نال محبت^bرکھ تے دشمنڑ نال ویر ۔ ‏44 پَر میں تُہاکُوں ایہہ آہدھا ہاں جو آپنڑے دشمنڑاں نال محبت رکھو تے جیہڑے تُہاکُوں سَتیندے ہِن اُنہاں کِیتے دُعا کر و۔ ‏45 تاں وَل تُساں آپنڑے اَسمانی باپ دے فرزند بنڑ سو کیوں جو اوہ آپنڑے سُورج کُوں نیکاں تے بَداں ڈوہائیں اُتے چمکیندے تے راستبازاں تے گناہگاراں ڈوہائیں اُتے مینہ وسیندے ۔ ‏46 کیوں جو جے تُساں صِرف اُنہاں نال محبت رکھیندے ہِوے جیہڑے تُہاڈے نال محبت رکھیندے ہِن تاں تُہاکُوں کیا اَجر مِلسی ؟ کیا محصُول گِھننڑ آلے وی ایویں نئیں کریندے ؟ ‏47 تے جے تُساں صِرف آپنڑے ای بِھراواں کُوں سلام کرو تاں کیا زیادہ کریندے ہِوے ؟ کیا غیرقوماں دے لوک وی ایویں نئیں کریندے؟ ‏48 بس تُساں کامل بنڑو جیویں تُہاڈا اَسمانی باپ کامل ہے۔