خَیرات دے بارے ءچ تعلیم
6
1 خبر دار، آپنڑے راستبازی دے کَم لوکاں کُوں ڈِکھاوݨ کِیتے نہ کرو کیوں جو تُہاڈا اَسمانی باپ تُہاکُوں کوئی اَجر نہ ڈیسی ۔2 بس جِیں وَیلے تُوں خیرات کریں تاں آپنڑے اَگُوں ڈھنڈور ا نہ پِٹوا جیویں منافق عبادت خانیاں تے گلیاں ءچ کریندےہِن تاں جو لوک اُنہاں دی تعریف کرݨ ۔ میں تُہاکُوں سچ آہدھا ہاں جو اوہ آپنڑا ا َجر پاچُکے ۔ 3 بلکہ جِیں وَیلے تُوں خیرات کریں تاں جیہڑا کُجھ تُوں آپنڑے سَجے ہَتھ نال ڈیویں اُوندا تیڈے کھبے ہَتھ کُوں پتا نہ لگے۔ 4 تاں جو تیڈی خیرات پوشیدہ رَہوے ۔ وَل تیڈا باپ جیہڑا پوشیدگی ءچ ڈیدھے، تیکوں اَجر ڈیسی ۔
دُعا دے بارے ءچ تعلیم
5 تے جِیں وَیلے تُساں دُعا کرو تاں منافقاں وانگوں نہ بنڑو کیوں جو اوہ عبادت خانیاں تے بازاراں دے چوکاں اُتے کھڑے تھی تے دُعا کرݨ پسند کریندین تاں جو لوک اُنہاں کُوں ڈیکھنڑ ۔ میں تُہاکُوں سچ آہدھا ہاں جو اوہ آپنڑا اَجر پا چُکے ۔ 6 بلکہ جِیں وَیلے تُوں دُعا کریں تاں آپنڑیں کوٹھڑی ءچ وَنج تے دروازہ بند کر تے آپنڑے اَسمانی باپ کُنوں جیہڑا پوشیدگی ءچ ڈیدھے دعا کر ۔ وَل تیڈا باپ جیہڑا پوشیدگی ءچ ڈیدھے تیکوں اَجر ڈیسی ۔
7 تے دُعاکریندے وَیلے غیرقوماں وانگوں رَٹے ہوئے لفظ دُہریندے نہ رَہو کیوں جو اوہ سمجھدِن جو اُنہاں دے بہُوں بولنڑ دی وجہ کُنوں اُنہاں دی سُنڑی ویسی ۔ 8 بس اُنہاں دے وانگوں نہ بنڑو کیوں جو تُہاڈا اَسمانی باپ تُہاڈے منگنڑ تُوں وی پہلے تُہاڈی ضرورتاں تُوں واقف ہے ۔ 9 بس تُساں اِیں طرحاں دُعا کیتا کرو جو
اے ساڈے باپ تُوں جیہڑا اَسمان اُتے ہیں
تیڈا ناں پاک منیا ں وَنجے ۔
10 تیڈی بادشاہی آوے
تے تیڈی مرضی جیویں اَسمان اُتے پُوری تھیندی ہے
زمین اُتے وی تھیوے ۔
11 ساڈی روز دی روٹی اَج ساکُوں ڈے ۔
12 تے جیویں اَساں آپنڑے قصُور واراں کُوں معاف کِیتے
تُوں وی ساڈے قصُور ساکُوں معاف کر ۔
13 تے ساکُوں اَزمائش ءچ نہ پا
بلکہ بُرائی تُوں بچا (کیوں جو بادشاہی تے قدرت
تے جلال ہمیشاں تیڈے ای ہِن ۔آمین)۔
14 جے تُساں لوکاں دے قصُور معاف کریسو تاں تُہاڈا اَسمانی باپ وی تُہاکُوں معاف کریسی ۔ 15 جے تُساں لوکاں دے قصُور معاف نہ کریسو تاں تُہاڈا اَسمانی باپ وی تُہاکُوں معاف نہ کریسی ۔
روزہ دے بارے ءچ تعلیم
16 جِیں وَیلے تُساں روزہ رکھو تاں منافقاں آلی کار آپنڑا مُنہ اُداس نہ بنڑاؤ کیوں جو اوہ آپنڑا ں مُنہ وَگڑیندے ہِن تاں جو لوکاں کُوں پتا چلے جو اوہ روزے نال ہِن ۔ میں تُہاکُوں سچ آہدھا ہاں جواوہ آپنڑاں اَجر پا چُکے ۔ 17 بلکہ جِیں وَیلے تُوں روزہ رکھیں تاں آپنڑاں مُنہ دھو تے آپنڑیں سِر ءچ تیل سَٹ 18 تاں جو آدمی نئیں بلکہ تیڈا اَسمانی باپ جیہڑا پوشیدگی ءچ ہے تیکُوں روزہ دار جانڑے ۔ اِیں صورت ءچ تیڈا باپ جیہڑا پوشیدگی ءچ ڈیدھے تیکوں اَجر ڈیسی ۔
اَسمان اُتے خزانہ
19 آپنڑے کیتے زمین اُتے مال جمع نہ کر و جِتھاں کیڑا تے زنگ لگ ویندے تے چور سَندھ مار تے چوری کر گھندے ۔ 20 بلکہ آپنڑے کیتے اَسمان اُتے خزانہ جمع کرو جِتھاں کیڑا تے زنگ خراب نئیں کریندا تے نہ چور سَندھ مار تے چوری کریندے ہِن ۔ 21 کیوں جو جتھاں تیڈا مال ہے اُتھائیں تیڈا دل وی لگا رَہسی ۔
بدن داچراغ
22 بدن دا چراغ اَکھ ہے ۔بس جے تیڈی اَکھ ٹھیک ہے تاں تیڈا سارا بدن روشن ہوسی ۔ 23 تے جے تیڈی اَکھ خراب ہے تاں تیڈا سارا بدن تاریک ہوسی ۔ بس جے تیڈے اندر دی روشنی ای اندھارا بنڑ وَنجے تاں اندھارا کتنا زیادہ ہوسی !
خُدا تے دولت
24 کوئی آدمی ڈو مالکاں دی خدمت نئیں کر سگدا کیوں جویا اوہ ہِک نال دشمنڑی رکھیسی تے ڈوجھے نال پیار یا ہِک دا بنڑ تے رَہسی تے ڈوجھے کُوں حقیر جاݨ سی ۔ تُساں خُدا تے دولت ڈوہائیں دی خدمت نئیں کر سگدے ۔
فِکر
25 اِیہو وجہ ہے جو میں تُہاکُوں آہدھا ہاں جو نہ تاں آپنڑیں جان دی فکر کرو جو کیا کھا سُوں یا کیا پی سُوں ، نہ آپنڑے تَن دی جو کیا پیسُوں ؟ کیا جان کھاونڑ تُوں تے تَن پُشاک کنُوں زیادہ اہم نئیں ؟ 26 ہوا دے پکھیں کُوں ڈیکھو جیہڑے نہ رَہیندن نہ کٹیندن نہ گوداماں ءچ جمع کریندن وَل وی تُہاڈا اَسمانی باپ اُنہاں دی پَرورش کریندے ۔ کیا تُہاڈی قَدر اُنہاں کُنوں زیادہ نئیں ؟ 27 تُساں ءچوں ایجھا کوݨ ہے جیہڑا فکر کر تے آپنڑیں زندگی دا ہِک لاحظہ وی وَدھا سگے ؟
28 تے پُشاک کیتے کیوں فکر کریندے ہِوے ؟ جنگلی سوسن کُوں ڈیکھو جو اوہ کِیویں وَدھدن ۔ نہ اوہ محنت کریندن نہ کَپیندن ۔ 29 وَل وی میں تُہاکُوں آہدھا ہاں جو سُلیمان وی آپنڑیں ساری شان و شوکت دے با وَجود اُنہاں ءچوں کہیں دے وانگوں مُلبّس نہ ہا ۔ 30 بس جِیں وَیلے خُدا میدان دی گھاہ کُوں جیہڑی اَج ہے تے کل تنور ءچ سَٹ ڈِتی ویسی ایجھی پُشاک عطا کریندے تاں اَے کم اعتقادو ! کیا تُہاکُوں نہ پویسی؟
31 اِیں واسطے فکر کر تے ایہہ نہ آکھو جو اَساں کیا کھاسُوں یا کیا پی سُوں یا کیا پے سُوں ؟ 32 کیوں جو اِنہاں ساریاں چیزاں دی تلاش ءچ تاں غیرقوماں رَہندیاں ہِن تے تُہاڈا اَسمانی باپ جانڑدے جو تُساں اِنہاں سبھ چیزاں دے مُتھاج ہِوے ۔ 33 پَر پہلے تُساں اُوندی بادشاہی تے راستبازی دی تَلاش کرو تاں ایہہ سبھ چیزاں وی تُہاکُوں مِل ویسن ۔ 34 بس کل دی فکر نہ کروکیوں جو کل دا ڈینہہ آپنڑیں فکر آپ ای کر گِھن سی ۔ اَج کیتے اَج ای دا ڈُکھ کافی ہے ۔