ڈوجھیاں دی عدالت
7
1 عدالت نہ کرو تُہاڈی وی عدالت نہ کیتی ویسی ۔ 2 کیوں جو جیویں تُساں عدالت کریندے ہِوے اُونویں ای تُہاڈی وی عدالت کیتی ویسی تے جیہڑے پیمانے نال تُساں نپیندے ہِوے اُوں وَیلے ای دے نال تُہاڈے کیتے ناپیا ویسی ۔ 3 تُوں آپنڑے بِھرا دی اَکھ ءچ ککھ کیوں ڈیدھیں تے آپنڑیں اَکھ دے شَتیر اُتے غور نئیں کریندا ؟ 4 تے جِیں وَیلے تیڈی آپنڑیں اَکھ وِ چ شتیر ہے تاں تُوں کیہڑے مُنہ نال آپنڑے بِھرا کُوں آکھ سگدیں جو آ میں تیڈی اَکھ ءچوں ککھ کَڈھ ڈیواں ؟ 5 اے منافق پہلے آپنڑیں اکھ دا شتیر تاں کڈھ گِھن وَلا آپنڑے بِھرا دے ککھ کُوں چنگی طرحاں ڈیکھ تے کڈھ سگسیں ۔6 پاک چیز کُتیاں کُوں نہ ڈیؤ تے آپنڑے موتی سُوراں دے اَگُوں نہ سَٹو ۔ اِیویں نہ تھیوے جو اوہ اُنہاں کُوں پیراں تَلے لتاڑن تے مُڑ تے تُہا کُوں پھاڑ سَٹین ۔
مَنگو ، گولھو ، کھڑکاؤ
7 منگسو تاں تُہاکُوں ڈِتا ویسی ۔ گولھیسو تاں حاصل کر گِھن سو ۔ دروازہ کھڑکیسو تاں تُہاڈے کیتے کھول ڈِتا ویسی ۔ 8 کیوں جو جیہڑا کوئی منگدے اُونکُوں مِلدے ، جیہڑا گولھیندے اوہ پیندے تے جیہڑا کوئی کھڑکیندے اُوندے کیتے کھولیا ویسی ۔ 9 تُہاڈے ءچوں ایجھا کیہڑا آدمی ہے جئیں تُوں اُوندا پوتر روٹی منگے تاں اوہ اُونکُوں پتھر ڈیوے ۔ 10 یا جے مچھی منگے تاں اُونکُوں ناگ ڈیوے ؟ 11 جے تُساں بُرے ہووݨ دے باوجود آپنڑے بالاں کُوں چنگیاں چیزاں ڈیوݨ جانڑدے ہِوے تاں تُہاڈا اَسمانی باپ جیہڑے اُوندے کنُوں منگدے ہِن چنگیاں چیزاں کیوں نہ ڈیسی ؟
12 بس جیویں تُساں چاہندے ہِوے جو لوک تُہاڈے نال کرݨ تُساں وی اُنہاں دے نال اِیویں ای کرو کیوں جو تَورَیت تے نبیاں دی تعلیم اِیہو ہے ۔
تنگ دروازہ
13 تنگ دروازے کنُوں داخل تھیؤ کیوں جو اوہ دروازہ وَڈا تے اوہ رستہ کُھلا ہے جیہڑا تباہی دے پاسے گِھن ویندے تے اُوندے ءچوں داخل تھیوݨ آلے بہُوں ہِن ۔ 14 کیوں جو اوہ دروازہ تنگ ہے تے اوہ رستہ سُکڑا ہے جیہڑا زندگی اَل گِھن ویندے تے اُوں تُوں داخل تھیوݨ آلے تھوڑے ہِن ۔
درخت تے اُوندا پھل
15 کُوڑے نبیاں تُوں خبردار رواہے جیہڑے تُہاڈے کولھ بھیڈاں دے بھیس ءچ آندن پَر اَندر تُوں پھاڑن آلے بھیڈیئے ہِن ۔ 16 تُساں اُنہاں دے پھلاں تُوں اُنہاں کُوں سنجاݨ گِھن سو ۔ کیا لوک جھاڑیاں تُوں انگور یا کنڈے دےجھاڑیاں تُوں ہنجیر تَروڑ سگدن ؟ 17 اِیویں ای ہر چنگا درخت چنگا پھل تے ہر بُرا درخت بُرا پھل ڈیندے ۔ 18 چنگے درخت کُوں بُرا پھل نئیں لگ سگدا تے نہ ای بُرے درخت کُوں چنگا پھل لگ سگدے ۔ 19 اوہ درخت جیہڑا چنگا پھل نئیں ڈیندا کَپ ڈِتا تے بھاہ ءچ سَٹ ڈِتا ویندے ۔ 20 بس تُساں اُنہاں کُوں اُنہاں دے پھلاں تُوں سُنجاݨ گِھن سو ۔
میں تُہاکُوں نئیں جانڑدا
21 میکُوں اےخُداوند اے خُداوند آکھنڑ آلا ہر شخص اَسمان دی بادشاہی ءچ داخل نہ تھیسی پَر اُوہو جیہڑا میڈے اَسمانی باپ دی مرضی اُتے چلدا ہے ۔ 22 اُوں ڈینہہ بہُوں سارے میکُوں اَکھیسن اے خُداوند اے خُداوند! کیا اَساں تیڈے ناں ءچ نبوت نئیں کیتی تے تیڈے ناں ءچ بدرُوحاں نئیں کڈھیاں تے تیڈے ناں ءچ بہُوں سارے معجزے نئیں کیتے ؟ 23 اُوں وَیلے میں اُنہاں کُوں صاف آکھ ڈیساں جو میڈی کڈھائیں تُہاڈے نال واقفیت نہ ہئی ۔ اے بدکارو میڈے سامنڑے تُوں دُور تھی ونجو ۔
ڈو گھر بناوݨ آلے
24 اِیں واسطے جیہڑا کوئی میڈی ایہہ گالھیں سُنڑدے تے اُنہاں اُتے عمل کریندے اوہ اُوں عقلمند آدمی وانگوں ہوسی جئیں آپنڑاں گھر چٹان اُتے بنڑایا ۔ 25 تے بارش تھئی تے سیلاب آیا تے اندھاریاں چلیاں تے اُوں گھر کُوں ٹکراں ماریاں پر اوہ نہ ڈھٹھا کیوں جو اُوندی بنیاد چٹان اُتے رکھی گئی ہئی ۔
26 تے جیہڑا کوئی میڈے ایہہ گالھیں سُنڑدے تے اُنہاں اُتے عمل نئیں کریندا اوہ اُوں بیوقوف آدمی وانگوں ہوسی جئیں آپنڑاں گھر ریت اُتے بنڑایا ۔ 27 تے بارش تھئی تے سیلاب آیا تے اندھاریاں چلیاں تے اُوں گھر کُوں ٹکراں ماریاں تے اوہ ڈھے پیا تے اَصلوں برباد تھی گیِا ۔
یسوع دا اِختیار