یسُوع ہِک آدمی کُوں شِفا ڈیندے
8
1 جِیں وَیلے اوہ اُوں پہاڑ تُوں تلے لَتھا تاں ہِک بہُوں وَڈی بِھیڑ اُوندے پِچُھوں تھی پئی ۔ 2 تے ڈیکھو ہِک کوڑھی اُوندے کولھ آتے اُونکُوں سِجدہ کیتا تے آکھیا اے خُداوند جے تُوں چاہویں تاں میکُوں پاک صاف کر سگدیں ۔ 3 اُونیں ہَتھ وَدھا تے اُونکُوں ہَتھ لایا تے آکھیا میں چاہندا ہاں تُوں پاک صاف تھی وَنج ۔ اوہ فوراً کوڑھ تُوں پاک صاف تھی گِیا ۔ 4 یسُوع اُونکُوں آکھیا خبر دار، کہیں کُوں نہ ڈسیں بلکہ آپنڑاں آپ کاہِن کُوں ڈِکھا تے جیہڑی نذر مُوسیٰ مقرّر کیتی ہے اوہ چڑھا تاں جو اُنہاں کیتے گواہی ہووے ۔یسُوع ہِک رُومی صوبیدار دے نوکر کُوں شِفا ڈیندے
5 تے جِیں وَیلے یسُوع کفرنحُوم شہر ءچ داخل تھِیّا تاں ہِک صوبیدار اُوندے کولھ آیا تے مِنت کر تے آکھنڑ لگا ۔ 6 اے خُداوند میڈا نوکر فالج دا ماریا گھر ءچ پِیا ہے تے بہُوں تکلیف ءچ ہے ۔
7 یسُوع اُونکُوں آکھیا میں آتے اُونکُوں شِفا ڈیساں ۔
8 صوبیدار جواب ءچ آکھیا اے خُداوند میں اِیں لائق نئیں جو تُوں میڈی چَھت تلَے آنویں بلکہ تُوں صرف آکھ ڈے تاں میڈا نوکر شِفا پا ویسی ۔ 9 کیوں جو میں خود وی کہیں بئے دے اِختیار ءچ ہاں تے سپاہی میڈےماتحت ہِن تے جیہڑے وَیلے میں ہِک کُوں آہدھا ہاں جو وَنج تاں اوہ ویندے تے ڈوجھے کُوں جو آ تاں اوہ آندے تے آپنڑے نوکر کُوں جو ایہہ کر تاں اوہ کریندے ۔
10 یسُوع ایہہ سُنڑ تے حیران تِھیّا تے اوہ آپنڑے پچُھوں آوݨ آلیاں کُوں آکھنڑ لگا جو میں تُہاکُوں سچ آہدھا ہاں جو میں اِسرائیل ءچ وی ایجھا اِیمان نئیں ڈِٹھا ۔ 11 تے میں تُہاکُوں آہدھا ہاں جو بہُوں سارے لوک مَشرِق تے مغرب تُوں آتے ابرہام تے اِضحاق تے یعقوب دے نال اَسمان دی بادشاہی دی ضیافت ءچ شریک تھیسن ۔ 12 پَر بادشاہی دے پوتر باہر اندھارے ءچ سَٹ ڈتے ویسن جتھاں رووݨ تے ڈَنداں دا پیہوݨ ہو سی ۔
13 تے یسُوع صوبیدار کُوں آکھیا وَنج جیویں تیڈا اِیمان ہے تیڈے کیتے اونویں ای تھیوے، تے اُوں وَیلے ای نوکر شِفا پائی ۔
یسُوع بہُوں لوکاں کُوں شِفا ڈیندے
14 تے یسُوع نیں پطرس دے گھر ءچ آتے اُوندی سَس کُوں بخار ءچ پئی ڈِٹھا ۔ 15 اُونیں اُوندا ہَتھ پکڑیا تے اُوندا بخار لہہ گِیا تے اوہ اُٹھی تے اُوندی خدمت کرݨ لگی ۔
16 جِیں وَیلے شام تھئی تاں بہُوں لوکاں کُوں جنہاں ءچ بدرُوحاں ہَن اُوندے کولھ گِھن آئے ۔ اُونیں بدرُوحاں کُوں زبان نال ای آکھ تے کڈھ ڈِتا تے سبھ بیماراں کُوں چنگا کر ڈِتّا۔ 17 تاں جو جیہڑا یسعیاہ نبی دی معرفت آکھیا گیا ہا اوہ پورا تھیوے جو اُوں آپ ای ساڈیاں کمزوریاں گِھن گِھدیاں تے بیماریاں چا گھدیاں ۔
یسُوع دی پیروی کرݨ د ے خواہشمند لوک
18 جِیں وَیلے یسُوع آپنڑے چودھارُوں بِھیڑ ڈِٹھی تاں جھیل دے پارُوں وَنجنڑ دا حکم ڈِتا۔ 19 تے ہِک فقیہہ نیں اُوندے کولھ آتے آکھیا اے اُستاد جِتھاں تُوں ویسیں میں تیڈے پچُھوں آساں ۔
20 یسُوع اُونکُوں آکھیا لومڑیاں دیاں کھُڈاں ہوندن تے ہوا دے پَکھیاں دے آلھنڑے پَر ابن ِآدم کیتے کوئی جاہ کائنیں جِتھاں اوہ آپنڑاں سِر وی رکھ سگے ۔
21 ہِک بئے شاگرد نیں اُونکُوں آکھیا اے خُداوند میکُوں اِجازت ڈے جو پہلے وَنج تے آپنڑے پِیوُ کُوں دفن کراں ۔
22 یسُوع نیں اُونکُوں آکھیا تُوں میڈے پچھُوں ٹُر تے مُردیاں کُوں آپنڑے مُردے دفن کرݨ ڈے ۔
یسُوع طوفان کُوں روک ڈیندے
23 جِیں وَیلے اوہ کشتی ءچ سوار تِھیّا تاں اُوندے شاگرد اُوندے نال تھی پئے ۔ 24 تے ڈیکھو جھیل ءچ ایجھا زبردست طوفان اُٹھیا جو کشتی چھلاں ءچ لُک گئی پَر یسوع سُتا پیا ہا ۔ 25 شاگرداں کولھ آتے اُونکُوں جگایا تے آکھیا اے خُداوند ساکُوں بچا ! اَساں ہلاک تھیندے پئے ہئیں ۔
26 اُونیں اُنہاں کُوں آکھیا اے کم اعتقادو ! تُساں کیوں ڈر دے ہِوے ؟ وَل اُونیں اُٹھی تے ہوا تے پانڑیں کُوں دَڑکا ڈِتا تے وَڈا اَمن تھی گِیا ۔
27 تے لوک حیران تھی تے آکھنڑ لگے ایہہ کیجھا آدمی ہےجو ہوا تے پانڑیں وی اِیندا حُکم مَنیندن ؟
یسُوع ڈو بدرُوح گرفتہ آدمیاں کُوں شِفا ڈیندے
28 جِیں وَیلے اوہ اُوں پار گدرِینِیاں دے علاقے ءچ پُجیا تاں ڈو آدمی جنہاں ءچ بدرُوحاں ہَن قبر اں ءچوں نِکل تے اُوں کُوں ملے ۔ اوہ ایجھے اَکھڑمزاج ہَن جو کوئی اُوں رستے کُنوں لنگھ نہ سگدا ہا ۔ 29 تے ڈیکھو اوہ چیخ تے آکھنڑ لگے اے خُدا دے پوتر ساکُوں تیڈے نال کیا کَم ؟ کیا تُوں وقت تُوں پہلے ای ساکُوں عذاب ءچ سَٹنڑ آیا ہیں ؟
30 اُنہاں کنُوں کُجھ پَرے سُؤراں دا ہِک وَڈا جھُنڈ چر دا پیا ہا ۔ 31 بس بدرُوحاں نیں اُوندی مِنت کیتی تے آکھیا جو جے تُوں ساکُوں کڈھنڑ ای چاہندا ہیں تاں ساکُوں سُؤراں دے جھُنڈ ءچ بھیج ڈے ۔
32 اُو نیں اُنہاں کُوں آکھیا وَنجو ۔ اوہ نِکل تے سُؤراں ءچ داخل تھی گئیاں تے ڈیکھو سُؤراں دا سارا جھُنڈ ریڑھ کنُوں بھجیا تے جھیل ءچ بُڈ مریا ۔