‏5 یسُوع اِنہاں بارہاں کُوں بھیجیا تے اُنہاں کُوں حکم ڈے تے آکھیا۔ غیرقوماں اَل نا وَنجائے تے سامریاں دے کہیں شہر ءچ داخل نہ تھیوائے ۔ ‏6 بلکہ اِسرائیل دے گھرانے د یاں گُم تھیّاں بھیڈاں دے کولھ ونجائے۔ ‏7 تے ٹُردے ٹُردے ایہہ تبلیغ کرائے جو اَسمان دی بادشاہی نیڑے آگئی ہے ۔ ‏8 بیماراں کُوں شِفا ڈیوائے ۔ مُردیاں کُوں زندہ کرائے ۔ کوڑھیاں کُوں پاک صاف کرائے ۔ بدرُوحاں کُوں کڈھائے ۔ تُہاکُوں مفت ملے، مفت ڈیوائے ۔ ‏9 آپنڑے کمر بند ءچ نہ سونا چاندی رکھائے نہ پیسے ۔ ‏10 نہ رستے کیتے تھیلے گھنائے نہ ڈو ڈو چو لے نہ جُتی تے نہ سوٹی کیوں جو مزدور آپنڑیں مزدُور ی دا حقدار ہے۔

‏11 تے جیہڑے وی شہر یا دیہات ءچ داخل تھیؤ تاں پتا کرائے جو کیہڑا اُوندے ءچ لائق ہے تے جئیں تَئیں اُتھوں روانہ نا تھیؤ اُتھائیں ٹکائے ۔ ‏12 تے گھر ءچ داخل تھیندے ہوئے سلام ولائے ۔ ‏13 جے اوہ گھر لائق ہوسی تاں تُہاڈا سلام اُونکُوں پُج ویسی تے جے لائق نہ ہوسی تاں تُہاڈا سلام تُہاڈے اُتے وَل آسی ۔ ‏14 جے کوئی تُہاکُوں قبُول نہ کرے تے تُہاڈے گالھیں نہ سُنڑے تاں اُوں گھر یا شہر کنُوں روانہ تھیندے ہوئے آپنڑے پیراں دی دُھوڑ اُتھائیں چَھنڈک ڈیوائے ۔ ‏15 میں تُہاکُوں سچ آہدھا ہاں جو عدالت دے ڈینہہ اُوں شہر دا حال سدُوم تے عُمورہ دے علاقے دے حال کُنوں زیادہ برداشت دے لائق ہوسی ۔

‏16 ڈ یکھو میں تُہاکوں بھجیند ا ہاں گویا بھیڈاں کُوں بھیڑیاں ءچ ۔ اِیں واسطے تُساں ناگاں وانگوں ہوشیار تے کبوتراں وانگوں بھولے بنڑو ۔ ‏17 پَر آدمیاں کنُوں خبردار رہوائے کیوں جو اوہ تُہاکُوں پکڑ تے عدالتاں ءچ پیش کریسن تے آپنڑے عبادت خانیاں ءچ تُہاکُوں کوڑے مریسن ۔ ‏18 تے تُساں میڈی وجہ کنُوں حاکماں تے بادشاہاں دے سامنڑے حاضر کیتے ویسو تاں جو اُنہاں تے غیرقوماں کیتے گواہی ہووے ۔ ‏19 پَر جِیں وَیلے اوہ تُہاکُوں پکڑواوݨ تاں فکر نہ کرائے جو اَساں کیویں تے کیا آکھوں کیوں جو جیہڑا کُجھ آکھنڑا ہوسی اُوں وَیلے تُہاکُوں ڈسا ڈِ تا ویسی ۔ ‏20 کیوں جو بولنڑ آلے تُساں نئیں بلکہ تُہاڈے باپ دا رُوح ہے جیہڑا تُہاڈےءچ بولیندے ۔

‏21 بِھرا آپنڑے بِھرا تے پِیوُ آپنڑے بال کُوں قتل کیتے حوالے کریسی۔ تے بال آپنڑے ماں پِیُو دے خِلاف کھڑے تھی تے اُنہاں کُوں مرواڈیسن ۔ ‏22 تے میڈے ناں دی وجہ تُوں سبھ لوک تُہاڈے دشمن بنڑ ویسن پَر جیہڑا آخر تَئیں برداشت کریسی اُوہو نجات پےسی ۔ ‏23 پَر جِیں وَیلے لوک تُہاکُوں ہِک شہر ءچ ستاوݨ تاں ڈو جھے کُوں بھج ونجائے کیوں جو میں تُہاکُوں سچ آہدھا ہاں جو اِیں کنُوں پہلے جو تُساں اِسرائیل دے سارے شہراں ءچ نہ پھر گِھن سو، ابن ِآدم آویسی ۔

‏24 شاگردآپنڑے اُستاد کنُوں وَڈا نئیں ہوندا تے نہ ای نوکر آپنڑے مالک کنُوں ۔ ‏25 شاگرد کیتے بہُوں ہے جو اوہ آپنڑے اُستاد دے وانگوں تے نوکر کیتے ایہہ جو اوہ آپنڑے مالک وانگوں ہو وے ۔ جِیں وَیلے اُنہاں گھر دے مالک کُوں بَعَل ز بُول آکھیا تاں اُوندے گھرآلیاں کُوں کیوں نہ اَکھیسن ۔

‏26 بس اُنہاں کنُوں نہ ڈرو کیوں جو کوئی چیز ڈھکی ہوئی نئیں جیہڑی کھولی نہ ویسی تے کوئی چیز لُکی ہوئی نئیں جیہڑی ظاہر نہ کیتی ویسی ۔ ‏27 جیہڑا کُجھ میں تُہاکُوں اندھارے ءچ آہدھا ہاں تُساں اُونکُوں سوجھلے ءچ آکھو تے جیہڑا کُجھ تُساں کَن ءچ سُنڑدے ہِوے کوٹھیاں اُتے اُوندی تبلیغ کرو ۔ ‏28 اُنہاں کنُوں نہ ڈرو جیہڑے جِسم کُوں تاں مار سگدے ہِن پر رُوح کُوں نئیں بلکہ اُوں کُنوں ڈرو جیہڑا جِسم تے رُوح ڈوہاں کُوں دوزخ ءچ سَٹ سگدے ۔ ‏29 کیا ہِک پیسہ دیاں ڈو چڑیاں نئیں وِکدیاں؟ تے اُنہاں ءچوں ہِک وی تُہاڈے باپ دی مرضی دے بغیر زمین اُتے نئیں ڈھے سگدی ۔ ‏30 بلکہ تُہاڈے سِر دے وال وی گنتی تھئے ہوئے ہِن ۔ ‏31 بس نہ ڈرو ۔ تُہاڈی قدر تاں بہُوں ساریاں چڑیاں تُوں وی زیادہ ہے ۔

‏32 بس جیہڑا کوئی آدمیاں دے سامنڑے میڈا اقرار کریسی میں وی آپنڑے باپ دے سامنڑے جیہڑا اَسمان اُتے ہے اُوندا اقرار کریساں ۔ ‏33 پَر جیہڑا کوئی آدمیاں دے سامنڑے میڈا اِنکار کریسی میں وی آپنڑے اَسمانی باپ دے سامنڑے اُوندا اِنکار کریساں ۔

‏34 ایہہ نہ سمجھو جو میں زمین اُتے صلح کراوݨ آیا ہاں ۔ صلح کراوݨ نئیں بلکہ تلوار چلاوݨ آیا ہاں ۔ ‏35 کیوں جو میں اِیں کیتے آیا ہاں جو پوتر کُوں پیُو کنُوں تے دِھی کُوں ماں کنُوں تے نُوہ کُوں سس کنُوں انج کراں ۔ ‏36 تے انسان دے دشمنڑ اُوندے گھر دے لوک ای ہو سن ۔

‏37 جیہڑا کوئی آپنڑے باپ یا ماں کُوں میں کنُوں زیادہ پیار کریندے اوہ میڈے لائق نئیں تے جیہڑا کوئی آپنڑے پوتر یا دِھی کُوں میں کنُوں زیادہ پیار کریندے اوہ میڈے لائق نئیں ۔ ‏38 تے جیہڑا کوئی آپنڑیں صلیب چا تے میڈے پچُھوں نئیں ٹُردا اوہ میڈے لائق نئیں ۔ ‏39 جیہڑا کوئی آپنڑیں جان بچیندے اوہ اُونکُوں ونجیسی تے جیہڑا میڈی خاطر آپنڑیں جان ونجیندے اُو نکُوں بچیسی ۔

‏40 جیہڑا تُہاکُوں قبول کریندے میکُوں قبول کریندے تے جیہڑا میکُوں قبول کریندے اوہ میڈے بھیجنڑ آلے کُوں قبول کریندے ۔ ‏41 جیہڑا نبی کُوں نبی سمجھ تے قبُول کریندے اُونکُوں نبی دا اَجر ملسی تے جیہڑا راستباز کُوں راستباز سمجھ تے قبوُل کریندے اُونکُوں راستباز دا اَجر ملسی ۔ ‏42 تے جیہڑا اِنہاں چھوٹیاں ءچوں کہیں کُوں میڈا شاگرد مَن تے ہِک پیالہ ٹھڈا پانڑی ای پلیسی تاں میں تُہاکُوں آہدھا ہاں اوہ آپنڑاں اَجر اصلُوں نہ ونجیسی ۔