ڈیکھو ہِک بیج رَہاوݨ آلا بیج رَہاوݨ نِکلیا ۔ ‏4 تے رَہیندے وَیلے کُجھ دانڑے راہ دے کِنارے ڈھٹھے تے پَکھیں آ تے اُونکُوں چُگ گِھدا ۔ ‏5 کُجھ پتھریلی زمین اُتے ڈھٹھے جِتھاں مِٹی گھٹ ہَئی تے زیادہ مِٹی نہ ملی، اِیں واسطے جلدی رہیج پئے۔ ‏6 جِیں وَیلے سُورج نِکلیا تے سَڑ گئے تے جَڑھ نہ ہووݨ دے سببّوں سُک گئے۔ ‏7 کُجھ جھاڑیاں ءچ ڈھٹھےتے جھاڑیاں وَدھ تے اُنہاں کُوں دَبا گھِدا ۔ ‏8 کُجھ چنگی زمین تے ڈھٹھے تے پھل گھِن آئے ۔کوئی سَو گُنا ،کوئی سَٹھ گُنا کوئی تَریح گُنا ۔ ‏9 جِیندے سُننڑ دے کَن ہووݨ اوہ سُنڑ گھِنے ۔

‏10 وَل شاگرداں نیں کولھ آ تے آکھیا تُوں اُنہاں نال تمثیلاں ءچ گالھیں کیوں کریندیں ؟

‏11 اُونیں جواب ڈیندے ہوئے آکھیا کیوں جو تُہاکُوں تاں اَسمان دی بادشاہی دے راز سمجھنڑ دی قابلیت ڈتی گئی ہے پَر اُنہاں کُوں نئیں ڈِتی گئی ۔ ‏12 کیوں جو جِیندے کولھ ہے اُونکُوں ڈِتا ویسی تے اُوندے کولھ زیا دہ تھی ویسی پَر جِیندے کولھ کُجھ نئیں، اُوندے کنُوں اوہ وی جیہڑا اُوندے کولھ ہے گِھن گھِدا ویسی۔ ‏13 مَیں اُنہاں نال تمثیلاں ءچ اِیں واسطے گالھیں کریندا ہاں جو اوہ ڈیدھے ہوئے نئیں ڈیدھے تے سُنڑدے ہوئے نئیں سُنڑدے تےنئیں سمجھدے ۔ ‏14 یسعیاہ نبی دی ایہہ پیشنگوئی اُنہاں اُتے سچ تھیندی ہے جو

‏18 بس بیج رَہاوݨ آلے دی تمثیل سُنڑو ۔ ‏19 جِیں وَیلے کوئی بادشاہی دا کلام سُنڑدے پَر سَمجھدا نئیں تاں شیطان اُونکُوں جیہڑا اُوندے دِل ءچ رَہایا گِیا ہا کَھس گِھندے ۔ ایہہ اوہ ہے جیہڑا راہ دے کِنارے رَہایا گِیا ہا ۔ ‏20 جیہڑا پتھریلی زمین اُتے رَہایا گِیا ہا اُوں شخص دے وانگوں ہے جیہڑا کلام کُوں سُنڑدے ای خُوشی نال قبول کر گھِندے ۔ ‏21 پَر اوہ اُوندے ءچ جڑ نئیں پکڑیندا تے دیر تَئیں قائم نئیں رہندا ۔ جِیں وَیلے کلام دے سببّوُں مصیبت یا ظلم آندے تاں فوراً ٹھوکر کھاندے ۔ ‏22 تے جھاڑیاں ءچ رَہایا گِیا بیج اُوندی مثال ہے جیہڑا کلام کُوں سُنڑدا تاں ہے پَر دُنیا دی فِکر تے دولت دا فریب اُونکُوں دبا ڈیندے تے اُونکُوں پھل نئیں لگ دا ۔ ‏23 پَر جیہڑا چنگی زمین ءچ رَہایا گیا اُوں بیج وانگوں ہےجیہڑا کلام کُوں سُنڑدے تے سمجھدے تے پھل وی گھِن آندے، کوئی سَو گُنا ، کوئی سَٹھ گُنا تے کوئی تَریح گُنا ۔

‏24 اُونیں اُنہاں کُوں ہِک بئی تمثیل سُنڑائی جو اَسمان دی بادشاہی اُوں شخص وانگوں ہے جئیں آپنڑیں رَڑھ ءچ چنگا بیج رَہایا ۔ ‏25 پَر جِیں وَیلے لوک سُتے پئے ہَن تاں اُوندا دشمنڑ آیا تے کنڑک ءچ کڑوے دانڑے دا بیج رَہا گِیا ۔ ‏26 بس جیہڑے وَیلے پتے تے سِٹے نکلے تاں اوہ کڑوے دانڑے ظاہر تھی گئے ۔ ‏27 مالک دے نوکراں آتے اُونکُوں آکھیا کیا تُوں آپنڑیں رَڑھ ءچ چنگا بیج نہ رَہایا ہا ؟ وَل ایہہ کڑوے دانڑے کِتُّھوں آگئے ؟ ‏28 اُونیں جواب ڈِتّا، ایہہ کہیں دشمنڑ دا کَم ہے ۔ نوکراں پُچھیا کیا تُوں چاہندیں جو اَساں اُنہاں کُوں جمع کروں ؟ ‏29 پَر اُونیں آکھیا نہ، اِیویں نہ تھیوے جو اُنہاں کُوں پٹیندیں ہوئے تُساں کنڑک کُوں وی پَٹ ڈیؤ۔ ‏30 فصل دی کٹائی تَئیں ڈوہاں کُوں کٹھے وَدھنڑ ڈیؤ تے کٹائی دے وَیلے میں کٹائی کرݨ آلیاں کُوں آکھ ڈیساں جو پہلے کڑوے دانڑیاں کُوں جمع کر گھِنو تے ساڑن کیتے اُنہاں دے گٹھے بَدھ ڈیؤ تے کنڑک کُوں میڈے گوداماں ءچ جمع کر ڈیؤ ۔

‏31 اُونیں ہِک بئی تمثیل اُنہاں کُوں سُنڑائی جو اَسمان دی بادشاہی اُوں رائی دے دانڑے وانگوں ہے جِیں کُوں ہِک آدمی گھِدا تے آپنڑیں رَڑھ ءچ رَہاڈِتا ۔ ‏32 ایہہ بیجاں ءچوں سبھ کنُوں چھوٹا ہے پِر پھپھڑن دے بعد بُوٹیاں ءچوں سبھ سبزیاں کنُوں وَڈا تھی ویندے تے ایجھا درخت بنڑ ویندے جو ہوا دے پَکھی آتے اُوندے اُتے آلھنڑے بنڑیندن ۔

‏33 اُونیں ہِک بئی تمثیل اُنہاں کُوں سُنڑائی جو اَسمان دی بادشاہی اُوں خمیر وانگوں ہے جِینکُوں ہِک عورت تَرے مُٹھیاں اَٹے ءچ رَلا یا تے سارا اَٹا خمیر تھی گِیا ۔

‏34 ایہہ سارے گالھیں یسُوع نیں بِھیڑ کُوں تمثیلاں ءچ آکھیاں تے بغیر تمثیل دے اوہ اُنہاں کُوں کُجھ نہ آہدھاہا ۔ ‏35 تاں جو نبی دی آکھی ہوئی گالھ پوری تھی وَنجے جو

‏36 اُوں وَیلے اوہ بِھیڑ کُوں چھوڑ تے گھر دے اندر گِیا تے اُوندے شاگرداں اُوندے کولھ آتے آکھیا جو ساکُوں کڑوے دانڑیاں دی تمثیل دا مطلب سمجھا ڈے ۔

‏37 اُونیں جواب ڈِتا چنگے بیج دا رَہاوݨ آلا ابن ِآدم ہے ۔ ‏38 رَڑھ دُنیا ہے تے چنگا بیج بادشاہی دے فرزند تے کڑوے دانڑے اُوں شریر دے فرزند ہِن ۔ ‏39 دشمن جئیں اُنہاں کُوں رَہایا اِبلیس ہے تے کَٹائی دُنیا دا آخر ہے تے کَٹائی کرݨ آلے فرشتہ ہِن ۔ ‏40 بس جیویں کڑوے دانڑے جمع کیتے ویندے تے بھاہ ءچ ساڑ ڈِتے ویندن اُونویں ای دُنیا دے آخر ءچ تھیسی ۔ ‏41 ابن ِآدم آپنڑے فرشتیاں کُوں بھجیسی تے اوہ ٹھوکر کھواوݨ آلیاں ساریاں چیزاں تے بدکاراں کُوں اُوندی بادشاہی ءچوں جمع کریسن ۔ ‏42 تے اُنہاں کُوں بھاہ دی بھٹی ءچ سَٹ ڈے سن جِتھاں رووݨ تے ڈنداں دا پیہوݨ ہوسی ۔ ‏43 اُوں وَیلے راستباز آپنڑے باپ دی بادشاہی ءچ سورج وانگوں چمکسنڑ ۔ جِیندے سُننڑ دے کَن ہوݨ اوہ سُنڑ گھِنے ۔

‏44 اَسمان دی بادشاہی رَڑھ ءچ لُکے اُوں خزانے وانگوں ہے جیہڑا ہِک شخص کُوں مِل گِیا تے اُوں وَلا لُکا ڈِتا وَل اوہ خُوشی خُوشی گِیا تے آپنڑاں سبھ کُجھ ویچ تے اُوں رَڑھ کُوں مُل گھِن گھدا ۔

‏45 وَل اَسمان دی بادشاہی اُوں وپاری وانگوں ہے جیہڑا بہُوں اعلیٰ موتیاں دی تلاش ءچ ہا ۔ ‏46 جِیں وَیلے اُونکُوں ہِک بہُوں قیمتی موتی ملیا تاں اُونیں وَنج تے آپنڑاں سبھ کُجھ ویچ ڈِتا تے اُونکُوں مُل گِھن گھدا ۔

‏47 وَل اَسمان دی بادشاہی اُوں وَڈے جال وانگوں ہے جیہڑا جھیل ءچ سَٹیا گِیا تے اُونیں ہر قِسم دیاں مچھیاں سمیٹ گِھدیاں ۔ ‏48 جِیں وَیلے بھر گِیا تاں اُونکُوں چھیک تے کِنارے اُتے گِھن آئے تے بہہ تے چنگیاں چنگیاں مچھیاں برتناں ءچ جمع کر گھِدیاں تے جیہڑیاں خراب ہَن سَٹ ڈِتیاں۔ ‏49 قیامت دے ڈینہہ ایویں ای تھیسی ۔ فرشتہ نکِلسن تے شریراں کُوں راستبازاں کنُوں اَنج کریسن تے اُنہاں کُوں بھاہ دی بھٹی ءچ سَٹ ڈیسن۔ ‏50 اُتھاں رووݨ تے ڈنداں دا پیہوݨ ہوسی ۔

‏51 کیا تُساں ایہہ سارے گالھیں سمجھ گئے ؟

اُنہاں اُونکُوں آکھیا، ہاں ۔

‏52 یسوع اُنہاں کُوں آکھیا اِیں واسطے ہر فقیہہ جیہڑا اَسمان دی بادشاہی دا شاگرد بَنڑیا ہے اُوں گھر دے مالِک وانگوں ہے جیہڑا آپنڑے خزانے ءچوں نویاں تے پُرانڑیاں چیزاں کڈھیندے۔

‏53 جِیں وَیلے یسُوع ایہہ تمثیلاں سُنڑا گھِدیاں تاں اُتھوں کنُوں چلا گِیا ۔ ‏54 تے آپنڑےوطن ءچ آتے اُتھوں دے عبادت خانے ءچ اُنہاں کُوں ایجھی تعلیم ڈیوݨ لگا جو اوہ حیران تھی تے آکھنڑ لگے جو ایہہ حِکمت تے معجزے اوہ کِتُھوں حاصل کریندے ؟ ‏55 کیا ایہہ درکھاݨ دا پوتر نئیں ؟ تے اِیندی ماں دا ناں مریم تے کیا یعقوب تے یُوسف تے شمعون تے یہُوداہ اِیندے بِھرا نئیں ؟ ‏56 تے کیا اِیندیاں ساریاں بھینڑاں اِتھاں ساڈے کولھ نئیں ؟ وَل ایہہ سبھ کُجھ اِیندے ءچ کِتھوں آیا ؟ ‏57 اُنہاں اُوندی وجہ کنُوں ٹھوکر کھادی ۔

پَر یسُوع اُنہاں کُوں آکھیا جو نبی دی بے قدری اُوندے آپنڑے وطن تے رشتے داراں دے سوا بِیا کِتھائیں نئیں تھیندی ۔ ‏58 تے اُونیں اُنہاں دی بے اعتقادی دے سَببوں اُتھاں بہُوں معجزے نہ ڈِکھائے ۔