‏3 کیوں جو ہیرودیس یُوحنّا کُوں پکڑ تے بَدھوایا تے قید خانے ءچ سَٹوا ڈِتا ہا ۔ اِیندی وجہ اُوندے بِھرا فِلپُّس دی ذال ہیرودیاس ہَئی ۔ ‏4 کیوں جو یُوحنّا اُوں کُوں آکھیا ہا جو اِیں کُوں آپنڑے کولھ رکھنڑ تیکوں جائز نئیں ۔ ‏5 تے ہیرودیس یُوحنّا کُوں قتل کرݨ چاہندا ہا پَر عوام کنُوں ڈر دا ہا کیوں جو اوہ اُونکُوں نبی منیندے ہَن ۔

‏6 پَر جِیں وَیلے ہیرودیس دی سالگرہ تھئی تے جشن ءچ ہیرودیاس دی دِھی مہماناں دے سامنڑے نَچ تے ہیرودیس کُوں خُوش کیتا ۔ ‏7 اِیں واسطے ہیرودیس قَسم چا تے اُوندے نال وعدہ کیتا جو جیہڑا کُجھ تُوں منگسیں میں تیکُوں ڈیساں ۔

‏8 اُونیں آپنڑیں ماں دے سکھاوݨ تے آکھیا میکُوں یُوحنّا بپتسمہ ڈیوݨ آلے دا سِر تھال ءچ اِتھائیں منگوا ڈے۔

‏9 بادشاہ غمگین تِھیّا پَر آپنڑیں قَسم تے مہماناں دی وجہ کنُوں حکم ڈِتا جو ڈے ڈِتا وَنجے ۔ ‏10 تے آدمی بھیج تے قید خانے ءِ چ یُوحنّا دا سِر کٹوا ڈِتّا۔ ‏11 تے اُوندا سِر تھال ءچ گِھن آئے تے چھوہِیر کُوں ڈِتا گِیا تے اوہ اُونکُوں آپنڑیں ماں دے کولھ گِھن گئی ۔ ‏12 تے اُوندے شاگرد آئے تے اُوندی لاش چا تے اُونکُوں دفن کر ڈِتا تے وَنج تے یسُوع کُوں خبر ڈِتی ۔

‏13 جِیں وَیلے یسُوع ایہہ سُنڑیا تاں اوہ کشتی تے الگ ہِک بیابان دو روانہ تِھیّا تے لوک ایہہ سُنڑ تے شہر شہر کنُوں نِکل تے پیدل ای اُوندے پچُھوں ٹُر پئے ۔ ‏14 اُونیں لہہ تے وَڈی بِھیڑ ڈِٹھی تے اُونکُوں اُنہاں اُتے ترس آیا تے اُونیں اُنہاں دے بیماراں کُوں شِفا بخشی ۔

‏15 جِیں وَیلے شام تھئی تاں شاگرد اُوندے کولھ آتے آکھنڑ لگے جو ایہہ جاہ ویران ہے تے دیر وی تھی گئی ہے ۔ لوکاں کُوں رخصت کر ڈے تاں جو اوہ دیہات ءچ وَنج تے آپنڑے کیتے کھانڑا مُل گِھن سگن ۔

‏16 یسُوع آکھیا اِنہاں دا وَنجنڑ ضروری نئیں تُساں ای اِنہاں کُوں کھاوݨ کیتے ڈیؤ ۔

‏17 اُنہاں جواب ڈِتا جو اِتھاں ساڈے کولھ صرف پنج روٹیاں تے ڈو مچھیاں ہِن ۔

‏18 اُونیں آکھیا اُنہاں کُوں میڈے کولھ گِھن آؤ ۔ ‏19 تے اُونیں لوکاں کُوں گھاہ اُتے بَہوݨ دا حکم ڈِتا۔ وَل پَنج روٹیاں تے ڈو مچھیاں گِھن تے اَسمان دو ڈیکھ تے برکت ڈِتی تے روٹیاں تروڑ تے شاگرداں کُوں ڈِتیاں تے شاگرداں لوکاں کُوں ۔ ‏20 سبھ لوکاں رَج تے کھادا تے اُنہاں بچے ہوئے ٹکڑیاں کنُوں بارہاں ٹوکریاں چاتیاں ۔ ‏21 تے کھاوݨ آلیاں دی تعداد عورتاں تے بالاں دے علاوہ تقریباً پنج ہزار مَرد ہَئی ۔

‏22 تے اُونیں فوراً شاگرداں کُوں حکم ڈِتا جو کشتی ءچ بہہ تے جھیل دے پار چلے ونجنڑ جئیں تَئیں میں لوکاں کُوں روانہ کر گھِنّاں۔ ‏23 تے لوکاں کُوں روانہ کر تے کلھا دُعا کرݨ کیتے ہِک پہاڑ اُتے چڑھ گِیا تے جِیں وَیلے شام تھئی تاں اوہ اُتھاں کلھا ہا ۔ ‏24 پَر کشتی اُوں وَیلے جھیل دے اَدھ ءچ ہَئی تے مخالف ہوا ہوݨ دی وجہ تُوں لَہراں اُتے ڈولے کھاندی پئی ہَئی ۔

‏25 تےیسوع رات دے چوتھے پہر جھیل اُتے ٹُردے ہوئے اُنہاں دے نیڑے آیا ۔ ‏26 شاگرداں اُونکُوں جھیل اُتے ٹُردے ڈِٹھا تاں گھبرا گئے تے آکھنڑ لگے جو ایہہ تاں کوئی بھوت ہے تے ڈر کنُوں چیخاں مارݨ لگ پئے ۔

‏27 یسُوع اُنہاں کُوں فوراً آکھیا حوصلہ رکھو ۔میں ہاں ۔ ڈرو نہ ۔

‏28 پطرس اُونکُوں جواب ءچ آکھیا اے خُداوند جے تُوں ہیں تاں میکُوں حُکم ڈے جو میں پانڑی اُتے ٹُر تے تیڈے کولھ آواں ۔

‏29 اونیں آکھیا، آ ۔ وَل پطرس کشتی کنُوں لہہ تے یسُوع دے کولھ ونجنڑ کیتے پانڑی اُتے ٹُرݨ لگا ۔ ‏30 پَر جیہڑے وَیلے ہوا دا زور ڈِٹھا تاں ڈر گِیا تے جِیں وَیلے ڈُبنڑ لگا تاں چیخ تے آکھیا اے خُداوند میکُوں بچا !

‏31 یسُوع فوراً ہَتھ وَدھا تے اُوں کُوں پکڑ گھِدا تے آکھیا اے کم اعتقاد، تَیں کیوں شَک کیتے ؟

‏32 جِیں وَیلے اوہ کشتی ءچ چڑھ آئے تاں ہوا رُک گئی ۔ ‏33 تے وَل جیہڑے لوک کشتی ءچ ہَن اُنہاں اُونکُوں سِجدہ کر تے آکھیا یقیناً تُوں خُدا دا پوتر ہیں۔

‏34 اوہ جھیل پار کر تے گنیسّرت دے علاقے ءچ پُجے ۔ ‏35 تاں اُتھاں دے لوکاں اُونکُوں سُنجانڑ گھِدا تے آسوں پاسوں دے سارے علاقے ءچ خبر کر ڈِتی تے سبھ بیماراں کُوں اُوندے کولھ گِھن آئے ۔ ‏36 اوہ اُوندی مِنت کرݨ لگے جو اُوندی پُشاک دے کِنارے کُوں ای ہَتھ لا گِھننڑ، تے جئیں جئیں ہَتھ لایا تندرست تھی گِیا ۔