اَسمانی نِشان دا مطالبہ
16
1 وَل فریسیاں تے صدوقیاں یسوع دے کولھ آتے اُونکُوں اَزماوݨ کیتے درخاست کیتی جو ساکُوں کوئی اَسمانی نِشان ڈِکھا ۔ 2 اُونیں جواب ءچ اُنہاں کُوں آکھیا شام کُوں تُساں آہدھے ہِوے جو موسم چنگا رَہسی کیوں جو اَسمان رَتا ہے ۔ 3 تے سویرکُوں ایہہ آہدھے ہِوے جو اَج اندھاری آسی کیوں جو اَسمان رَتا تے دھُندلا ہے ۔ تُساں اَسمان دا رنگ ڈیکھ تے موسم دا اندازہ لاوݨ تاں جانڑدے ہِوے پَر زمانے دیاں علامتاں نئیں سُنجاݨ سگدے ۔ 4 اِیں زمانے دے بدکار تے زِنا کار لوک نِشان منگدے ہِن پَر اُنہاں کُوں یُوناہ دے نِشان دے سوا بِیا نِشان نہ ڈِتا ویسیتے اوہ اُنہاں کُوں چھوڑ تے چلا گِیا ۔
فریسیاں تے صدوقیاں دا خمیر
5 تے شاگرد جھیل دے پار ویندے ہوئے روٹی نال چاوݨ بھُل گئے ۔ 6 یسُوع اُنہاں کُوں آکھیا خبردار فریسیاں تے صدوقیاں دے خمیر کنُوں ہوشیار رواہے ۔
7 اوہ آپس ءچ تکرار کرݨ لگ گئے جو اَساں روٹی نئیں گِھن آئے ۔
8 یسُوع نیں ایہہ گالھ معلوم کرتے آکھیا اے کم اعتقادو تُساں کیوں آپس ءچ تکرار کریندے ہِوے جو ساڈے کولھ روٹی نئیں ؟ 9 کیا تُساں ہُنڑ تَئیں نئیں سمجھدے تے تُہاکُوں پنج ہزار آدمیاں کیتے اوہ پنج روٹیاں یا د نئیں تے ایہہ وی جو تُساں کِتّی ٹوکریاں چاتیاں ہَن ؟ 10 تے نہ چار ہزار آدمیاں کیتے اوہ سَت روٹیاں تے ایہہ جو تُساں کِتّی ٹوکریاں چاتیاں ہَن ؟ 11 کیا وجہ ہے جو تُساں ایہہ نئیں سمجھدے جو میں تُہاکُوں روٹی دے بارے ءچ نئیں آکھیا ؟ فریسیاں تے صدوقیاں دے خمیر کنُوں خبردار رَہو؟
12 وَل اُنہاں دی سمجھ ءچ آیا جو اُونیں روٹی دے خمیر کنُوں نئیں بلکہ فریسیاں تے صدوقیاں دی تعلیم کنُوں خبردار رَہنڑ کیتے آکھیا ہا ۔
یسُوع دے بارے ءچ پطرس دا اقرار
13 جِیں وَیلے یسُوع قَیصریہ فِلپَّی دے علاقے ءچ آیا تاں اُونیں آپنڑے شاگرداں تُوں پُچھیا جو لوک ابن ِآدم کُوں کیا آہدھن ؟
14 اُنہاں آکھیا کُجھ یُوحنّا بپتسمہ ڈیوݨ آلا آہدھن کُجھ ایلیّاہ تے کُجھ یرمیاہ یا نبیاں ءچوں کوئی ۔
15 یسوع اُنہاں کُوں آکھیا پَر تُساں میکُوں کیا آہدھے ہِوے ؟
16 شمعون پطرس نیں جوب ڈِتّا تُوں زندہ خُدا دا پوتر المسیح ہیں ۔
17 یسُوع نیں جواب ءچ اُونکُوں آکھیا شمعون بریوناہ تُوں مُبارک ہیں کیوں جو ایہہ گالھ اِنسان نیں نئیں بلکہ میڈے اَسمانی باپ تَیں اُتے ظاہر کیتی ہے ۔ 18 تے میں وی تیکُوں آہدھا ہاں جو تُوں پطرس ہیں تے میں اِیں چٹان اُتے آپنڑیں کلیسیا قائم کریساں تے موت وی اُوندے اُتے غالب نہ آسگسی ۔ 19 میں اَسمان دی بادشاہی دی کُنجیاں تیکُوں ڈیساں تے جیہڑا کُجھ تُوں زمین اُتے بدھیسیں اوہ اَسمان اُتے بَدھِیسی تے جیہڑا کُجھ تُوں زمین اُتے کھولیسیں اوہ اَسمان اُتے کھولیا ویسی ۔
20 اُوں وَیلے اُونیں شاگرداں کُوں حُکم ڈِتا جو کہیں کُوں نہ ڈسا ئے جو میں المسیح ہاں ۔
یسُوع آپنےڈُکھ چاوݨ تے موت دا ذکر کریندے
21 اُوں وَیلے تُوں یسُوع آپنڑے شاگرداں اُتے ظاہر کرݨ شروع کر ڈِتا جو اُوندے کیتے لازمی ہے جو یروشلیم وَنجے تے بُزرگاں تے سردار کاہناں تے فقیہاں دے ہَتُھوں بہُوں ڈُکھ چاوے تے قتل کیتا وَنجے تے تَریجھے ڈینہہ جی اُٹھے ۔
22 پطرس اُونکُوں انج گِھن تے ملامت کرݨ لگا جو اے خُداوند، خُدا نہ کرے ۔ تیڈے نال ایویں کڈھائیں نہ تھیوے ۔
23 اُونیں پطرس اَل مُڑ تے آکھیا اے شیطان میڈے کنُوں پَرے تھی وَنج ۔ تُوں میڈے کیتے ٹھوکر دا باعث ہیں کیوں جو تُوں خُدا دے گالھیں دا نئیں بلکہ اِنساناں دے گالھیں دا خیال کریندیں ۔
24 اُوں وَیلے یسُوع آپنڑے شاگرداں کُوں آکھیا جے کوئی میڈی پیروی کرݨ چاہندے تاں اوہ آپنڑیں خُودی دا اِنکار کرے تے آپنڑیں صَلیب چاوے تے میڈے پچُھوں تھی پووے ۔ 25 کیوں جو جیہڑا کوئی آپنڑیں جان کُوں بچاوݨ چاہسی اُونکُوں ونجیسی تے جیہڑا کوئی میڈے کیتے آپنڑیں جان ونجیسی اُونکُوں پَیسی ۔ 26 آدمی جے ساری دُنیا حاصل کر گھِنے پَر آپنڑیں جان دا نقصان چاوے تاں اُونکُوں کیا فائدہ تھیسی ؟ یا آدمی آپنڑیں جان دے بدلے ءچ کیا ڈیسی؟ 27 کیوں جو ابن ِآدم آپنڑے باپ دے جلال ءچ آپنڑے فرشتیاں دے نال آسی۔اُوں وَیلے ہر ہِک کُوں اُوندے کَماں دے مطابق اَجر ڈیسی ۔ 28 میں تُہاکُوں سچ آہدھا ہاں جو جیہڑے اِتھاں کھڑے ہِن اُنہاں ءچوں کُجھ ایجھے ہِن جو جِیں وَیلے تَئیں ابن ِآدم کُوں اُوندی بادشاہی ءچ آندے ہوئے ڈیکھ نہ گھنسن موت دا مزہ ہر گز نہ چکھ سِن ۔