یسُوع دی صُورت دا تبدیل تھی ونجنڑا ں
17
1 چِھی ڈینہہ دے بعد یسُوع پطرس ، یعقوب تے یعقوب دے بِھرا یُوحنّا کُوں نال گھِدا تے اُنہاں کُوں ہِک اُچے پہاڑ اُتے اَنج گِھن گِیا ۔ 2 تے اُنہاں دے سامنڑے اُوندی صُورت بدل گئی ۔ تے اُوندا چہرہ سورج وانگوں چمکنڑ پے گِیا تے اُوندی پُشاک نُور وانگوں چِٹی تھی گئی ۔ 3 تے ڈیکھو مُوسیٰ تے ایلیّاہ اُوندے نال گالھیں کریندے نظر آئے ۔ 4 پطرس یسُوع کُوں آکھیا اے خُداوند ساڈا اِتھاں رَہنڑ چنگا ہے ۔ جے تُوں چاہویں تاں اَساں اِتھاں تَرے ڈیرے بنڑاؤں ۔ ہِک تیڈے کیتے، ہِک مُوسیٰ کیتے تے ہِک ایلیّاہ کیتے ۔5 اوہ ایہہ آہدھا ای پیا ہا جو ڈیکھو ہِک نورانی بَدلی نیں اُنہاں اُتے چھاں کر ڈتی تے اُوں بَدلی ءچوں آواز آئی جو ایہہ میڈا پیارا پوتر ہے جِیں تُوں میں خُوش ہاں، اِیندی سُنڑو۔
6 شاگرد ایہہ سُنڑ تے مُنہ دے بھار ڈھٹھے تے بہُوں ڈر گئے ۔ 7 یسُوع کولھ آتے اُنہاں کُوں ہَتھ لایا تے آکھیا اُٹھو ، ڈرو نہ ۔ 8 جِیں وَیلے اُنہاں آپنڑیاں اَکھیں چاتیاں تاں یسُوع دے سِوا بئے کہیں کُوں نہ ڈِٹھا ۔
9 جِیں وَیلے اوہ پہاڑ کنُوں تَلے لتھے آندے ہَن تاں یسُوع اُنہاں کُوں حُکم ڈِتا جو جیہڑا کُجھ تُساں ڈِٹھے جِیں وَیلے تَئیں ابن ِآدم مُردیاں ءچوں زندہ نہ تھی وَنجے کہیں نال اُوندا ذِکر نہ کرائے ۔
10 شاگرداں اُوں کنُوں پچُھیا جو فقیہہ ایہہ کیوں آہدھن جو ایلیّاہ دا پہلے آوݨ لازم ہے ؟
11 یسوع جواب ڈِتّا ایلیّاہ البتہ آسی تے سبھ کُجھ بحال کریسی ۔ 12 پَر میں تُہاکُوں آہدھا ہاں جو ایلیّاہ تاں آ گئے تے اُنہاں اُونکُوں نئیں سُنجانڑیا بلکہ جیویں دل آکھیا اُونویں ای اُوندے نال کیتا ۔ اِیویں ای ابن ِآدم وی اُنہاں دے ہَتُھوں ڈُکھ چیسی ۔
13 وَل شاگرد سمجھ گئے جو اُونیں اُنہاں کُوں یُوحنّا بپتسمہ ڈیوݨ آلے دے بارے ءچ آکھیا ہے ۔
یسُوع ہِک بد رُوح گرفتہ چھوہر کُوں شِفا ڈیندے
14 تے جیہڑے وَیلے اوہ بِھیڑ دے کولھ پُجے تاں ہِک آدمی اُوندے کولھ آیا تے اُوندے سامنڑے گوڈے ٹیک تے آکھنڑ لگا 15 اے خُداوند میڈے پوتر اُتے رحم کر کیوں جو اُونکُوں مِرگی آندی ہے تے اوہ بہُوں ڈُکھ چیندے ۔ اِیں وجہ کنُوں اکثر بھاہ تے پانڑی ءچ ڈھے پوندے ۔ 16 تے میں اُونکُوں تیڈے شاگرداں دے کولھ گِھن آیا ہم پَر اوہ اُونکُوں شِفا نہ ڈے سگے ۔
17 یسُوع جواب ءچ آکھیا اے بے اعتقاد تے گُمراہ لوکو میں کڈھاں تَئیں تُہاڈے نال رَہساں ؟ کڈھاں تَئیں تُہاڈی برداشت کریساں ؟اُونکُوں میڈے کولھ گِھن آؤ ۔ 18 یسُوع اُونکُوں دَڑکا ڈِتا تے بدرُوح اُوندے ءچوں نِکل گئی تے اوہ چھوہراُوں وَیلے ای چنگا تھی گِیا ۔
19 وَل شاگرداں کلیھپے ءچ یسُوع دے کولھ آتے پُچھیا اَساں اُونکُوں کیوں نہ کڈھ سگے ؟
20 یسُوع اُنہاں کُوں جواب ڈِتّا آپنڑے اِیمان دی کمی دی وجہ کنُوں ، کیوں جو میں تُہاکُوں سچ آہدھا ہاں جو جے تُہاڈے ءچ رائی دے دانڑے دے برابر وی اِیمان ہوسی تاں تُساں اِیں پہاڑ کُوں آکھ سگسو جو اِتھوں کنُوں اُتھاں کھِسک وَنج تاں اوہ کھِسک ویسی تے تُہاڈے کیتے کوئی کَم نا ممکن نہ ہوسی ۔ 21 ( پَر ایہہ قِسم دُعا تے روزہ دے بغیر نئیں نکِل سگدی )۔
یسُوع ڈوجھی واری آپنڑیں موت دی گالھ کریندے
22 تے جِیں وَیلے اوہ گلیل ءچ ہَن یسُوع اُنہاں کُوں آکھیا ابن ِآدم، آدمیاں دے حوالے کیتا ویسی ۔ 23 تے اوہ اُونکُوں قتل کریسن تے اوہ تَریجھے ڈینہہ زندہ کِیتا ویسی ۔ ایہہ سُنڑ تے اوہ بہُوں غمگین تھئے ۔
ہیکل دا ٹیکس
24 تے جِیں وَیلے اوہ کفر نحُوم ءچ آئے تاں نِیم مِثقال دا ٹیکس گِھننڑ آلیاں پطرس دے کولھ آتے آکھیا کیا تُہاڈا اُستاد ہیکل دا ٹیکس نئیں ڈیندا؟
25 اُونیں آکھیا ہاں ڈیندے تے جِیں وَیلے اوہ گھر ءچ داخل تِھیّا تاں یسُوع نیں اُوندے بولنڑ کنُوں پہلے آکھیا اے شمعون تیڈا کیا خیال ہے ؟ دُنیا دے بادشاہ کیہڑے لوکاں کنُوں محصُول یا جزیہ گھِندے ہِن ؟ آپنڑے پوتراں کنُوں یا غیراں کنُوں ؟
26 جِیں وَیلے اُونیں آکھیا غیراں کنُوں تاں یسُوع اُونکُوں آکھیا وَل پوتر آزاد تھئے۔ 27 پَر اِیویں نہ تھیوے جو اَساں اُنہاں کیتے ٹھوکر دا باعث بَنڑوں، تُوں جھیل تے وَنج تے کُنڈی سَٹ تے جیہڑی مچھی پہلے ہَتھ آوے اُونکُوں گِھن ، تے جِیں وَیلے تُوں اُوندا مُنہ کھولیسیں تاں تیکُوں ہِک مِثقال مِلسی ۔ اُونکُوں گِھن تے میڈے تے آپنڑے کیتےاُنہاں کُوں ڈے ۔