‏3 تے فریسی اُوں کُوں اَزماوݨ کیتے اُوندے کولھ آ تے آکھنڑ لگے کیا آدمی دا آپنڑیں ذال کُوں ہر ہِک وجہ کنُوں چھوڑ ڈیوݨ جائز ہے ؟

‏4 اُونیں جواب ءچ آکھیا کیا تُساں نئیں پڑھیا جو مُنڈھ کنُوں خالق اُنہاں کُوں مَرد تے عورت بنڑایا تے آکھیا جو ‏5 اِیں وجہ تُوں مرد آپنڑے ماں پیُو کنوُں انج تھی تے آپنڑیں ذال نال رَہسی تے اوہ ہِک تَن ہوسن ؟ ‏6 بس اوہ ڈو نئیں بلکہ ہِک تَن ہِن ۔ اِیں واسطے جِیں کُوں خُدا نیں جوڑیا ہے اُونکُوں اِنسان جُدا نہ کرے ۔

‏7 اُنہاں یسوع کنُوں پُچھیا وَل مُوسیٰ ایہہ حُکم کیوں ڈِتا ہے جو طلاق لکھ تے اُونکُوں چھوڑ ڈے ؟

‏8 اُونیں اُنہاں کُوں آکھیا جو مُوسیٰ تاں تُہاڈی سخت دِلی دے پارُوں آپنڑِیں ذال کُوں چھوڑ ڈیوݨ دی اجازت ڈِتی ہَئی پَر مُنڈھ کنُوں اِیویں نہ ہا ۔ ‏9 میں تُہاکُوں آہدھا ہاں جو جیہڑا کوئی آپنڑِیں ذال کُوں اُوندی حرامکاری دے سِوا کہیں بئی وجہ کنُوں چھوڑ ڈیوے تے کہیں بئی عورت نال شادی کر گھِنّے اوہ زِنا کریندے تے جیہڑا کوئی اُوں چھوڑی ہوئی نال شادی کریندے اوہ وی زِنا کریندے ۔

‏10 شاگرداں اُونکُوں کُوں آکھیا جے مَرد دا ذال نال ایجھا ای حال ہے تاں شادی کرݨ ای چنگا نئیں ۔

‏11 اُونیں اُنہاں کُوں آکھیا جو اِیں گالھ کُوں ہر کوئی قبول نئیں کر سگدا پَر اُوہو جنہاں کُوں قُدرت ڈِتی گئی ہے ۔ ‏12 کیوں جو کُجھ تاں جماندرُو خوجے ہوندِن تے کُجھ کوں لوکاں خوجہ بنڑاں ڈِتے تے کُجھ خوجے ایجھے ہِن جنہاں اَسمان دی بادشاہی دی خاطر آپنڑے آپ کُوں خوجہ بنڑا گِھدے ۔ جیہڑا قُبول کر سگدے اوہ قُبول کرے ۔

‏13 اُوں وَیلے لوک بالاں کُوں اُوندے کولھ گھِن آئے تاں جو اوہ اُنہاں اُتے ہَتھ رکھّے تے دُعا ڈیوے پَر شاگرداں اُنہاں کُوں جِھڑکیا ۔ ‏14 پَر یسُوع آکھیا بالاں کُوں میڈے کولھ آوݨ ڈیؤ تے اُنہاں کُوں نہ ہٹکو کیوں جو اَسمان دی بادشاہی ایجھیاں ای دی ہے ۔

‏15 وَل اوہ اُنہاں اُتے ہَتھ رکھ تے اُتھوں روانہ تھی گِیا ۔

‏16 تے ڈیکھو ہِک آدمی یسوع دے کولھ آ تے آکھنڑ لگا اے اُستاد میں کیہڑی نیکی کراں جو ہمیشاں دی زندگی حاصل کراں؟

‏17 اُونیں اُونکُوں آکھیا جو تُوں مَیں کنُوں نیکی بارے کیوں پُچھدیں ؟ نیک تاں بس ہِک ای ہے پَر جے تُوں زندگی ءچ داخل تھیوݨ چاہندیں تاں حُکماں اُتے عمل کر ۔

‏18 اُونیں اُونکُوں آکھیا کیہڑے حُکماں اُتے ؟

یسُوع آکھیا ایہہ جو خون نہ کر، زِنا نہ کر ، چوری نہ کر ، کُوڑی گواہی نہ ڈے ۔ ‏19 آپنڑے ماں پیُو دی عزت کر تے آپنڑے ہمسائے نال آپنڑے وانگوں مُحبت کر ۔

‏20 اُوں جوان اُونکُوں آکھیا جو میں اِنہاں سبھ اُتے عمل کیتا ہے ۔ ہُنڑ میڈے ءچ کیہڑی گالھ دی کمی ہے ؟

‏21 یسُوع اُونکُوں آکھیا جے تُوں کامل تھیوݨ چاہندیں تاں وَنج تے آپنڑاں سبھ کُجھ ویچ تے غریباں کُوں ڈے ۔ تیکُوں اَسمان اُتے خزانہ مِلسی تے آتے میڈے پِچُھوں تھی پو ۔

‏22 پَر اوہ جوان ایہہ گالھ سُنڑ تے غمگین تھی تے چلیا گِیا کیوں جو بہُوں دولت مند ہا ۔

‏23 تے یسُوع آپنڑے شاگرداں کُوں آکھیا میں تُہاکُوں سچ آہدھا ہاں جو دولت مند دا اَسمان دی بادشاہی ءچ داخل ٹھیوݨ مشکل ہے ۔ ‏24 وَل میں آہدھا ہاں جو اُٹھ دا سوئی دے نکَے ءچوں لنگھ وَنجنڑ کہیں دولت مند دے اَسمان دی بادشاہی ءچ داخل تھیوݨ کنُوں زیادہ سوکھا ہے ۔

‏25 شاگرد ایہہ سُنڑ تے بہُوں حیران تھئے تے پُچھنڑ لگے وَل کوݨ نِجات پا سگدے ؟

‏26 یسُوع اُنہاں دو ڈیکھ تے آکھیا آدمی کیتے تاں ایہہ نا ممکن ہے پَر خُدا کیتے سبھ کُجھ ممکن ہے ۔

‏27 وَل پطرس جواب ءچ اُونکُوں آکھیا ڈیکھ اَساں سبھ کُجھ چھوڑ تے تیڈے پِچُھوں تھی پئے ہاں ۔ بس ساکوں کیا مِلسی ؟

‏28 یسُوع اُنہاں کُوں آکھیا میں تُہاکُوں سچ آہدھا ہاں جو نویں دُنیا ءچ جِیں وَیلے ابن ِآدم آپنڑے جلالی تخت اُتے بَہسی تاں تُساں وی جیہڑے میڈے پِچُھوں تھی پئے ہِوے بارہاں تختاں اُتے بہہ تے اِسرائیل دے بارہاں قبیلیاں دا انصاف کریسو۔ ‏29 تے جئیں کہیں گھراں یا بِھراواں یا بھینڑاں یا پیُو یا ماں یا بالاں یا رَڑھاں کُوں میڈے ناں دی خاطر چھوڑ ڈِتے اُونکُوں سَو گُنا ملسی تے اوہ ہمیشاں دی زندگی دا وارث تھیسی ۔ ‏30 پَر بہُوں سارے جیہڑے اوّل ہِن آخر تھی ویسن تے آخر اوّل ۔