تاکسِتان تے مزدور
20
1 کیوں جو اَسمان دی بادشاہی اُوں گھر دے مالک وانگوں ہے جیہڑا سویر نال باہر گِیا تاں جو آپنڑے تاکِستان ءچ مَزدوراں کُوں کَم تے لاوے ۔ 2 تے اُوں مزدوراں نال ہِک ڈیہنوار دی مَزدوری ہِک دینار مُکا تے اُنہاں کُوں آپنڑے تاکِستان ءچ بھیج ڈِتّا۔ 3 کوئی تَرے گھنٹے بعد اوہ وَلا باہر گِیا تاں اُوں ڈِٹھا جو کُجھ مَزدور بازار ءچ بیکار کھڑے ہِن ۔ 4 تے اُنہاں کُوں آکھیا تُساں وی میڈے تاکِستان ءچ چلے ونجو۔ جیہڑا مناسب ہے تُہاکُوں ڈیساں۔ بس اوہ چلے گئے ۔ 5 وَل ڈوپہر تے تَریجھے پہر دے نیڑے نِکل تے اُونیں ایویں ای کیتا ۔ 6 تے اوہ ڈینہہ لَہنڑ کنُوں پہلے وَلا باہر گِیا تے کُجھ بئیاں کُوں کھڑے ڈِٹھا تے اُنہاں کُوں آکھیا تُساں کیوں اِتھاں سارا ڈینہہ نِکمے کھڑے رَہے؟ 7 اُنہاں اُونکُوں آکھیا اِیں واسطے جو ساکُوں کہیں کَم تے کھَڑایا ای نئیں ۔ اُونیں اُنہاں کُوں آکھیا تُساں وی تاکِستان ءچ چلے ونجو ۔8 جِیں وَیلے شام تھئی تاں تاکِستان دے مالک آپنڑے مُنشی کُوں آکھیا جو آخر ءچ کَم اُتے کھڑائے ہوئے مزدوراں کنُوں گھِن تے پہلے تَئیں سبھ کُوں سَڈ تے اُنہاں دی مزدوری ڈے چا ۔ 9 جِیں وَیلے اوہ آئے جیہڑے ڈینہہ لہندے کنُوں کُجھ دیر پہلے کھڑائے گئے ہَن تاں اُنہاں کُوں ہِک ہِک دینار ملیا ۔ 10 جِیں وَیلے پہلے مزدور آئے تاں اُنہاں ایہہ سمجھیا جو ساکُوں زیادہ مِلسی تے اُنہاں کُوں وی ہِک ای دِینار مِلیا ۔ 11 تے اُونکُوں گھِن تے گھر دے مالک کُوں ایہہ آہدھے ہوئے شکایت کرݨ لگے جو 12 آخر ءچ کَم اُتے کھڑائے وَنجنڑ آلیاں صِرف ہِک گھنٹہ کَم کیتے تے اَساں دُھپ ءچ سارا ڈینہہ محنت کیتی پَر تَیں اُنہاں کُوں ساڈے برابر کر ڈِتّے ۔
13 اُونیں جواب ڈے تے اُنہاں ءچوں ہِک کُوں آکھیا مِیاں میں تیڈے نال بے اِنصافی نئیں کریندا ۔ کیا تیڈے نال مزدوری دا ہِک دینار نہ مُکا ہا ؟ 14 جیہڑا تیڈا ہے گِھن تے ٹُردا تھی ۔ ایہہ میڈی مرضی ہے جو جتّی تیکوں ڈیندا پیا ہاں اُتنا ای آخری کُوں ڈیواں ۔ 15 کیا میکُوں ایہہ حق نئیں جو آپنڑے مال نال جو چاہواں کراں ؟ یا تیکُوں میڈی نیکی بُری لگدی ہے ؟
16 بس جیہڑے آخر ہِن اوّل، تے جیہڑے اوّل ہِن آخر تھی ویسن ۔
یسُوع تَریجھی پھیری آپنڑیں موت دی گالھ کریندے
17 تے یروشلِیم ویندے ہوئے یسُوع بارہاں شاگرداں کُوں الگ گھِن گِیا تے رستے ءچ اُنہاں کُوں آکھیا 18 ڈیکھو اَساں یروشلِیم کُوں ویندے ہاں تے ابن ِآدم سردار کاہناں تے فقیہاں دے حوالے کر ڈِتا ویسی ۔ تے اوہ اُوندے قتل دا حُکم ڈیسن ۔ 19 تے اُونکُوں غیرقوماں دے حوالے کر ڈیسن تاں جو اوہ اُوندا مذاق اُڈاوݨ تے کوڑے مارݨ تے مصلُوب کرݨ تے اوہ تَریجھے ڈینہہ زندہ تھی ویسی۔
ہِک ماں دی اِلتجا
20 اُوں وَیلے زبدی دے پوتراں دی ماں آپنڑے پوتراں دے نال یسوع دے کولھ آئی تے اُونکُوں سِجدہ کیتا تے اُونکُوں کُجھ عرض کرݨ لگی ۔
21 اُونیں اُونکُوں آکھیا جو تُوں کیا چاہندی ہیں ؟
اُونیں اُونکُوں آکھیا فرما جو تیڈی بادشاہی ءچ میڈے پوتراں ءچوں ہِک تیڈے سجے پاسوں تے ڈوجھا تیڈے کھبے پاسوں بَہوے ۔
22 پَر یسُوع جواب ڈے تے آکھیا تُساں نئیں جانڑدے جو کیا منگدے ہِوے ۔ کیا تُساں اوہ پیالہ پی سگدے ہِوے جیہڑا میں پیہوݨ آلا ہاں ؟
اُنہاں اُونکُوں آکھیا اَساں پی سگدے ہاں ۔
23 اُونیں اُنہاں کُوں آکھیا تُساں میڈا پیالہ تاں پِیسو پَر کہیں کُوں آپنڑے سجے یا کھبے پاسوں بِلہاونڑاں میڈا کَم نئیں پَر جنہاں کیتے میڈے باپ دی طرفوں تیار کیتا گِیا اُنہاں کیتے ہے ۔
24 تے جِیں وَیلے ڈاہاں ایہہ سُنڑیا تاں اوہ اُنہاں ڈوہاں بِھراواں نال خفا تھئے ۔ 25 پَر یسُوع اُنہاں کُوں آپنڑے کولھ سَڈیا تے آکھیا تُہاکُوں پتا ہے جوغیر قوماں دے سردار اُنہاں اُتے حکومت کریندے ہِن تے امِیر اُنہاں اُتے اِختیار جتیندے ہِن ۔ 26 تُہاڈے ءچ اِیویں نہ ہوسی بلکہ تُہاڈے ءچ جیہڑا وَڈا بننڑ چاہوے اوہ تُہاڈا خادم بنڑے ۔ 27 تے جیہڑا تُہاڈے ءچ اوّل تھیوݨ چا ہوے اوہ تُہاڈا غلام بنڑے ۔ 28 ابن ِآدم اِیں واسطے نئیں آیا جو خدمت گھِنے بلکہ اِیں واسطے جو خدمت کرے تے آپنڑیں جان بہُوں ساریاں کیتے فِدیہ ءچ ڈیوے ۔
یسُوع ڈو اندھیاں کُوں شِفا ڈیندے
29 تے جِیں وَیلے اوہ یرِیحو ءچوں نکلدے پئے ہَن تاں ہِک وَڈی بِھیڑ اُوندے پِچُھوں تھی پئی ۔ 30 تے ڈیکھو ڈو اندھے جیہڑے راہ دے کِنارے بیٹھے ہَن ایہہ سُنڑتے جو یسُوع لنگھدا پئے تاں اوہ چیخنڑ پے گئے اے خُداوند ابن ِ داؤد ساڈے اُتے رحم کر ۔
31 لوکاں اُنہاں کُوں دڑکیا جو چُپ رَہوِݨ پَر اوہ تاں مزید چیخ تے آکھنڑ لگے اے خُداوند ابن ِ داؤد ساڈے اُتے رحم کر ۔
32 یسُوع کھڑ تے اُنہاں کُوں سَڈ یا تے پُچھیا ڈساؤ جو میں تُہاڈے کیتے کیا کراں؟
33 اُنہاں اُونکُوں آکھیا اے خُداوند اِ یہو جو ساڈے اِکھیں کھُل وَنجنڑ ۔
34 یسُوع کُوں اُنہاں اُتے ترس آیا تے اُنہاں دے اَکھیں کُوں ہَتھ لایا تے اوہ فوراً ڈیکھنڑ پے گئے تےاُوندے پِچُھوں ٹُر پئے ۔