یروشلِیم ءچ شاہانہ داخلہ
21
1 تے جِیں وَیلے اوہ یروشلِیم دے نیڑے پُجے تاں زیتون دے پہاڑ اُتے بیت فگے دے کولھ آئے تے یسُوع آپنڑے ڈو شاگرداں کُوں ایہہ آکھ تے بھیجیا جو 2 آپنڑے سامنڑے آلے دیہات ءچ ونجو ۔ اُوندے ءچ داخل تھیندے ای تُہاکُوں ہِک گڈھاں بَدھی ہوئی مِلسی تے اُوندے نال اُوندا بچہ وی ہوسی اُنہاں کُوں کھول تے میڈے کولھ گھِن آؤ ۔ 3 تے جے کوئی تُہاکُوں کُجھ آکھے تاں اَکھائے جو خُداوند کُوں اِنہاں دی ضرورت ہے ۔ اوہ فوراً اُنہاں کُوں بھیج ڈیسی ۔4 ایہہ اِیں واسطے تِھیّا جو جیہڑا کُجھ نبی دی معرفت آکھیا گیا ہا اوہ پورا تھیوے جو
5 صِیُّون دی دِھی کُوں آکھو جو
ڈیکھ تیڈا بادشاہ تیڈے کولھ آندا ہے ۔
اوہ حلیم ہے تے گڈھا ں اُتے سوار ہے
بلکہ گڈھاں دے بچّے اُتے۔
6 بس شاگرداں وَنج تے جیویں یسُوع اُنہاں کُوں حُکم ڈِتا ہا اُونویں ای کیتا ۔ 7 تے گڈھاں تے اُوندے بچّےکُوں گھِن تے آپنڑے کپڑے اُوندے اُتے سَٹ ڈِتے تے اوہ اُوندے اُتے سوار تھی گِیا ۔ 8 تے بِھیڑ ءچوں بہُوں سارے لوکاں آپنڑے کپڑے رستےءچ وِچھا ڈِتے تے بئیاں نیں درختاں دیاں لڑیاں کَپ تے راہ ءچ وِچھا ڈِتیاں ۔ 9 تے بِھیڑ جیہڑی اُوں دے اَگُوں تے پِچُھوں ٹُردی پئی ہئی نعرے مار مار تے آہدھی ہئی ابن ِ داؤد کُوں ہوشعناa۔ مُبارک ہے اوہ جیہڑا خُداوند دے ناں کنُوں آندے ۔ عالم ِبالا اُتے ہوشعنا ۔
10 تے جِیں وَیلے اوہ ہ یروشلِیم ءچ داخل تِھیّا تاں سارے شہر ءچ ہلچل مچ گئی تے لوک آکھنڑ لگے جو ایہہ کوݨ ہے ؟
11 بِھیڑ آکھیا ایہہ گلیل دے شہر ناصرت دا نبی یسُوع ہے ۔
یسُوع ہیکل ءچ ویندے
12 تے یسُوع خُدا دی ہیکل ءچ داخل تھی تے اُنہاں ساریاں کُوں جیہڑے اُتھاں خرید و فروخت کریندے پئے ہَن باہر کڈھ ڈِتّا تے صرافیاںb دِیاں میزاں تے کبوتر ویچنڑ آلیاں دے کُھڈےاُلٹ ڈِتے ۔ 13 تے اُنہاں کُوں آکھیا لکھیا ہے جو میڈا گھر دُعا دا گھر اکھویسی پَر تُساں اُونکُوں ڈاکُوأں دا ڈیرہ بنڑا ڈِتے ۔
14 وَل اندھے تے مَنڈے ہیکل ءچ اُوندے کولھ آئے تے اُونیں اُنہاں کُوں شِفا بخشی ۔ 15 پَر جِیں وَیلے سردار کاہناں تے فقیہاں اُوندے معجزے ڈِٹھے تے ہیکل ءچ چھوہراں کُوں ابن ِ داؤد کُوں ہوشعنا دے نعرے مریندے ڈِٹھا تاں کوِڑیج گئے ۔ 16 تے اُونکُوں آکھیا تُوں سُنڑدا پئیں جو ایہہ کیا آہدھن؟
یسُوع اُنہاں کُوں آکھیا ہاں ۔ کیا تُساں ایہہ کڈھائیں نئیں پڑھیا جو تَیں بالاں تے کھیر پیہوݨ آلیاں دے مُنہ کنُوں وی آپنڑیں حمد کُوں کامل کروایا؟
17 اوہ اُنہاں کُوں چھوڑ تے شہر کنُوں باہر بیت عنیاہ ءچ گِیا تے رات اُتھائیں گُزاری ۔
یسُوع ہنجیر دے درخت اُتے لعنت کریندے
18 سویر نال جِیں وَیلے وَل اوہ شہردو آندا پیا ہا تاں اُونکُوں بُھک لگی ۔ 19 تے اوہ رستے ءچ ہنجیر دا ہِک د رخت ڈِیکھ تے اُوندے نیڑے گِیا تے سِوائےپَتراں دے اُوندے اُتے بِیا کُجھ نہ پا تے اُونکُوں آکھیا جو وَلا کڈھائیں تیکُوں پھل نہ لگے تے اُونہئی وَیلے ہنجیر دا درخت سُک گِیا ۔
20 شاگرداں ایہہ ڈِٹھا تاں حیران تھی تے آکھنڑ لگے ایہہ ہنجیر دا درخت ہِک دم کیویں سُک گِیا ؟
21 یسُوع جواب ءچ اُنہاں کُوں آکھیا میں تُہاکُوں سچ آہدھا ہاں جو جے اِیمان رکھو تے شک نہ کرو تاں تُساں نہ صِرف اوہ جیہڑا ہنجیر دے درخت نال تھئے کر سگسو بلکہ جے اِیں پہاڑ کُوں وی اَکھیسو جو پٹیج تے سمندر ءچ وَنج ڈھے تاں اُونویں ای تھی ویسی ۔ 22 تے جیہڑا کُجھ تُساں دُعا ءچ اِیمان نال منگسو اوہ تُہاکُوں مِلسی ۔
یسُوع دے اِختیار اُتے اعتراض
23 تے جِیں وَیلے اوہ ہیکل ءچ آ تے تعلیم ڈیندا پیا ہا تاں سردار کاہناں تے قوم دے بُزرگاں اُوندے کولھ آتے آکھیا تُوں اِنہاں کَماں کُوں کِیں اِختیار نال کریندیں ؟ تے تیکُوں ایہہ اِختیار کَیں ڈِتے ؟
24 یسُوع جواب ءچ اُنہاں کُوں آکھیا میں وی تُہاڈے کنُوں ہِک گالھ پُچھدا ہاں ۔ جے تُساں اُوندا جواب ڈیسو تاں میں وی ڈسا ڈیساں جو اِنہاں کَماں کُوں کِیں اِختیار نال کریندا ہاں ۔ 25 یُوحنّا دا بپتسمہ کِتُّھوں ہا ؟ اَسمان دی طرفوں یا اِنسان دی طرفوں ؟
اوہ آپس ءچ تکرار کرݨ لگے جو جے اَساں آکھوں جو اَسمان دی طرفوں ہا تاں اوہ ساکُوں اَکھیسی وَل تُساں اُوندا یقین کیوں نہ کیتا ؟ 26 پَر جے آکھوں جو اِنسان دی طرفوں تاں اَساں عوام کنُوں ڈر دے ہاں کیوں جو سبھ یُوحنّا کُوں نبی منیندے ہِن ۔ 27 بس اُنہاں جواب ءچ یسُوع کُوں آکھیا اَساں نئیں جانڑدے۔ اُونیں وی اُنہاں کُوں آکھیا مَیں وی تُہاکُوں نئیں ڈسیندا جو اِنہاں کَماں کُوں کِیں اِختیار نال کریندا ہاں ۔
ڈو پوتراں دی تمثیل
28 تُساں کیا سمجھدے ہِوے ؟ ہِک آدمی دے ڈو پوتر ہَن ۔ اُونیں پہلے دے کولھ وَنج تے آکھیا پوتر اَج تاکِستان ءچ کَم کر ۔ 29 اُونیں جواب ءچ آکھیا مَیں نہ ویساں پَر بعد ءچ پشیمان تھی تے چلیا گِیا ۔ 30 وَل ڈوجھے دے کولھ وَنج تے اُونیں اِیویں ای آکھیا ۔ اُونیں جواب ڈِتّا اچھا جناب ۔ پَر نہ گِیا ۔ 31 اِنہاں ڈوہاں ءچوں کیہڑے نیں پیُو دا حُکم منیا ؟
اُنہاں اُونکُوں آکھیا پہلا ۔
یسُوع اُنہاں کُوں آکھیا میں تُہاکُوں سچ آہدھا ہاں جو محصُول گِھننڑ آلے تے کسبِیاں تُہاڈے کنُوں پہلے خُدا دی بادشاہی ءچ داخل تھیسن ۔ 32 کیوں جو یُوحنّا تُہاکُوں راستبازی دا رستہ ڈِکھاوݨ آیا تے تُساں اُوند ا یقین نہ کیتا پَر محصُول گِھننڑ آلیاں تے کسبِیاں اُوندا یقین کیتا تے ایہہ ڈیکھ تے وی تُساں پشیمان نہ تھئے جو اُوندا یقین کر گِھندے ۔
تاکِستان دے ٹھیکیداراں دی تمثیل
33 ہِک بئی تمثیل سُنڑو ۔ ہک گھر دا مالک ہا جئیں تاکِستان رَہایا تے اُوندے چارے پاسوں واڑ ڈِتّی تے اُوندے ءچ حوض کھودیا تے بُرج بنڑایا تے اُونکُوں ٹھیکیداراں کُوں کاشتکاری کیتے ڈے تے آپ پردیس ٹُر گِیا ۔ 34 جِیں وَیلے پھل دا موسم نیڑے آیا تاں اُونیں آپنڑے نوکراں کُوں آپنڑاں پھل گِھننڑ کیتے ٹھیکیداراں دے کولھ بھیجیا ۔ 35 تےٹھیکیداراں اُوندے نوکراں کُوں پکڑ تے کہیں کُوں کُٹیا تے کہیں کُوں قتل کیتا تے کہیں کُوں سنگسار کِیتا ۔ 36 وَل اُونیں بئے نوکراں کُوں بھیجیا جیہڑے پہلے نوکراں کنُوں زیادہ ہَن تے اُنہاں اِنہاں نال وی اُو ہو سلوک کیتا ۔ 37 آخر ءچ اُونیں آپنڑے پوتر کُوں اُنہاں دے کولھ بھیجیا جو میڈے پوتر دی تاں دید کریسن ۔ 38 جِیں وَیلے ٹھیکیداراں اُوندے پوتر کُوں ڈِٹھا تاں آپس ءچ آکھنڑ لگے اِیہو وارث ہے ۔ آؤ اِینکُوں قتل کر تے اِیندی جائیداد اُتے قبضہ کر گھِنوں ۔ 39 تے اُونکُوں پکڑ تے تاکِستان کنُوں باہر کڈھیا تے جان کنُوں مار سُٹیا ۔
40 بس جِیں وَیلے تاکِستان دا مالک آسی تاں اُنہاں ٹھیکیداراں دے نال کیا کریسی؟
41 اُنہاں اُونکُوں آکھیا اُنہاں بدکاراں کُوں بُری طرح مار گھتیسی تے تاکِستان دا ٹھیکہ بئے ٹھیکیدارں کُوں ڈیسی جیہڑےموسم اُتے اُونکُوں پھل ڈیوݨ ۔
42 یسُوع اُنہاں کُوں آکھیا کیا تُساں خُدا دے کلام ءچ کڈھائیں نئیں پڑھیا جو
جِیں پتھر کُوں مِستریاں رَد کر ڈِتا ۔
اُوہو کونے دے سِرے دا پتھر تھی گِیا ۔
ایہہ خُداوند دی طرفوں تھیّا
تے ساڈی نطر ءچ عجیب ہے ؟
43 اِیں واسطے میں تُہاکُوں آہدھا ہاں جو خُدا دی بادشاہی تُساں کنُوں گھِن گھِدی ویسی تے اُوں قوم کُوں جیہڑی اُوندے پھل گھِن آوے ڈے ڈِتی ویسی۔ 44 تے جیہڑا اِیں پتھر اُتے ڈھاسی ٹوٹے ٹوٹے تھی ویسی پَرجِیندے اُتے ایہہ ڈھاسی اُونکُوں پِیہہ تے رکھ ڈیسی ۔