شادی دی ضیافت دی تمثیل
22
1 تے یسُوع وَل تمثیلاں ءچ اُنہاں کُوں آکھنڑ لگا جو 2 اَسمان دی بادشاہی اُوں بادشاہ وانگوں ہے جئیں آپنڑے پوتر دی شادی کیتی ۔ 3 تے آپنڑے نوکراں کُوں بھیجیا جو اُنہاں لوکاں کُوں جنہاں کُوں شادی دی دعوت ڈِتی گئی ہَئی سَڈ آوݨ پَر اوہ نہ آئے ۔ 4 وَل اُوں بئے نوکراں کُوں ایہہ آکھ تے بھیجیا جو جنہاں کُوں دعوت ڈِتی ہے اُنہاں کُوں آکھو جو ڈیکھو ضیافت تیار تھی گئ ہے ۔ میڈے ڈاند تے موٹے موٹے جانور ذبح تھی گئے ہِن تے سبھ کُجھ تیار ہے ۔ شادی ءچ آ ؤ ۔ 5 پَر اُنہاں کوئی پر وا نہ کیتی تے ٹُر پئے ۔ کوئی آپنڑیں رَڑھ کُوں، کوئی آپنڑے کاروبار ءچ لگ گِیا ۔ 6 تے بئیاں اُوندے نوکراں کُوں پکڑ تے اُنہاں دی بے عزتی کیتی تے جان کنُوں مار ڈِتّا۔ 7 بادشاہ بہُوں کَوڑ یج گِیا تے اُوں آپنڑا لشکر بھیج تے اُنہاں قاتلاں کُوں مروا ڈِتا تے اُنہاں دا شہر ساڑ ڈِتا ۔ 8 وَل اُوں آپنڑے نوکراں کُوں آکھیا شادی دی ضیافت تاں تیار ہے پَر جیہڑے سَڈےگئے ہَن لائق نہ ہَن ۔ 9 بس رستے دے چوکاں اُتے وَنجو تے جِتی تُہاکُوں مِلنڑ شادی ءچ گھِن آؤ ۔ 10 تے اوہ نوکر گئے تے جِتی بُرے بَھلے اُنہاں کُوں ملے ساریاں کُوں جمع کر تے گھِن آئے تے شادی آلا گھر مہماناں نال بھریج گِیا ۔11 تے جِیں وَیلے بادشاہ مہماناں کُوں ڈیکھنڑ اندر آیا تاں اُوندی نگاہ ہِک آدمی اُتے گئی جیہڑا شادی آلے جوڑے ءچ نہ ہا ۔ 12 اُونیں اُونکُوں آکھیا میاں تُوں شادی آلا جوڑا پاتے بغیر اِتھاں کیوں آ گئیں؟ پَر اُوندی زُبان بند تھی گئی ۔ 13 اِیں وجہ تُوں بادشاہ آپنڑے خادماں کُوں آکھیا اِیندے ہَتھ پیر بَدھ تے باہر اندھارے ءچ سَٹ ڈیؤ ۔ اُتھاں روݨ تے ڈنداں دا پیہوݨ ہوسی ۔
14 کیوں جو سَڈے ہوئے بہُوں ہِن پَر چُنڑیں ہوئے تھوڑے ۔
جَزیہ ڈیوݨ دے بارے ءچ سوال
15 وَل فریسی وَنج تے آپس ءچ صلاح کرݨ پے گئے جو کِیں طرحاں اُونکُوں گالھیں ءچ پھساوݨ ۔ 16 بس اُنہاں آپنڑے شاگرداں کُوں ہیرودیاں دے نال اُوندے کولھ بھیجیا تے اُنہاں آکھیا اے اُستاد اَساں جانڑدے ہاں جو تُوں سچا ہیں تے سچائی نال خُدا دی راہ دی تعلیم ڈیندیں تے کہیں دی پرواہ نئیں کریندا کیوں جو تُوں کہیں آدمی دا طرفدار نئیں ۔ 17 بس ساکُوں ڈسا جو تیڈے خیال ءچ قیصر کُوں جَزیہ ڈیوݨ جائز ہے یا نئیں ؟
18 یسُوع اُنہاں دی شرارت کُوں سمجھ تے آکھیا اے منافقو میکُوں کیوں اَزمیندے ہِوے ؟ 19 جَزیہ دا سِکہ میکُوں ڈِکھاؤ ۔
اوہ ہِک دِینار اُوندے کولھ گِھن آئے ۔ 20 اُونیں اُنہاں کُوں آکھیا اِیندے اُتے کِیندی صورت تے کَیندا ناں لِکھیا ہے ؟
21 اُنہاں اُونکُوں آکھیا قیصر دا ۔
وَل اُونیں اُنہاں کُوں آکھیا جیہڑا قیصر دا ہے قیصر کُوں تے جیہڑا خُدا دا ہے خُدا کُوں ڈیؤ ۔
22 اوہ ایہہ سُنڑ تے حیران تھی گئے تے اُونکُوں چھوڑ تے چلے گئے ۔
مُردیاں دی قیامت دے بارے ءچ سوال
23 اُونہئی ڈینہہ صدوقی جیہڑے قیامت دے منکر ہَن اُوں دے کولھ آئے تے اُوں کنُوں ایہہ پُچھیا جو 24 اے اُستاد مُوسیٰ آکھیا ہا جو جے کوئی آدمی بے اولاد مَر وَنجے تاں اُوندا بِھرا بیوہ نال نکاح کر گھِنے تاں جو آپنڑے بِھرا کیتے نسل پیدا کرے ۔ 25 ہُنڑ ساڈے اِتھاں سَت بِھرا ہَن تے پہلے بِھرا شادی کیتی تے مَر گِیا تے اِیں وجہ کنُوں جو اُوندے اولاد نہ ہئی آپنڑیں ذال آپنڑے بِھرا کیتے چھوڑ گِیا ۔ 26 اِیں طرحاں ڈوجھے تے تَریجھے وی سَتاں تَئیں ۔ 27 آخر کار اوہ عورت وی مَر گئی ۔ 28 بس اوہ قیامت آلے ڈینہہ اُنہاں سَتاں بِھراواں ءچوں کِیندی ذال ہوسی ؟ کیوں جو سبھ نیں اُوندے نال نکاح کیتا ہا ۔
29 یسُوع اُنہاں کُوں جواب ءچ آکھیا جو تُساں گُمراہ ہِوے اِیں واسطے جو نہ تاں خُدا دے کلام کُوں جانڑدے ہِوے نہ خُدا دی قُدرت کُوں ۔ 30 کیوں جو قیامت ءچ ویاہ شادی نہ تھیسی بلکہ لوک اَسمان اُتے فرشتیاں وانگوں ہوسن ۔ 31 پَر مُردیاں دے زندہ تھیوݨ دے بارے ءچ جو خُدا تُہاکُوں فرمایا ہا کیا تُساں اوہ نئیں پڑھیا جو 32 مَیں ابرہام دا خُدا تے اِضحاق دا خُدا تے یعقوب دا خُدا ہاں ؟ اوہ مُردیاں دا خُدا نئیں بلکہ زندیاں دا خُدا ہے ۔
33 لوک اُوندی ایہہ تعلیم سُنڑ تے حیران تھی گئے ۔
سبھ کنُوں وَڈا حُکم
34 تے جِیں وَیلے فریسیاں سُنڑیا جو اُونیں صدوقیاں دا مُنہ بند کر ڈِتے تاں اوہ جمع تھی گئے ۔ 35 تے اُنہاں ءچوں ہِک شریعت دے عالم نیں اُوں کُوں اَزماو ݨ کیتے اُوندے کنُوں پُچھیا ۔ 36 اے اُستاد تَورَیت ءچ سبھ کنُوں وَڈا حُکم کیہڑا ہے ؟
37 اُونیں اُونکُوں آکھیا جو خُداوند آپنڑے خُدا نال آپنڑے سارے دل تے آپنڑیں ساری جان تے آپنڑیں ساری عقل نال محبت رکھ۔ 38 وَڈا تے پہلا حُکم اِیہو ہے ۔ 39 تے ڈوجھا اِیندے وانگوں ایہہ ہے جو آپنڑے ہمسائےنال آپنڑے وانگوں محبت رکھ ۔ 40 ساری شریعت تے نبیاں دی کتاباں دا مَدار اِنہئیں ڈُو حُکماں اُتے ہے ۔
مسیح ِ مَوعُود دے بارے ءچ سوال
41 تے جیہڑے وَیلے فریسی جمع تھئے تاں یسُوع اُنہاں کنُوں پُچھیا ، 42 المسیح دے بارے ءچ تُہاڈا کیا خیال ہے ؟ اوہ کِیندا پوتر ہے ؟
اُنہاں اُونکُوں آکھیا داؤد دا ۔
43 اُونیں اُنہاں کُوں آکھیا وَل داؤد رُوح القُدس دی ہدایت نال اُونکُوں خُداوند کِیویں آہدھا ہے جو
44 خُداوند نیں میڈے خُداوند کُوں آکھیا
میڈے سجے پاسوں بہہ
جئیں تَئیں میں تیڈے دشمنڑاں کُوں تیڈے پَیراں دے
تَلے نہ کر ڈیواں ؟
45 بس جِیں وَیلے داؤد اُونکُوں خُداوند آہدھے تاں اوہ اُوندا پوتر کیویں تھیّا ؟
46 تے کوئی ہِک لفظ وی اُوندے جواب ءچ نہ آکھ سگیا تے اُوں ڈینہہ دے بعد نہ ای کہیں کُوں جرات تھئی جو اُوں کنُوں مزید سوال کرݨ ۔