یسُوع فقیہاں تے فریسیاں دے خِلاف خبردار کریندے
23
1 اُوں وَیلے یسُوع بِھیڑ تے آپنڑے شاگرداں کُوں آکھیا جو 2 فقیہہ تے فریسی مُوسیٰ دی گدی اُتے بیٹھے ہِن ۔ 3 بس جیہڑا کُجھ اوہ تُہاکُوں سِکھاوݨ اوہ سبھ مَنو تے اُوندے اُتے عمل کرو پَر اُنہاں وانگوں کَم نہ کرو کیوں جو اوہ آہدھے تاں ہِن پَر عمل نئیں کریندے ۔ 4 اوہ ایجھے بھاری وزن جنہاں کُوں چاوݨ اوکھا ہے بَدھ تے لوکاں دے مونڈھیاں اُتے رکھیندے ہِن پَر آپ اُنہاں کُوں اَنگل وی نئیں لیندے ۔ 5 اوہ آپنڑے سبھ کَم لوکاں کُوں ڈِکھاوݨ کیتے کریندے ہِن کیوں جو اوہ وَڈے تعویذ پیندن تے آپنڑیں پُشاک دے گھیرے چوڑے رکھیندن 6 تے اوہ ضیافتاں ءچ مجلس دی امیری تے عبادت خانیاں ءچ اُچیاں کرسیاں ۔ 7 تے بازاراں ءچ سلام تے آدمیاں کنُوں ربّی اَکھواوݨ پسند کریندے ہِن ۔ 8 پَر تُساں ربّی نہ اَکھواؤ کیوں جو تُہاڈا اُستاد ہِکو ہے یعنی مسیح تے تُساں سبھ بِھرا ہِوے ۔ 9 زمین اُتے کہیں کُوں آپنڑا باپ نہ آکھو کیوں جو تُہاڈا باپ ہِکُو ہے جیہڑا اَسمان اُتے ہے ۔ 10 نہ تُساں ہادی اَکھواؤ کیوں جو تُہاڈا ہِکو ہادی ہے یعنی المسیح ۔ 11 پَر جیہڑا تُساں ءچوں وَڈا ہے اوہ تُہاڈا خادم بنڑے ۔ 12 تے جیہڑا کوئی آپنڑے آپ کُوں وَڈا بنڑیسی اوہ چھوٹا کیتا ویسی تے جیہڑا آپنڑے آپ کُوں چھوٹا بنڑیسی اوہ وَڈا کیتا ویسی۔یسُوع اُنہاں دی مُنافقت دی مذمّت کریندے
13 اے منافق فقیہو تے فریسیو، تُساں اُتے افسوس! جو تُساں اَسمان دی بادشاہی لوکاں اُتے بند کریندے ہِوے کیوں جو نہ تاں آپ داخل تھیندے ہِوے تے نہ اُنہاں کُو ں جیہڑے داخل تھیوݨ چاہندے ہِن داخل تھیوݨ ڈیندے ہِوے ۔ 14 (اے منافق فقیہو تے فریسیو، تُساں اُتے افسوس ! جو تُساں بیواواں دے گھراں اُتے قبضہ کر گھِندے ہِوے تے ڈِکھاوے کیتے لمبیاں لمبیاں دُعاواں کریندے ہِوے ۔ تُہاکُوں زیادہ سزا مِلسی )۔
15 اے منافق فقیہو تے فریسیو، تُساں اُتے افسوس ! جو ہِک مُرید بنڑاوݨ کیتے تَری تے خشکی دا سفر کریندے ہِوے تے جِیں وَیلے بنڑا گھِندے ہِوے تاں اُونکُوں آپنڑے کنُوں ڈُگنڑاں جہنم دا فرزند بنڑا ڈیندے ہِوے ۔
16 اے اندھےراہنماؤ، تُساں اُتے افسوس! جیہڑے آہدھے ہِوے جو جے کوئی مَقدِس دی قسم کھاوے تاں کوئی ہرج نئیں پَر جے مَقدِس دے سونے دی قسم کھاوے تاں اُوندا پابند ہوسی ۔ 17 اے نادانو تے اندھو، وَڈا کیا ہے سونا یا مَقدِس جئیں سونے کُوں پاک کیتا ؟ 18 تے وَل آہدھے ہِوے جو جے کوئی قربان گاہ دی قسم کھاوے تاں کوئی ہرج نئیں پَر جیہڑی نذر اُوندے اُتے چڑھائی ویندی ہے جے اُوندی قسم کھاوے تاں اُوندا پابند ہوسی ۔ 19 اے اندھیو وڈی چیز کیہڑی ہے نذر یا قربان گاہ جیہڑی نذر کُوں پاک کریندی ہے ؟ 20 بس جیہڑا کوئی قربان گاہ دی قسم کھاندے اوہ اُوندی تے اُوندے اُتے چڑھائی وَنجنڑ آلیاں سبھ چیزاں دی قسم کھاندے ۔ 21 تے جیہڑا مَقدِس دی قسم کھاندے اوہ اُوندی تے اُوندے ءچ رَہنڑ آلے دی قسم کھاندے ۔ 22 تے جیہڑا کوئی اَسمان دی قسم کھاندے اوہ خُدا دے تخت دی تے اُوندے اُتے بَہنڑ آلے دی قسم کھاندے ۔
23 اے منافق فقیہو تے فریسیو، تُساں اُتے افسوس! جو پودینہ تے سونف تے زِیرے دا ڈاہواں حصہ تاں ڈیندے ہِوے پَر شریعت دے زیادہ وزنی گالھیں یعنی اِنصاف تے رحم تے اِیمان کُوں چھوڑ ڈَتا ہے ۔ لازم ہا جو ایہہ وی کریندے تے اوہ وی نہ چھوڑیندے ۔ 24 اے اندھے راہنماؤ جو مچھر کُوں تاں چھڑیندے ہِوے تے اُٹھ کُوں نِگل ویندے ہِوے ۔
25 اے منافق فقیہو تے فریسیو، تُساں اُتے افسوس! جو تُساں پیالے تے تھالی کُوں باہر کنُوں صاف کریندے ہِوے پَر اُنہاں ءچ لُٹ دا مال تے بُرائی بھری پئی ہے ۔ 26 اے اندھے فریسی! پہلے پیالے تے تھالی کُوں اندر کنُوں صاف کر تاں جو اوہ باہر کنُوں وی صاف تھی وَنجنڑ ۔
27 اے منافق فقیہو تے فریسیو تُساں اُتے افسوس ! جو تُساں سفیدی تھئی ہوئی قبراں دے وانگوں ہِوے جیہڑیاں باہر کنُوں تاں سوہنڑیاں نظر آندیاں ہِن پَر اندر مُردیاں دیاں ہڈیاں تے ہر طرحاں دی پلیدگی کنُوں بھریاں ہِن ۔ 28 اِیں طرحاں تُساں وی باہر کنُوں تاں لوکاں کُوں راستباز نظر آندے ہِوے پَر اندروں منافقت تے بے دینی کنُوں بھرے پئے ہِوے ۔
یسُوع اُنہاں دی سزا دی پیشین گوئی کریندے
29 اے منافق فقیہو تے فریسیو، تُساں اُتے افسوس ! جو نبیاں دی قبراں بنڑیندے تے راست بازاں دے مقبرے سَجیندے ہِوے ۔ 30 تے آہدھے ہِوے جو جے اَساں آپنڑے باپ ڈاڈے دے زمانے ءچ ہوندے تاں نبیاں دے قتل کرݨ ءچ اُنہاں دا ساتھ نہ ڈیندے ۔ 31 اِیں طرحاں تُساں آپ ای منیندے ہِوے جو تُساں نبیاں دے قاتلاں دی نسل ہِوے ۔ 32 بس آپنڑے باپ ڈاڈے دیاں حرکتاں دی کمی تُساں پوری کرڈیؤ۔ 33 اے سَپو! اے ناگ دے بالو! تُساں دوزخ دے عذاب کنُوں کیویں بچ سو ؟
34 اِیں واسطے ڈیکھو میں نبیاں تے داناواں تے فقیہاں کُوں تُہاڈے کولھ بھجیندا ہاں ۔ تُساں اُنہاں ءچوں کُجھ کُوں قتل تے مصلُوب کریسو تے کُجھ کُوں آپنڑے عبادت خانیاں ءچ کوڑے مَریسو تے ہر شہر ءچ سَتیندے رَہسو ۔ 35 تاں جو ساریاں راستبازاں دا خُون جیہڑا زمین اُتے وہایا گِیا ہا، تُہاڈےاُتے آوے ۔ راستباز ہابل دے خُون کنُوں گھِن تے برکیاہ دے پوتر زکریاہ دے خون تَئیں جِینکُوں تُساں مَقدِس تے قربان گاہ دے اَدھ ءچ قتل کیتا۔ 36 میں تُہاکُوں سچ آہدھا ہاں جو اِیں زمانے دے لوکاں کُوں اِنہاں سارے گالھیں دا ذمہ دار کیتا ویسی۔
یروشلِیم کیتے یسُوع دی محبت
37 اے یروشلِیم! اے یروشلِیم! تُوں جیہڑا نبیاں کُوں قتل کریندا تے جیہڑے تیڈے کولھ بھیجے گئے اُنہاں کُوں سنگسارکریندا ہیں! میں کِتی دفعہ ایہہ چاہیا جو تیڈے بالاں کُوں اِیں طرحاں جمع کر گھِناں جیویں مُرغی آپنڑے چُوچیاں کُوں آپنڑے پَراں تَلے جمع کر گھِندی ہے پَر تُوں راضی نہ تِھیّا! 38 ڈیکھو تُہاڈا گھر تُہاڈے کیتے ویران چھوڑیا ویندے ۔ 39 کیوں جو میں تُہاکُوں آہدھا ہاں جو تُساں میکُوں ہُنڑ کنُوں اُوں وَیلے تَئیں اصلُوں نہ ڈیکھسو جئیں تَئیں ایہہ نہ اَکھیسو جو مُبارک ہے اوہ جیہڑا خُداوند دے ناں نال آندے ۔