یسُوع دے خِلاف سازش
26
1 تے جِیں وَیلے یسُوع ایہہ گالھیں کر گھدیاں تاں اُونیں آپنڑے شاگرداں کُوں آکھیا 2 تُہاکُوں پتا ہے جو ڈو ڈینہہ بعد عید ِ فسح ہے، تے ابن ِآدم کُوں پکڑوا ڈِتا ویسی تاں جو اوہ صلیب اُتے چڑھا ڈِتا وَنجے ۔3 اُوں وَیلے سردارکاہن تے قوم دے بزرگ سردارکاہن کائفا دی حویلی ءچ جمع تھئے ۔ 4 تے صلاح کیتی جو یسُوع کُوں دھوکے نال پکڑ تے قتل کر ڈیووں ۔ 5 پَر آکھنڑ لگے جو عید دے ڈینہاں ءچ نئیں، کِتھائیں اِیویں نہ تھیوے جو لوکاں ءچ ہنگامہ تھی وَنجے ۔
بیت عَنیاہ ءچ یسُوع اُتے عِطر پایا ویندے
6 تے یسُوع جیہڑے وَیلے بیت عنیاہ ءچ شمعون کوڑھی دے گھر ءچ ہا ۔ 7 تاں ہِک عورت سنگ ِ مَرمَر دے عطر دان ءچ قیمتی عطر گِھن تے اُوندے کولھ آئی، تے جیہڑے وَیلے اوہ کھانڑا کھاوݨ بیٹھا تاں اُوندے سِر اُتے وِیٹ ڈِتّا۔ 8 شاگرد ایہہ ڈیکھ تے ناراض تھئے تے آکھنڑ لگے جو ایہہ عطرکیوں ضائع کیتا گِیا ؟ 9 ایہہ تاں چنگی قیمت ءچ ویچ تے رقم غریباں کُوں ڈِتی وَنج سگدی ہا ۔
10 یسُوع ایہہ جانڑ تے اُنہاں کُوں آکھیا جو تُساں اِیں عورت کُوں کیوں پریشان کریندے ہِوے ؟ اِیں تاں میڈے نال چنگائی کیتی ہے ۔ 11 کیوں جو غریب غُربا تاں ہمیشاں تُہاڈے نال ہِن پَر میں تُہاڈے نال ہمیشاں نہ رَہساں ۔ 12 تے اُوں پہلے کنُوں ای میڈے بدن کُوں عطر نال میڈی تدفین کیتے تیار کر ڈِتے ۔ 13 میں تُہاکُوں سچ آہدھا ہاں جو ساری دُنیا ءچ جِتھاں کِتھائیں اِنجیل دی تبلیغ کیتی ویسی اُتھاں اُوندی یادگاری ءچ اُوندے اِیں کَم دا ذِکر وی کیتا ویسی ۔
یہُوداہ یسُوع کُوں پکڑواݨ کیتے سودا کریندے
14 وَل اُنہاں بارہاں ءچوں ہِک جِیندا ناں یہُوداہ اِسکریُوتی ہا، سردار کاہناں دے کولھ وَنج تے آکھیا جو 15 جے میں اُوں کُوں تُہاڈے حوالے کروا ڈیواں تاں تُساں میکُوں کیا ڈیسو؟ اُنہاں چاندی دے تریح سکے تول تے اُونکُوں ڈے ڈِتے ۔ 16 تے اوہ اُوں وَیلے کنُوں اُونکُوں پکڑواوݨ دے ٹھیک موقعے دی تاڑ ءچ رَہنڑ لگا ۔
یسُوع آپنڑے شاگرداں نال فسح دا کھانڑا کھاندے
17 عید ِ فطیر دے پہلے ڈینہہ شاگرداں یسُوع دے کولھ آتے پُچھیا جو تُوں کِتھاں چاہندا ہیں جو اَساں تیڈے کیتے فسح کھاونڑ دی تیاری کروں؟
18 اُونیں جواب ڈِتّا شہر ءچ فلاں شخص دے کولھ ونجو تے آکھو، اُستاد آہدھے جو میڈا وَیلہ نیڑے ہے۔ میں آپنڑے شاگرداں دے نال تیڈے گھر ءچ فسح دی عید منیساں ۔ 19 بس جیویں یسُوع نیں شاگرداں کُوں حُکم ڈِتا ہا اُنہاں اُونویں ای کیتا تے فسحa تیار کیتا۔
20 جِیں وَیلے شام تھئی تاں اوہ آپنڑے بارہاں شاگرداں دے نال کھانڑا کھاوݨ بیٹھا ۔ 21 تے کھاندے وَیلے اُونیں آکھیا میں تُہاکُوں سچ آہدھا ہاں جو تُساں ءچوں ہِک میکُوں پکڑ ویسی ۔
22 اُنہاں کُوں بہُوں ڈُکھ تِھیّا تے اوہ واری واری پُچھنڑ لگے اے خُداوند! کیا میں تاں نئیں ؟
23 اُونیں جواب ڈِتّا جیہڑا شخص میڈے نال تھاں ءچ ہَتھ بوڈ دے، اُوہو میکُوں پکڑ ویسی ۔ 24 ابن ِآدم تاں جیویں اُوندے حق ءچ لکھیا ہے، ویندا ای ہے پَر اُوں آدمی اُتے افسوس جِیندے وسیلے کنُوں ابن ِآدم پکڑوایا ویندے! اُوندے کیتے چنگا ہا جو اوہ پیدا ای نہ تھیندا ۔
25 وَل یہُوداہ جیہڑا اُونکُوں پکڑواوݨ کُوں ہا، بول پیا اےربّی ! کیا میں تاں نئیں ؟
اُونیں جواب ڈِتا تَیں آپ آکھ ڈِتے ۔
آخری کھانڑا
26 کھانڑا کھاندے وَیلے یسُوع روٹی گھِدی تے برکت ڈے تے تروڑی تے شاگرداں کُوں ڈے تے آکھیا گھِنو تے کھاؤ، ایہہ میڈا بدن ہے۔
27 وَل پیالہ گھِدا تے شُکر کیتا تے اُنہاں کُوں ڈے تے آکھیا تُساں سارے اِیندے ءچوں پِیؤ ۔ 28 کیوں جو ایہہ میڈا اوہ عہد دا خون ہے جیہڑا بہُوں ساریاں دے گُناہاں دی معافی کیتے وہایا ویندے ۔ 29 میں تُہاکُوں آہدھا ہاں جو میں انگور دا رَس وَلا کڈھائیں نہ پی ساں، جِیں وَیلے تَئیں جو آپنڑے باپ دی بادشاہی ءچ تُہاڈے نال نواں نہ پیواں ۔
30 وَل اوہ حمد کر تے اُتھوں کنُوں زیتون دے پہاڑ اُتے گئے ۔
پطرس دے اِنکار دی پیشین گوئی
31 وَل یسُوع اُنہاں کُوں آکھیا تُساں سارے اِیں رات میڈی وجہ کنُوں ڈگمگا ویسو کیوں جو لکھیا ہے جو
میں آجڑی کُوں مریساں
تے اِجڑ دیاں بھیڈاں کِھنڈ ویسن ۔
32 پَر میں آپنڑے زندہ تھیوݨ دے بعد تُہاڈے کنُوں پہلے گلیل ءچ پُج ویساں ۔
33 پطرس جواب ڈِتّا بھانویں تیڈی وجہ کنُوں سبھ ٹھوکرکھاوݨ، پَر میں کڈھائیں ٹھوکر نہ کھاساں۔
34 یسُوع آکھیا میں تیکُوں سچ آہدھا ہاں جو اِیں رات کُکڑ دے بانگ ڈیوݨ کنُوں پہلے تُوں تَرے پھیری میڈا اِنکار کریسیں ۔
35 پطرس اُونکُوں آکھیا جے تیڈے نال میکُوں مرنڑا وی پووے، وَل وی تیڈا اِنکار نہ کریساں۔
تے سارے شاگرداں وی اِیہو آکھیا ۔
یسُوع دی گتسمنی باغءچ دُعا
36 وَل یسُوع اُنہاں دے نال ہِک جاہ اُتے پُجیا جِیندا ناں گتسمنی ہا تے اُنہاں کُوں آکھیا تُساں اِتھاں بَہو، جئیں تَئیں میں اُتھاں وَنج تے دُعا کراں ۔ 37 تے پطرس تے زبدی دے ڈوہاں پوتراں کُوں نال گھِن گِیا تے غمگین تے بے چَین تھیوݨ لگا ۔ 38 اُوں وَیلے اُونیں اُنہاں کُوں آکھیا غم دی شدت کنُوں میڈا دِل بہُوں غمگین ہے تے مَرݨ آلی حالت ہے۔ تُساں اِتھاں کھڑؤ تے میڈے نال جاگدے رَہو ۔
39 وَل ذرا اَگُوں وَنج تے اوہ زمین اُتے سجدے ءچ ڈھے پیا تے دُعا کرݨ لگا جو اے میڈے باپ! جے ممکن ہووے تاں ایہہ پیالہ میں کنُوں ٹَل وَنجے، وَل وی جیہڑا میں چاہندا ہاں اوہ نئیں بلکہ جیہڑا تُوں چاہندیں اُوہو تھیوے ۔
40 وَل شاگرداں دے کولھ آیا تے اُنہاں کُوں سُتا ڈِٹھا تے پطرس کُوں آکھیا کیا تُساں ہِک گَھڑی وی میڈے نال جاگ نہ سگے؟ 41 جاگدے تے دُعا کریندے رَہو تاں جو اَزمائش ءچ نہ پوو۔ رُوح تاں تیار ہے پَر بدن کمزور ہے ۔
42 وَل اُوں وَنج تے اِیویں دُعا کیتی جو اے میڈے باپ! جے ایہہ میڈے پیتے بغیر ٹَل نئیں سگدا تاں تیڈی مرضی پُوری تھیوے ۔ 43 تے آتے اُنہاں کُوں وَل وی سُتے ڈِٹھا کیوں جو اُنہاں کُوں ڈاڈھی نیندر آئی ہئی ۔
44 تے اوہ اُنہاں کُوں چھوڑ تے وَل چلا گِیا تے وَل تَریجھی دفعہ اُوہو گالھ آہدھے ہوئے دُعا کیتی ۔ 45 اُوندے بعد شاگرداں دے کولھ آتے اُنہاں کُوں آکھیا تُساں ہُنڑ سُتے رَہو تے آرام کرو۔ ڈیکھو، اوہ وَیلہ آگِیا ہے جو ابن ِآدم گنہگاراں دے حوالے کیتا ویندے ۔ 46 اُٹھو جُلوں۔ ڈیکھو میکُوں پکڑواوݨ آلا نیڑے آ پُجے ۔
یسُوع دی گرفتاری
47 اوہ ایہہ گالھیں کریندا ای پیا ہا جو یہُوداہ جیہڑا اُنہاں بارہاں ءچوں ہِک ہا، اُتھاں آگِیا تے اُوندے نال بہُوں سارے آدمی ہَن جیہڑے تلواراں تے لاٹھیاں چاتی ودے ہَن، تے جَینکُوں سردار کاہِن تے قوم دے بُزرگاں بھیجیا ہا ۔ 48 اُوں دے پکڑواوݨ آلے نیں اُنہاں کُوں ایہہ نشانی ڈِتی ہئی جو جِیندا میں بوسہ گِھناں اُوہو ہے ۔ اُوں کُوں پکڑ گھِنائے ۔ 49 تے فوراً اُونیں یسُوع کولھ آندے ای آکھیا اے ربّی سلام! تے اُوں دے بوسے گھِدے ۔
50 یسُوع اُونکُوں آکھیا میاں! جیہڑے کَم کیتے تُوں آیا ہیں اوہ کر گھِن ۔
اِیں واسطے اُنہاں اَگُوں تھی تے یسُوع کُوں پکڑ تے قابو کر گھِدا ۔ 51 تے ڈیکھو یسُوع دے ساتھیاں ءچوں ہِک نیں آپنڑیں تلوار کڈھ تے سردار کاہِن دے نوکر اُتے وار کیتا تے اُوندا کَن کَپ ڈِتّا۔ 52 یسُوع اُونکُوں آکھیا آپنڑیں تلوار کُوں میان ءچ رکھ گِھن کیوں جو جیہڑے تلوار چیندے ہِن اوہ سبھ تلوار نال مرسن ۔ 53 تیکُوں پتا نئیں جو میں آپنڑے باپ کنُوں مِنت کر سگداں تاں اوہ ہُنڑیں فرشتیاں دے بارہاں تُمنڑ کنُوں وی زیادہ میڈے کولھ بھیج ڈیسی؟ 54 پَر کلام دے اوہ گالھیں جَنہاں دا پُورا تھیوݨ لازم ہے، کیویں پُورے تھیسن؟
55 اُوہو وَیلے یسُوع بِھیڑ کُوں آکھیا کیا میں کوئی ڈاکو ہاں جو تُساں تلواراں تے لاٹھیاں چاتے میکُوں پکڑݨ آئے ہِوے ؟ میں ہر روز ہیکل ءچ بَہہ تے تعلیم ڈیندا ریہاں، اُتھاں تاں تُساں میکُوں گرفتار نہ کیتا ۔ 56 پَر ایہہ سبھ کُجھ اِیں واسطے تِھیا جو نبیاں دی کتاباں ءچ لکھیاں ہوئیاں گالھیں پوریاں تھیوݨ ۔
وَل سبھ شاگرد اُونکُوں چھوڑتے بھج گئے ۔
صدر ِعدالت دے سامنڑے یسُوع دی پیشی
57 تے جیہڑے لوکاں یسُوع کُوں گرفتار کیتا ہا، اوہ اُونکُوں سردار کاہِن کائفا دے کولھ گِھن گئے جِتھاں فقیہہ تے بزُرگ جمع ہَن ۔ 58 تے پطرس وی پَرے کنُوں اُوندے پچھُوں پچھُوں سردار کاہِن دی حویلی تَئیں وَنج پُجیا، تے اندر وَنج تے پہرے آلیاں دے نال بہہ تے فیصلے دا انتظار کرݨ لگ پیا۔ 59 سردار کاہِن تے سبھ وڈی عدالت آلے یسُوع کُوں مارݨ کیتے اُوندے خِلاف کُوڑے گواہیاں گولھنڑ لگے۔ 60 پَر نہ مِل سگیاں، بے شک بہُوں سارے کُوڑے گواہ پیش تھئے ۔ پَر آخر ءچ ڈو گواہاں آتے آکھیا جو 61 اِیں آکھیا ہا جو میں خُدا دے مَقدِس کُوں سَٹ تے تَرے ڈینہہ ءچ وَلا کھڑا کر سگدا ہاں ۔
62 تے سردار کاہِن نیں کھڑا تھی تے اُونکُوں آکھیا تُوں جواب کیوں نئیں ڈیندا؟ ایہہ تیڈے خِلاف کیا گواہی ڈیندے ہِن ؟ 63 پَر یسُوع چُپ ای ریہا ۔ سردار کاہِن اُونکُوں آکھیا میں تیکُوں زندہ خُدا دی قسم ڈیندا ہاں جو جے تُوں خُدا دا پوتر المسیح ہیں تاں ساکوں ڈساڈے ۔
64 یسُوع اُونکُوں آکھیا تَیں خود ای آکھ ڈِتا ہے، بلکہ میں تُہاکُوں آہدھا ہاں جو اِیں دے بعد تُساں ابن ِآدم کُوں قادر ِمطلق دے سجے پاسوں بیٹھا تے اَسمان دے بدلاں اُتے آندا ڈیکھسو ۔
65 وَل سردار کاہِن نیں ایہہ آکھ تے آپنڑے کپڑے پھاڑے جو اُونیں کُفر بکیا ہے ۔ ہُنڑ ساکوں گواہاں دی کیا ضرورت ہے ؟ ڈیکھو تُساں ہُنڑیں ای ایہہ کفر سُنڑیا ہے ۔ تُہاڈا کیا خیال ہے ؟
66 اُنہاں جواب ڈِتّا اوہ قتل دے لائق ہے ۔
67 وَل اُنہاں اُوندے مُنہ اُتے تُھکیا تے اُونکُوں مُکے مارے تے کُجھ نیں چاٹاں مارتے آکھیا 68 اے المسیح ساکُوں نبُوّت کرتے ڈسا جو تیکُوں کَیں مارے ؟
پطرس یسُوع دا اِنکارکریندے
69 تے پطرس باہر صحن ءچ بیٹھا ہا جو ہِک کنیز اُتھاں آئی تے آکھنڑ لگی تُوں وی یسُوع گلیلی دے نال ہانویں ۔
70 اُوں ساریاں دے سامنڑے اِنکار کیتا تے آکھیا پتا نئیں تُوں کیا آہدھی پئی ہیں۔ 71 تے وَل اوہ باہر ڈیوڑھی اَل گِیا تاں ڈُوجھی اُونکُوں ڈیکھ تے اُنہاں کُوں جیہڑے اُتھاں ہَن آکھیا ایہہ وی یسُوع ناصری دے نال ہئی ۔
72 اُوں قسم چا تے وَلا اِنکار کیتا جو میں تاں اِیں آدمی کُوں جانڑدا ای نئیں ۔
73 کُجھ دیر بعد اوہ لوک جیہڑے اُتھاں کھڑے ہَن پطرس دے کولھ آئے تے آکھنڑ لگے بے شک تُوں وی اُنہاں دے ای ءچوں ہیں کیوں جو تیڈی بولی کنُوں وی اِیہو ظاہر تھیندے ۔