‏3 بیابان ءچ پُکارݨ آلے دی آواز آندی ہے جو

‏4 یُوحنّا آیا تے بیابان ءچ بپتسمہ ڈیندا تے گناہاں دی معافی کیتے توبہ دے بپتسمہ دی تبلیغ کریندا ہا ۔ ‏5 تے یہُودیہ دے مُلک تے یرُوشلیم دے سارے لوک اُوندے کولھ گئے تے آپنڑے گناہاں دا اقرار کرتے اُوں کنُوں یردن دے دریا ءچ بپتسمہ گھِدا ۔

‏6 یُوحنّا اُٹھ دے والاں دا لباس پیندا تے چمڑے دا پَٹکا آپنڑیں کَمرنال بَدھی رکھیندا تے ٹڈیاں ^a تے جنگلی ماکھی کھاندا ہا ۔ ‏7 تے ایہہ تبلیغ کریندا ہا جو میڈے بعد اوہ شخص آوݨ آلا ہے جیہڑا میں کنُوں زیادہ زور آور ہے۔ میں اِیں لائق نئیں جو جُھک تے اُوندی جُتی دا تسمہ کھول سگاں ۔ ‏8 میں تاں تُہاکُوں پانڑی نال بپتسمہ ڈیندا ہاں پَر اوہ تُہاکُوں رُوح القُدس نال بپتسمہ ڈیسی ۔

‏9 اُنہاں ڈینہاں ءچ اِیویں تھیّا جو یسُوع گلیل دے شہر ناصرت کنُوں آ تے یُوحنّا تُوں یردن دے دریا ءچ بپتسمہ گھِدا ۔ ‏10 جِیں وَیلے اوہ پانڑی کنُوں باہرنکل تے اُتے آیا تاں اُونیں فوراً اَسمان کُوں پَھٹدے تے رُوح اُلقُدس کُوں کبوتر وانگوں آپنڑے اُتے لہندے ڈِٹھا ۔ ‏11 تے اَسمان کنُوں ایہہ آواز آئی جو تُوں میڈا پیارا پوتر ہیں، میں تَیں کنُوں بہُوں خُوش ہاں۔ ‏12 تے رُوح القُدس نیں فوراً اُونکُوں بیابان ءِ چ بھیج ڈِتا ۔ ‏13 اوہ چالیہ ڈینہہ تَئیں بیابان ءچ شیطان کنُوں اَزمایا گِیا، تے جنگلی جانوراں دے نال ریہا تے فرشتے اُوندی خدمت کریندے ریہے ۔

‏14 ول یُوحنّا دے پکڑوائے وَنجنڑ دے بعد یسُوع گلیل ءچ آیا تے خُدا دی بادشاہی دی خُوش خبری دی تبلیغ کیتی۔ ‏15 تے آکھنڑ لگا جو وَقت پورا تھی گِیا ہے تے خُدا دی بادشاہی نیڑے آ گئی ہے ۔ توبہ کرو تے خُوش خبری اُتے اِیمان گھِن آؤ ۔

‏16 تے گلیل دی جھیل دے کِنارے اُتے ٹُردے ہوئے یسُوع شمعون تے شمعون دے بِھرا اندریاس کُوں ڈِٹھا جیہڑے جھیل ءچ جال سَٹیندے پئے ہَن، کیوں جو اوہ مچھیرے ہَن ۔ ‏17 یسُوع اُنہاں کُوں آکھیا میڈے پِچُھوں ٹُردے آؤ تاں میں تُہاکُوں آدم گیر^b بنڑیساں ۔ ‏18 اوہ فوراً آپنڑے جال چھوڑ تے اُوندے پِچُھوں تھی پئے ۔

‏19 تھوڑا اَگُوں وَنج تے اُونیں زبدی دے پوتراں یعقوب تے یُوحنّا کُوں ڈِٹھا جیہڑے آپنڑیں کشتی اُتے جالاں دی مرمت کریندے پئے ہَن ۔ ‏20 اُونیں فوراً اُنہاں کُو ں ڈیدھے ای سَڈ گھِدا تے اوہ آپنڑے پیُو کُوں کشتی اُتے مزدوراں دے نال چھوڑ تے اُوندے پچُھوں ٹُر پئے ۔

‏21 وَل اوہ کفرنحُوم ءچ داخل تھئے تے جیویں ای سَبت دا ڈینہہ آیا تاں اوہ عبادت خانہ ءچ ونج تے تعلیم ڈیوݨ لگا ۔ ‏22 تے لوک اُوندی تعلیم سُنڑ تے حیران تھی گئے کیوں جو اوہ اُنہاں کُوں فقیہاں وانگوں نئیں بلکہ صاحب ِاختیار وانگوں تعلیم ڈیندا ہا ۔

‏23 اُوں وَیلے عبادت خانہ ءچ ہِک آدمی مِلیا جِیندے ءچ بدرُوح ہئی، اوہ ایہہ آہدھے ہوئے چیخاں مارݨ لگ پیا ‏24 جو اے یسُوع ناصری ساکوں تیڈے نال کیا کَم ؟ کیا تُوں ساکُوں ہلاک کرݨ کیتے آئیں؟ مَیں جانڑدا ہاں جو تُوں کوݨ ہیں؟ تُوں خُدا دا قدُوس ہیں ۔

‏25 یسُوع اُونکُوں دڑکا ڈِتا تے آکھیا چُپ رہ تے اِیں آدمی ءچوں نِکل وَنج ۔

‏26 بس اوہ بدرُوح اُوں آدمی کُوں بُری طرحاں مروڑ تے وَڈے زور نال چیخ مار تے اُوندے ءچوں نِکل گئی ۔ ‏27 تے سارے لوک حیران تھئے تے ہِک ڈوجھے کُوں آکھنڑ لگے جو ایہہ کیا ہے؟ ایہہ تاں نویں تعلیم ہے، اوہ بدرُوحاں کُوں اِختیار دے نال حُکم ڈیندے تے اوہ اُوندا حُکم منیندیاں ہِن ۔

‏28 اُوندی مشہوری بہُوں جلدی گلیل دے چودھارُوں ہرجاہ تھی گئی ۔

‏29 اوہ عبادت خانہ ءچوں باہر نکلدے ای یعقوب تے یُوحنّا دے نال شمعون تے اندریاس دے گھر آئے ۔ ‏30 شمعون دی سَس کُوں تیز بخار ہا تے اُنہاں اُونکُوں اُوندی خبر ڈِتی ۔ ‏31 اُونیں کولھ وَنج تے اُوندا ہَتھ پکڑ تے اُونکُوں کھڑا کیتا۔ تے اُوندا بخار لیہہ گِیا تے اوہ اُوندی خدمت کرݨ لگ پئی ۔

‏32 شام وَیلے سورج لَہندے ای لوک اُتھوں دے سارے بیماراں کُوں تے اُنہاں کُوں جنہاں ءچ بدرُوحاں ہَن، اُوندے کولھ گِھن آئے ۔ ‏33 تے سارا شہر دروازے اُتے کٹھا تھی گِیا ۔ ‏34 اُونیں بہُوں سارے لوکاں کُوں اُنہاں دی بیماریاں کنُوں شِفا بخشی تے بہُوں ساریاں بدرُوحاں کُوں کڈھ ڈِتا تے بدرُوحاں کُوں بولنڑ نہ ڈِتا کیوں جو اوہ جانڑدیاں ہَن جو اوہ کوݨ ہے ۔

‏35 صبح سویرے جیہڑے وَیلے اندھارا ای ہا یسوع نیں اُٹھی تے گھر کنُوں باہر ہِک ویران جاہ تے ونج تے دُعا کیتی ۔ ‏36 تے شمعون تے اُوندے ساتھی اُوندے پچُھوں گئے ۔ ‏37 جِیں وَیلے اوہ اُنہاں کوں مِلیا تاں اوہ آکھنڑ لگے جو سارے لوک تیکُوں گولھیندے پئے ہِن ۔

‏38 پَر اُونیں آکھیا آؤ اَساں آسوں پاسوں دے دیہاتاں ءچ جُلوں تاں جو میں اُتھاں وی تبلیغ کراں کیوں جو میں اِیہو کَم کرݨ کیتے نکلیا ہاں ۔

‏39 تے اوہ سارے گلیل ءچ اُ نہاں دے عبادت خانیاں ءچ تبلیغ کریندا تے بدرُوحاں کُوں کڈھیندا ریہا ۔

‏40 تے ہِک کوڑھی نیں اُوندے کولھ آتے اُوندی مِنت کیتی تے اُوندے اَگُوں گوڈے ٹیک تے اُوں کُوں آکھیا جو جے تُوں چاہویں تاں میکُوں پاک صاف کر سگدیں ۔

‏41 یسوع نیں اُوندے اُتے ترس کھا تے آپنڑا ہَتھ وَدھایا تے اُونکُوں ہَتھ لا تے آکھیا میں چاہندا ہاں جو تُوں پاک صاف تھی وَنج ۔ ‏42 اُونہئی وَیلے اُوندا کوڑھ ٹھیک تھی گِیا تے اوہ پاک صاف تھی گِیا ۔ ‏43 تے اُونیں اُونکُو ں فوراً اُتھوں کنُوں بھیج ڈِتا تے چِتا تے ‏44 اُونکُوں آکھیا خبردار! اِیں گالھ دا کہیں نال ذکر نہ کریں ، بلکہ سِدھا کاہِن دے کولھ وَنج تے آپنڑے آپ کُوں ڈِکھا ۔تے آپنڑے نال اوہ نذراں وی گھِدی وَنج جیہڑیاں مُوسیٰ پاکیزگی کیتے مقرّر کیتیاں ہَن، تاں جو اُنہاں کیتے گواہی ہووے ۔

‏45 پَر اوہ اُتھوں نِکل تے ہر کہیں کُوں ڈساوݨ لگا تے اِیں گالھ کُوں اتنا مشہور کر ڈِتا جو یسُوع شہر ءچ ظاہری طور تے داخل نہ تھی سگیا، بلکہ با ہر ویران جاہواں تے ریہا تے لوک چودھارُوں اُوندے کولھ آندے ہَن ۔