یسُوع ہِک مفلُوج کُوں شِفا ڈیندے
2
1 کئی ڈینہاں بعد جِیں وَیلے اوہ وَلا کفرنحُوم ءچ آیا تاں سُنڑیا گیا جو اوہ گھر ءچ ہے ۔ 2 وَل اِتی لوک جمع تھی گئے جو دروازے دے نال وی جاہ نہ بچی تے اوہ اُنہاں کُوں کلام سُنڑیندا پیا ہا ۔ 3 تے لوک ہِک مفلُوج کُوں چار آدمیاں کنُوں چوا تے اُوندے کولھ گِھن آئے ۔ 4 پَر جِیں وَیلے اوہ اُوں بیمار کُوں بِھیڑ دی وجہ کنُوں اُوندے کولھ نہ گِھن آ سگے تاں چھت اُتے چڑھ گئے تے اُنہاں چھت دا اوہ حصہ اُکھیڑ ڈِتا جِتھاں اوہ ہا تے اُونکُوں اُدھیڑ تے اُوں کَھٹ کُوں جِیندے اُتے مفلُوج ہا لٹکا ڈِتا ۔ 5 یسُوع اُنہاں لوکاں دا اِیمان ڈیکھ تے مفلُوج کُوں آکھیا پوتر تیڈے گُناہ معاف تھئے۔6 پَر بعض فقیہہ جیہڑے اُتھاں بیٹھے ہَن اوہ آپنڑے دِلاں ءچ سوچنڑ لگے جو 7 ایہہ کیوں اِیویں آہدھا ہے؟ کُفر بکدے، خُدا دے سِوا کوݨ گُناہ معاف کر سگدے ؟
8 یسُوع رُوح کنُوں فوراً جانڑ گھِدا جو اوہ آپنڑے دِلاں ءچ کیا سوچیندے ہِن تے اُنہاں کُوں آکھیا تُساں کیوں آپنڑے دلاں ءچ ایہہ گالھیں سوچیندے ہِوے؟ 9 کیا مفلُوج کُوں ایہہ آکھنڑ اَسان ہے جو تیڈے گناہ معاف تھئے یا ایہہ آکھنڑ جو اُٹھی ، آپنڑیں کھٹ چا تےٹُر پھر؟ 10 پَر اِیں واسطے جو تُہاکُوں معلوم ہووے جو ابن ِآدم کُوں زمین اُتے گناہ معاف کرݨ دا اِختیار ہے ( اُونیں مفلُوج کُوں آکھیا )، 11 میں تیکُوں آہدھا ہاں جو اُٹھی تے آپنڑیں کھٹ چا تے گھر چلیا وَنج ۔
12 اوہ اُٹھیا تے فوراً کھٹ چا تے اُنہاں ساریاں دے سامنڑے باہر چلیا گِیا ۔ اِیں واسطے اوہ سارے حیران تھی گئے تے خُدا دی تعریف کر تے آکھنڑ لگے اَساں اِیویں پہلے کڈھائیں نہ ڈِٹھا ہا ۔
یسُوع لاوی کُوں سَڈیندے
13 اوہ ولا جھیل دے کِنارے اُتے گِیا تے بِھیڑ اُوندے چودھارُوں جمع تھی گئی تے اوہ اُنہاں کُوں تعلیم ڈیوݨ لگا ۔ 14 تے لَنگھدے ہوئے اُونیں حلفئی دے پوتر لاوی کُوں محصُول دی چوکی اُتے بیٹھے ڈِٹھا تے اُوں کُوں آکھیا میڈے پچُھوں تھی پو تے اوہ اُٹھی تے اُوں دے پچُھوں تھی پیا ۔
15 تے اِیویں تھیّا جو اوہ اُوندے گھر ءچ کھانڑا کھاوݨ بیٹھا تاں بہُوں سارے محصُول گھننڑ آلے تے گنہگار لوک یسُوع تے اُوندے شاگرداں دے نال کھاوݨ بیٹھے کیوں جو اوہ بہُوں ہَن تے اُوندے پچُھوں تھی پئے ہَن ۔ 16 کُجھ فریسیاں دے فقیہاں نیں یسُوع کُوں گنہگاراں تے محصُول گھننڑ آلیاں دے نال کھاندیاں ڈِٹھا تاں اُوندے شاگرداں کُوں آکھیا ایہہ تاں محصُول گھننڑ آلیاں تے گنہگاراں دے نال کھاندے پیندے ۔
17 یسُوع ایہہ سُنڑتے اُنہاں کُوں آکھیا تندرُستاں کُوں نئیں بلکہ بیماراں کُوں طبیب دی ضرورت ہوندی ہے۔ میں راستبازاں کُوں نئیں بلکہ گنہگاراں کُوں سَڈݨ آیا ہاں ۔
روزہ دے بارے ءچ تعلیم
18 یُوحنّا دے شاگرد تے فریسی روزے نال ہَن ۔ اُنہاں آتےاُونکُوں آکھیا کیا وجہ ہے جو یُوحنّا تے فریسیاں دے شاگرد تاں روزہ رکھیندے ہِن پَر تیڈے شاگرد روزہ نئیں رکھیندے؟
19 یسُوع اُنہاں کُوں جواب ڈِتا کیا براتی گھوٹ دی موجُودگی ءچ روزہ رکھ سگدے ہِن؟جِیں وَیلے تَئیں گھوٹ اُنہاں دے نال ہے اوہ روزہ نئیں رکھ سگدے ۔ 20 پَر اوہ ڈینہہ آسن جِیں وَیلے گھوٹ اُنہاں کنُوں جُدا کیتا ویسی وَل اوہ روزہ رکھیسن ۔
21 پُرانڑی پُشاک اُتے نویں کپڑے دا جوڑ کوئی نئیں لیندا، نئیں تاں نواں کپڑا اُوں پُرانڑی پُشاک ءچوں کُجھ چھیک گھِن سی یعنی نواں پُرانڑی کنُوں تے اوہ زیادہ پھٹ ویسی ۔ 22 تے نویں مے کُوں پُرانڑی مشکاں ءچ کوئی نئیں بھریندا، نئیں تاں مشکاں مے کنُوں پھٹ ویسن تے مے تے مشکاں ڈوہائیں برباد تھی ویسن بلکہ نویں مے کُوں نویں مشکاں ءچ بھریندے ہِن ۔
سَبت دے بارے ءچ سوال
23 تے اِیویں تھیّا جو اوہ سِبت دے ڈینہہ رَڑھاں ءچوں لنگھدا پِیا ہا تے اُوندے شاگرد رستے اُتے ٹُردے ٹُردے سِٹے تروڑݨ لگ پئے ۔ 24 تے فریسیاں اُونکُوں آکھیا ڈیکھ ایہہ ایجھا کَم کیوں کریندے ہِن جیہڑا سَبت دے ڈینہہ جائز نئیں ؟
25 اُونیں جواب ڈِتا کیا تُساں کڈھائیں نئیں پڑھیا جو جِیں وَیلے داؤد تے اُوندے ساتھیاں کُوں ضرورت تھئی تے اوہ بُھکے تھئےتاں اُونیں کیا کیتا ؟ 26 اوہ کیویں سردار کاہِن ابیا تر دے زمانے ءچ خُدا دے گھر ءچ گِیا تے نذر دیاں روٹیاں گھِن تے آپ وی کھادیاں تے آپنڑے ساتھیاں کُوں وی کھاوݨ کیتے ڈِتیاں حالانکہ ایہہ روٹیاں کاہِناں دے سوا کہیں بئے کُوں کھاوݨ جائز نہ ہا ؟