یسُوع ہِک بدرُوح گرفتہ آدمی کُوں شِفا ڈیندے
5
1 تے اوہ جھیل دے پار گراسینیاں دے علاقے ءچ پُجے ۔ 2 جیویں ای یسوع کشتی کنُوں لَتھا ، ہِک آدمی جِیندے ءچ بدرُوح ہَئی ، قبرستان کنُوں نِکل تے اُونکوں ملیا ۔ 3 اوہ قبراں ءچ رَہندا ہا تے ہنڑ کوئی اُونکوُں زنزیراں نال وی نہ بَدھ سگدا ہا ۔ 4 کیوں جو پہلے اُونکوں اکثر بیڑیاں تے زنزیراں نال بَدھ تے رکھیا وَیندا ہا ، پَر اوہ زنزیراں کُوں تَروڑ سَٹیندا تے بیڑیاں دے ٹوٹے ٹوٹے کر ڈیندا ہا ،تے کوئی اُونکوں قابو ءچ نہ رکھ سگدا ہا ۔ 5 تے اوہ ڈینہہ رات قبراں تے پہاڑاں ءچ ہر وَیلے چیخدا رہندا تے آپنڑے آپ کُوں پتھراں نال زخمی کر گھندا ہا ۔6 اوہ یسُوع کُوں پَرے کنُوں ڈیکھ تے بھجیا تے اُونکوں سِجدہ کیتا ۔ 7 تے زور زور نال چیخدے ہوئے آکھیا اے یسُوع خُدا دے پوتر ! میکُوں تیڈے نال کیا کَم ؟ تیکُوں خُدا دی قَسم، میکُوں عذاب ءچ نہ سَٹ ۔ 8 کیوں جو اُونیں اُونکوں آکھیا ہا اے بدرُوح اِیں آدمی ءچوں باہر نِکل وَنج ۔
9 وَل اُونیں اُونکوں پُچھیا تیڈا ناں کیا ہے ؟
اُونیں جواب ڈِتا میڈا ناں لشکر ہے کیوں جو اَساں بُہوں سارے ہاں ۔ 10 وَل اُونیں اُوندی بُہوں مِنت کیتی جو ساکوں اِیں علاقے کنُوں باہر نہ بھیج ۔
11 تے اُتھاں پہاڑ دے نیڑے سُؤراں دا ہِک غول چر دا پِیا ہا ۔ 12 بس اُنہاں اُوندی مِنت کر تے آکھیا جو ساکُوں اُنہاں سُؤراں ءچ بھیج ڈے تاں جو اَساں اُنہاں ءچ داخل تھی وَنجوں ۔ 13 بس اُونیں اُنہاں کُوں اجازت ڈِتی تے بدرُوحاں نِکل تے سُؤراں ءچ داخل تھی گئیاں۔ تے اُوں غول دے سارے سُؤر، جیہڑے تقریباً ڈو ہزار ہَن ، ریڑھ کنُوں جھیل دے پاسوں جھپٹ تے جھیل ءچ وَنج ڈھٹھے تے جھیل ءچ بُڈ مر ے۔
14 تے سُؤر چراوݨ والے اتُھوں کنُوں بھج پئے تے شہر تے دیہات ءچ اِیں گالھ دی خبر پُچائی ۔ 15 بس لوک نِکل تے یسُوع کولھ آئے، تے اُوں آدمی کُوں جِیندے ءچ بدرُوحاں دا لشکر ہا ، کپڑے پاتے ، تے ہوش ءچ بیٹھے ڈِٹھا تاں بہُوں ڈر گئے ۔ 16 جنہاں ایہہ واقعہ ڈِٹھا ہا اُنہاں بدرُوح گرفتہ آدمی تے سُؤراں دا حال اُنہاں کُوں بیان کیتا۔ 17 اوہ اُوندی مِنت کرݨ لگے جو ساڈے علاقے ءچوں چلیا وَنج ۔
18 جیہڑے وَیلے یسوع کشتی ءچ بَاہنڑ لگا تاں اوہ آدمی جیہڑا پہلے بدرُوحاں ءچ گرفتار ہا ، اُوندی مِنت کرݨ لگا جو میں تیڈے نال ویساں ۔
19 پَر اُونیں اُونکُوں اجازت نہ ڈِتی بلکہ اُونکُوں آکھیا جو گھر وَنج تے آپنڑے لوکاں کُوں ڈسا جو خُداوند تیڈے کیتے کتنے وَڈے کَم کیتے تے تیڈے اُتے رحم کیتا ۔
20 اوہ گِیا تے دِکَپُلِس ءچ اِیں گالھ دا چرچا کرݨ لگا جو یسُوع اُوندے کیتے کیجھے وَڈے کَم کیتے تے سارے لوک حیران تھیندے ہَن ۔
یائِیر دی دِھی تے ہِک عورت کُوں شِفا
21 جِیں وَیلے یسُوع کشتی ءچ پار گیا تاں اُتھاں وَڈی بِھیڑ اُوندے کولھ آئی تے اوہ جھیل دے کِنارے اُتے ہا ۔ 22 تے ڈیکھو مقامی عبادت خانےدا ہِک سردار جِیندا ناں یائِیر ہا ، اُتھاں آیا تے اُونکُوں ڈیکھ تے اُوندے پیراں ءچ ڈھے پِیا 23 تے مِنت کریندے ہوئے آکھنڑ لگا جو میڈی چھوٹی دِھی مَرݨ آلی ہے ۔ مہربانی نال آ تے اُوندے اُتے آپنڑے ہَتھ رکھ تاں جو اوہ تندرست تھی وَنجے تے زندہ رہوے ۔
24 بس اوہ اُوندے نال روانہ تھیّا تے وَڈی بِھیڑ اُوندے پِچُھوں تھی پئی تے اُوندے اُتے ڈھاندی پئی ہئی ۔
25 وَل ہِک عورت جِینکُوں بارہاں سالہاں کنُوں خون جاری ہا، 26 تے بہُوں حکیماں کنُوں علاج کروا کروا تے پریشان تھی گئی ہَئی ،تے آپنڑیں ساری جمع پُونجی لُٹا تے وی اُونکُوں کجھ فائدہ نہ تھیّا ہا بلکہ زیادہ بیمار تھی گئی ہَئی 27 یسُوع دے بارے سُنڑتےبِھیڑ ءچ اُوندے پچّھوں کنُوں آئی تے اُوندی پُشاک کُوں ہَتھ لا یا ۔ 28 کیوں جو اوہ آہدِھی ہَئی جو جے میں اُوندی پُشاک کُوں ای ہَتھ لا گھِن سا ں تاں ٹھیک تھی وَیساں ۔
29 تے فوراً اُوندا خون واہنڑ بند تھی گِیا ،تے اُونکُوں آپنڑے بدن ءچ محسوس تھیّا جو میں آپنڑی اِیں بیماری کنُوں شِفا پا گِھدی ہے ۔ 30 یسُوع فوراً جاݨ گِھدا جو اُوندے ءچوں قوت نِکلی ہے ۔ اوہ بِھیڑ ءچ پِچھوں مُڑ تے پُچھنڑ لگا کئیں میڈی پُشاک کُوں ہَتھ لائے ؟
31 شاگرداں اُونکُوں آکھیا تُوں ڈیدھا پئیں جو لوک تیڈے اُتے ڈھاندے پئے ہِن تے وَل وی تُوں پُچھدیں جو کئیں میکُوں ہَتھ لائے ؟
32 اُونیں چودھارُوں نِگاہ ماری تاں جو اُونکُوں ڈیکھے جئیں اِیویں کیتے ؟ 33 اوہ عورت ایہہ جانڑ تے جو اُوندے اندر کیا تھئے ڈر دی تے کمبدی ہوئی آئی تے اُوندے سامنڑے ڈھے تے اُونکُوں ساری حقیقت ڈسا ڈِتی ۔ 34 یسُوع اُونکُوں آکھیا دِھی تیڈے اِیمان تیکُوں چنگا کر ڈِتے ، خیر نال وَنج تے آپنڑیں بیماری کنُوں بچی رہ ۔
35 اوہ ایہہ آہدھا ای پِیا ہا جو عبادت خانہ دے سردار دے گھر تُوں کُجھ لوک آ تے آکھنڑ لگے جو تیڈی دِھی مَر گئی ہے ۔ ہُنڑ اُستاد کُوں تکلیف کیوں ڈیندیں ؟
36 یسُوع انہاں دی گالھ اُتےتوجہ نہ کر تے عبادت خانہ دے سردار کُوں آکھیا اَصلُوں نہ ڈر ، صرف اِیمان رکھ ۔ 37 وَل اُونیں پطرس ، یعقوب تے یعقوب دے بِھرا یُوحنّا دے سِوا کہیں بئے کُوں آپنڑے نال آوݨ دی اجازت نہ ڈِتی ۔ 38 تے اوہ عبادت خانہ دے سردار دے گھر پُجے تاں اُونیں ڈِٹھا جو اُتھاں لوک بہُوں شور شرابہ تے ماتم کریندے پئے ہِن ۔ 39 تے اندر وَنج تے اُنہاں کُوں آکھیا تُساں کیوں اِتنا شور مچیندے تے روندے ہِوے ؟ چھوہیر موئی نئیں بلکہ سُتی پئی ہے ۔
40 اوہ اُوندا مذاق بناوَݨ لگے ۔ پَر اُونیں اُنہاں ساریاں کُوں اُتھوں باہر کڈھ ڈِتا تے چھوہیر دے ماں پیُو تے آپنڑے شاگرداں کُوں گِھن تے چھوہیر دے کولھ گِیا ۔ 41 تے چھوہیر دا ہَتھ پکڑ تے اُونکُوں آکھیا تلیتا قُومی! جِیندا مطلب ہے چھوہیر میں تیکُوں آہدھا ہاں، اُٹھی ۔