‏4 یسُوع اُنہاں کُوں آکھیا نبی دی بے قدری اُوندے آپنڑے شہر ، رشتہ داراں تے گھر آلیاں دے سوا ‎ بِیا کِتھائیں نئیں تھیندی ۔

‏5 تے اوہ کوئی معجزہ اُتھاں نہ ڈِکھا سگیا۔صرف تھوڑے جئے بیماراں اُتے ہَتھ رکھ تے اُنہاں کُوں شِفا ڈِتی ۔ ‏6 تے اُونیں اُنہاں دی بے اعتقادی اُتے تعجُب کیتا ۔

تے اوہ چارے پاسوں دے دیہاتاں ءچ پِھردے ہوئے تعلیم ڈیندا ریہا ۔ ‏7 تے اُونیں اُنہاں بارہاں کُوں آپنڑے کولھ سَڈ تے اُنہاں کُوں ڈو ڈو کر تے بھیجنڑ شروع کیتا تے اُنہاں کُوں بدرُوحاں اُتے اِختیار بخشیا ۔ ‏8 تے حکم ڈِتا جو سفر کیتے سِوائے سوٹی دے کُجھ نہ گھِنائے ، نہ روٹی نہ تھیلا نہ آپنڑے کمر بند ءچ پیسے ۔ ‏9 پَر جُتیاں پا گھِنائے تے ڈو چولے نہ پوائے ۔ ‏10 تے اُونیں اُنہاں کُوں آکھیا تُساں جیہڑے گھر ءچ داخل تھیؤ جئیں تَئیں اُتھوں روانہ نا تھیؤ اُتھائیں ٹِکائے ۔ ‏11 تے جِیں جاہ دے لوک تُہاکُوں قبول نہ کرݨ تے تُہاڈی نہ سُننڑ تاں اُتھوں کنُوں روانہ تھیندے وَیلے آپنڑے پیراں دی دھُوڑ چھنڈک ڈیوائے تاں جو ا ُنہاں اُتے گواہی ہووے ۔

‏12 تے اُنہاں روانہ تھی تے منادی کیتی جو توبہ کرو ۔ ‏13 تے بہُوں ساریاں بدرُوحاں کُوں کڈھیا تے بہُوں سارے بیماراں کُوں تیل مَل تے شِفا ڈِتی ۔

‏14 تے ہیرودیس بادشاہ یسوع دا ذِکر سُنڑیا کیوں جو اُوندا ناں مشہور تھی گِیا ہا ۔ کُجھ لوکاں آکھیا جو یُوحنّا بپتسمہ ڈیوݨ آلا مُردیاں ءچوں زندہ تھی گئے کیوں جو اُوندے کنُوں معجزے ظاہر تھیندے ہِن ۔

‏15 پَر کُجھ لوک آہدھے ہَن جو ایلیّاہ ہے تے کُجھ ایہہ جو نبیاں ءچوں کوئی نبی ہے ۔

‏16 پَر ہیرودیس سُنڑ تے آکھیا جو یُوحنّا جِیندا میں سِر کٹوایا ہا اُوہو زندہ تھی گئے ۔ ‏17 کیوں جو ہیرودیس نیں بندے بھیج تے یُوحنّا کُوں پکڑوایا تے آپنڑے بِھرا فلپُس دی ذال ہیرودیاس دے سببّوں اُونکُوں قید خانے ءچ بَدھ رکھیا ہئی ،کیوں جو ہیرودیس اُوندے نال ویاہ کر گھِدا ہا ۔ ‏18 تے یُوحنّا اُونکُوں آکھیا ہا جو تیکُوں آپنڑے بِھرا دی ذال رکھنڑ جائز نئیں ۔

‏19 اِیں واسطے ہیرودیاس اُوندے نال دشمنڑی رکھیندی ہئی تے اُونکُوں قتل کراوݨ چاہندی ہَئی پَر ایویں نہ تھی سگیا ۔ ‏20 کیوں جو ہیرودیس یُوحنّا کوں ہِک راستباز تے پاک آدمی جانڑ تے اُوندے کنوں ڈردا ہا تے اُوندی حفاظت کریندا ہا تے اُوند ے گالھیں سُنڑ تے بہُوں حیران تھی ویندا ہا پَر سُنڑدا خوشی نال ہا ۔

‏21 تے موقع دے ڈینہہ جِیں وَیلے ہیرودیس نیں آپنڑیں سالگرہ دی خوشی ءچ آپنڑے اُمراء تے فوجی افسراں تے گلیل دے رئیساں دی دعوت کیتی ‏22 تے ہیرودیاس دی دِھی اندر آئی تے نچ تے ہیرودیس تے اُوندے مہماناں کُوں خوش کیتا تاں بادشاہ اُوں چھوہیر کُوں آکھیا منگ ، تُوں جیہڑا کُجھ وی منگسیں میں تیکُوں ڈیساں ۔ ‏23 اُونیں قسم کھا تے آکھیا جیہڑا کُجھ تُوں مَیں کنُوں منگسیں ، میں آپنڑیں اَدھی بادشاہی تَئیں تیکُوں ڈے ڈیساں ۔

‏24 اُونیں باہر وَنج تے آپنڑیں ماں کنُوں پُچھیا جو میں کیا منگاں ؟

اُونیں آکھیا یُوحنّا بپتسمہ ڈیوݨ آلے دا سِر ۔

‏25 اوہ فوراً بادشاہ دے کولھ اندر آئی تے عرض کیتی میں چاہندی ہاں جو تُوں اِیں وَیلے ای ہِک تھال ءچ یُوحنّا بپتسمہ ڈیوݨ آلے دا سِر منگوا ڈے ۔

‏26 بادشاہ بہُوں غمگین تھیّا پَر آپنڑیں قسم تے مہماناں دے سببّوں اِنکار نہ کرݨ چاہیا۔ ‏27 بس بادشاہ فوراً ہِک سپاہی کُوں حکم ڈے تے بھیجیا جو اُوندا سِر گھِن آوے ۔ اُونیں قید خانہ ءچ وَنج تے اُوندا سِر کٹیا ‏28 تے ہِک تھال ءچ رکھ تے چھوہیر کُوں ڈِتا تے چھوہیر نیں آپنڑیں ماں کُوں ڈِتا ۔ ‏29 وَل اُوندے شاگرد سُنڑ تے آئے تے اُوندی لاش چا تے قبر ءچ رکھی ۔

‏30 تے رسُول یسُوع دے کولھ جمع تھئے تے جیہڑا کُجھ اُنہاں کیتا تے سِکھایا ہا سبھ اُونکُوں ڈسایا ۔ ‏31 اُونیں اُنہاں کُوں آکھیا تُساں آپ میڈے نال ویران تے کلھی جاہ تے ٹُرے آؤ تے کُجھ آرام کرو ۔ اِیں واسطے جو بہُوں لوک آندے ویندے ہَن تے اُنہاں کُوں کھانڑا کھاوݨ دی وی فُرصت نہ ملدی ہَئی ۔ ‏32 بس اوہ کشتی ءچ بہہ تے الگ ہِک ویران جاہ تے چلے گئے ۔

‏33 پرلوکاں اُنہاں کُوں ویندے ڈیکھ گھِّدا تے بہُوں ساریاں پچھانڑگھِدا تے سارے شہراں ءچُوں کٹھے تھی تے پیدل اُتھاں بھجّے تے اُنہاں تُوں پہلے وَنج پُجّے ۔ ‏34 یسُوع نیں کشتی تُوں لہہ تے وَڈی بِھیڑ ڈِٹھی تے اُونکُوں اُنہاں اُتے بہُوں ترس آیا کیوں جو اوہ اُنہاں بھیڈاں وانگوں ہَن جنہاں دا کوئی آجڑی نہ ہووے تے اوہ اُنہاں کُوں بہُوں سارے گالھیں دی تعلیم ڈیونڑلگا ۔ ‏35 جِیں وَیلے ڈینہہ بہُوں ڈھل گِیا تاں اُوندے شاگرد اُوندے کولھ آتے آکھنڑ لگے ایہہ جاہ ویران ہے تے ڈینہہ بہُوں ڈھل گِیا ہے ۔ ‏36 اِنہاں کُوں روانہ کر تاں جو چدھارُوں وستیاں تے دیہاتاں ءچ وَنج تے آپنڑے کھاونڑ کیتے کُجھ مُل گِھن گھننڑ ۔

‏37 اُونیں اُنہاں کُوں جواب ءچ آکھیا تُساں ای اِنہاں کُوں کھاوݨ کیتے ڈیوو ۔

اُنہاں یسوع کُوں آکھیا کیا اَساں وَنجوں تے اُنہاں دے کھاوݨ کیتے ڈو سو دینار دیاں روٹیاں مُل گِھن آؤں تے اُنہاں کُوں کھاوݨ کیتے ڈیؤں ؟

‏38 اُونیں اُنہاں کُوں آکھیا تُہاڈے کولھ کتی روٹیاں ہِن ؟ وَنجو ڈیکھو ۔

اُنہاں پتا کیتا تے ڈسایا جو پنج روٹیاں تے ڈو مچھیاں۔

‏39 اُونیں اُنہاں کُوں چھوٹی چھوٹی ٹولیاں بنڑا تے ساوی گھاہ اُتے بہہ وَنجنڑ دا حکم ڈِتا ۔ ‏40 بس اوہ سو سو تے پنجھا پنجھا دی قطاراں بنڑا تے بہہ گئے ۔ ‏41 وَل اُونیں اوہ پنج روٹیاں تے ڈو مچھیاں گھِدیاں تے اَسمان اَل ڈیکھ تے برکت ڈِتی تے روٹیاں دے ٹکڑے کر تے شاگرداں کُوں ڈیندا گِیا جو اُنہاں دے اَگُوں رکھنڑ تے اوہ ڈو مچھیاں وی اُنہاں ساریاں ءچ ونڈ ڈِتیاں ۔ ‏42 بس اوہ سارے لوک کھا تے رَج گئے ۔ ‏43 تے اُنہاں روٹی تے مچھی دے بچے ہوئے ٹکڑیاں دیاں بارہاں ٹوکریاں چاتیاں ۔ ‏44 تے کھاوݨ آلے پنج ہزار مرد ہَن ۔

‏45 تے اُونیں فوراًآپنڑے شاگرداں کُوں مجبور کیتاجو کشتی اُتے بہہ تے جھیل دے پار بیت صیدا کُوں چلے وَنجنڑ جئیں تئیں اوہ لوکاں کُوں رخصت کرے۔ ‏46 تے اُنہاں کُوں رخصت کرنڑ دے بعد اوہ دُعا کرنڑ کیتے پہاڑ اُتے چلیا گِیا ۔ ‏47 جِیں وَیلے شام تھئی تاں کشتی جھیل دے اَدھ ءچ ہَئی تے اوہ کلھا خشکی تے ہا ۔ ‏48 جِیں وَیلے اُونیں ڈِٹھا جو اُنہاں کُوں مخالف ہوا دی وجہ کنُوں کشتی کُوں چلاوݨ ءچ وڈی مشکل تھیندی پئی ہے تاں رات دے پچھلے پہر دے نیڑے جھیل اُتے ٹُردا ہویا اُنہاں دے کولھ آیا ،تے اُنہاں کنُوں اَگُوں نکلنڑ چاہندا ہا ۔ ‏49 پَر اوہ اُونکُوں پانڑی اُتے ٹُردے ڈِیکھ تے اُونکُوں بھوت سمجھ تے زور نال چیخنڑ پئے گئے ‏50 کیوں جو اوہ سارے اُونکُوں ڈیکھ تے ڈر گئے ہَن پَر اُونیں فوراً اُنہاں کوں آکھیا تسلی رکھو ، میں ہاں ، نہ ڈرو ۔ ‏51 وَل اوہ کشتی ءچ اُنہاں دے کولھ آیا تے ہوا کھڑ گئی تے اوہ آپنڑے دِلاں ءچ بہُوں حیران تھئے ۔ ‏52 اِیں واسطے جو اوہ روٹیاں دے بارے ءچ نہ سمجھے ہَن بلکہ اُنہاں دے دِل سخت تھی گئے ہَن ۔

‏53 تے اوہ پار وَنج تے گنیسرت دے علاقے ءچ پُجے تے کشتی کُوں کِنارے نال لا ڈِتا ۔ ‏54 جِیں وَیلے کشتی کنُوں لتھے تاں لوکاں فوراً یسوع کُوں پچھاݨ گھِدا ۔ ‏55 اوہ اُوں سارے علاقے ءچ بھجّےتے جِتھاں اُوندی موجُودگی دی خبر سنڑی اُتھاں آپنڑے بیماراں کُوں کھٹاں اُتے چا تے اُوندے کولھ گھِن آونڑ لگے ۔ ‏56 تے وستیاں ،شہراں تےدیہاتاں ءچ جِتھاں وی اوہ ویندا ہا لوک بیماراں کُوں بازاراں ءچ رکھ ڈیندے ہَن تے اُوندی مِنت کریندے ہَن جو اوہ اُنہاں کُوں صِرف آپنڑیں پُشاک کُوں ہَتھ لاونڑ ڈیوے تے جیہڑے اُونکوں ہَتھ لا گھندے ہَن ، ٹھیک تھی ویندے ہَن ۔