‏3 کیوں جو فریسی تےسارے یہُودی آپنڑے بُزرگاں دیاں ریتاں دے ایجھے پابند ہَن جو جیہڑے وَیلے تَئیں آپنڑے ہَتھ چنگی طرحاں دھو نہ گھننڑ کھانڑا نہ کھاندے ہَن ۔ ‏4 تے بازار تُوں آ تے غُسل کیتے بغیر کھانڑا نہ کھاندے ، تے اِیں طرحاں بِیا وی بہُوں ساریاں ریتاں ہِن جیہڑیاں اُنہاں کُوں مِلیاں ہِن ،اُنہاں دے پابند ہِن جیویں پیالیاں تے مُنگراں تے تانبے دے تھاواں کُوں دھوونڑاں ۔

‏5 بس فریسیاں تے فقیہاں اُوں کنُوں پُچھیا کیا وجہ ہے جو تیڈے شاگرد بُزرگاں دیاں ریتاں تے نئیں چلدے تے ناپاک ہتھاں نال کھانڑا کھاندے ہِن ؟

‏6 اُونیں اُنہاں کُوں آکھیا یسعیاہ نبی تُساں منافقاں دے بارے کیا خوب نبوت کیتی ہے ، جیویں لکھیا ہے

‏9 تے یسوع اُنہاں کُوں آکھیا تُساں آپنڑیں رِیت کُوں قائم رکھنڑ کیتے خُدا دے حکم کُوں بالکل رَد کر ڈیندے ہِوے ۔ ‏10 کیوں جو مُوسیٰ فرمائے جو آپنڑے ماں پیُو دی عزت کر تے جیہڑا کوئی آپنڑے پیُو یا ماں کُوں بُرا آکھے اوہ ضرور جان کنُوں مار ڈِتا وَنجے ۔ ‏11 پَر تُساں آہدھے ہِوے جو جے کوئی آپنڑے پیُو یا ماں کُوں آکھے جو میڈی جیہڑی چیز نال تیکُوں فائدہ مِل سگدا ہا اوہ قُربان یعنی خُدا دی نذر تھی گئی ، ‏12 تاں تُساں اُونکُوں آپنڑے ماں پیُو دی کوئی مدد نئیں کرݨ ڈیندے ۔ ‏13 اِیویں تُساں آپنڑیں رِیت کنُوں جیہڑی تُساں خود جاری کیتی خُدا دے کلام کُوں باطل کر ڈیندے ہِوے تے اِیں طرحاں دے بہُوں کَم کریندے ہِوے ۔

‏14 یسوع لوکاں کُوں آپنڑے کولھ سَڈ تے آکھنڑ لگا تُساں سارے میڈی سُنڑو تے سمجھو ۔ ‏15 کوئی چیز باہر کنُوں اندر وَنج تے آدمی کُوں ناپاک نئیں کر سگدی، پَر جیہڑیاں چیزاں آدمی ءچوں نکلدیاں ہِن اُوہو اُونکُوں ناپاک کریندیاں ہِن ۔ ‏16 (جے کہیں کولھ سُننڑ آلے کَن ہووݨ تاں اوہ سُنڑ گھِنے )۔

‏17 جِیں وَیلے اوہ بِھیڑ کُوں چھوڑ تے گھر ءچ داخل تھیّا تاں اُوندے شاگرداں نیں اُوں کنُوں اِیں تمثیل دا مطلب پُچھیا ۔ ‏18 اُونیں اُنہاں کُوں آکھیا کیا تُساں وی ایجھے بے سمجھ ہِوے ؟ کیا تُساں نئیں سمجھدے جو جیہڑی چیز باہر کنُوں اِنسان دے اندر ویندی ہے اوہ اُونکُوں ناپاک نئیں کر سگدی ۔ ‏19 اِیں واسطے جو اوہ اُوندے دل ءچ نئیں بلکہ پیٹ ءچ ویندی ہے، تے وَلا اُتھا ں کنُوں باہر نِکل ویندی ہے ؟ ایہہ آکھ تے اُونیں کھاوݨ آلیاں سبھ چیزاں کُوں پاک مقرّر کیتا ۔

‏20 وَل اُونیں آکھیا جیہڑا کُجھ اِنسان دے ءچوں نِکلدے اُوہو اُونکُوں ناپاک کریندے ۔ ‏21 کیوں جو اندر کنُوں یعنی دِل تُوں بُرے خیال ، حرامکاریاں ،چوریاں ، خون ریزیاں، ‏22 زِنا کاریاں ، لالچ ، بدکاری ، مکر ، شہوت پرستی ، بد نظری ، بدگوئی ، شیخی تے حماقت اُوندے دِل کنُوں نکلدے ہِن ۔ ‏23 ایہہ ساریاں بُرائیاں اندر کنُوں نِکل تے اِنسان کُوں ناپاک کریندیاں ہِن ۔

‏24 وَل اُتھوں کنُوں اُٹھی تے صُور تے صیدا دے علاقے ءچ گِیا تے ہِک گھر ءچ داخل تھیّا ،تے نہ چاہند ا ہا جو کہیں کُوں پتا چلے پَر پوشیدہ نہ رہ سگیا ۔ ‏25 بلکہ فوراً ہِک عورت جِیندی چھوٹی دِھی ءچ بدرُوح ہَئی ، ایہہ سُنڑ تے آئی تے اُوندے پیراں ءچ ڈھٹھی ۔ ‏26 ایہہ عورت یُونانی تے سُورُفینیکی قوم دی ہَئی ۔ اُونیں اُوندی مِنت کیتی جو میڈی چھوہیر ءچوں بدرُوح کڈھ ڈے ۔ ‏27 اُونیں اُونکُوں آکھیا پہلے بالاں کُوں پیٹ بھر تے کھاوݨ ڈے کیوں جو بالاں دی روٹی گھِن تے کُتیاں کُوں سَٹ ڈیونڑ مناسب نئیں ۔

‏28 اُونیں جواب ءچ آکھیا ہاں خُداوند ۔ کُتے وی تاں میز دے تَلوں بالاں دے ڈھٹھے ہوئے ٹُکڑیاں ءچوں ای کھاندے ہِن ۔

‏29 اُونیں اُونکُوں آکھیا اِیں کلام دی خاطر وَنج ۔ بدرُوح تیڈی دِھی ءچوں نِکل گئی ہے ۔

‏30 تے اُونیں آپنڑے گھر وَنج تے ڈِٹھا جو چھوہیر کھٹ اُتے لیٹی پئی ہے تے بدرُوح نِکل گئی ہے ۔

‏31 تے وَل یسوع صُور دے علاقے کنُوں نِکل تے صیدا دے رستے کنُوں دِکپُلس دے علاقے کنُوں تھیندا ہویا گلیل دی جھیل اُتے پُجا ۔ ‏32 تے لوک ہِک ڈورے کُوں جیہڑا ہکلا وی ہا اُوندے کولھ گھِن آئے تے اُوندی مِنت کیتی جو اُوندے اُتے آپنڑا ہَتھ رکھ۔ ‏33 اوہ اُوں آدمی کُوں بِھیڑ کنُوں اَنج گِھن گِیا تے آپنڑیں اَنگلیاں اُوندے کَناں ءچ پاتیاں تے تُھک تے اُوندی زبان کُوں ہَتھ لایا ۔ ‏34 تے اَسمان اَل نگاہ کر تے ہِک آہ بھری تے اُونکُوں آکھیا اِفتح یعنی کھُل وَنج ۔

‏35 تے اُوندے کَن تے زُبان کُھل گئے تے اوہ صاف بولنڑ لگ پِیا ۔ ‏36 تے اُونیں اُنہاں کُوں حکم ڈِتا جوکہیں کُوں نہ ڈسائے پَر اوہ جتنا اُنہاں کُوں منع کریندا ہا ، لوک اُتنا زیادہ چرچا کریندے ریہے ۔ ‏37 تے اُنہاں بہُوں ای حیران تھی تے آکھیا جیہڑا کُجھ اُونیں کیتے سبھ چنگا کیتے ۔ اوہ ڈوریاں کُوں سُننڑ تے گونگیاں کُوں بولنڑ دی طاقت ڈیندے ۔