‏2 چِھی ڈینہہ دے بعد یسُوع نیں پطرس تے یعقوب تے یُوحنّا کُوں نال گِھدا تے اُنہاں کُوں اَنج ہِک اُچے پہاڑ تے کلیھپے ءچ گِھن گِیا تے اُنہاں دے سامنڑے اُوندی صورت بدل گئی ۔ ‏3 تے اُوندی پُشاک ایجھی نورانی تے برف وانگوں چِٹی تھی گئی جو دُنیا دا کوئی دھوبی وی ایجھی چِٹی نئیں کر سگدا ۔ ‏4 تے ایلیّاہ اُنہاں کُوں مُوسیٰ دے نال ڈِکھالی ڈِتا تے اوہ یسُوع نال گالھیں کریندے ہَن ۔ ‏5 پطرس یسُوع کُوں آکھیا ربّی ! ساڈا اِتھاں رہنڑچنگا ہے ۔ بس اَساں تَرے ڈیرے بنڑاؤں ۔ ہِک تیڈے کیتے ، ہِک موسیٰ کیتے ، ہِک ایلیّاہ کیتے ۔ ‏6 کیوں جو اوہ نہ جانڑد ا ہا جو کیا آکھے، اِیں واسطے جو اوہ بہُوں ڈر گئے ہَن ۔

‏7 وَل ہِک بَدل نیں اُنہاں اُتے سایہ کر گھِدا تے اُوں بَدل ءچوں آواز آئی جو ایہہ میڈا پیارا پوتر ہے ، اِیندی سُنڑو۔ ‏8 تے اُنہاں فوراً چارُوں پاسوں نِگاہ ماری پَر اُنہاں یسُوع دے سِوا آپنڑے نال کہیں بئے کُوں نہ ڈِٹھا ۔

‏9 جِیں وَیلے اوہ پہاڑ کنُوں لہندے پئے ہَن تاں اُونیں اُنہاں کُوں حکم ڈِتا جو جئیں تَئیں ابن ِآدم مُردیاں ءچوں زندہ نہ تھی وِنجے ، جیہڑا کُجھ تُساں ڈِٹھے کہیں کُوں نہ ڈسائے ۔

‏10 اُنہاں اِیں کلام کُوں یاد رکھیا پَر آپس ءچ تکرار کر یندے ہَن جو مُردیاں ءچوں جی اُٹھنڑ دا کیا مطلب ہے ؟ ‏11 وَل اُنہاں اُوں کنُوں ایہہ پُچھیا جو فقیہہ کیونکر آہدھے ہِن جو ایلیّاہ دا پہلے آوݨ لازم ہے ؟

‏12 اُونیں اُنہاں کُوں آکھیا جو ایلیّاہ تاں پہلے آ تے سبھ کُجھ بحال کریسی، پَر کیا وجہ ہے جو ابن ِآدم دے بارے ءچ لکھیا ہے جو اوہ بہُوں ڈُکھ چیسی تے حقیر کیتا ویسی ؟ ‏13 پَر میں تُہاکُوں سچ آہدھا ہاں جو ایلیّاہ تاں آ گِیا ہے تے جیویں اُوندےبارے ءچ لکھیا ہے اُنہاں اُوندے نال جیویں چاہیا اُونویں ای کیتا ۔

‏14 جِیں وَیلے اوہ شاگرداں دے کولھ آئے تاں ڈِٹھا جو اُنہاں دے آسوں پاسوں وڈی بِھیڑ ہے تے فقیہہ اُنہاں نال بحث کریندے پئے ہِن ۔ ‏15 تے ساری بِھیڑ اُونکُوں ڈیکھ تے نہایت حیران تھئی تے اُوندے اَل بھج تے اُونکُوں سلام کیتا ۔ ‏16 اُونیں اُنہاں کنُوں پُچھیا تُساں اُنہاں نال کیا بحث کریندے ہِوے ؟

‏17 تے بِھیڑ ءچوں ہِک نیں جواب ڈِتا جو اے اُستاد ! میں آپنڑے پوتر کُوں جِ یندے ءچ گونگا کرݨ آلی بد رُوح ہے ، تُہاڈے کولھ گھِن آیا ہم ۔ ‏18 اوہ جِتھاں اُونکُوں قابو کر گھِندی ہے ، سَٹ ڈیندی ہے تے اُوندے مُنہ کنُوں جھگ نِکلدی ہے ، تے اوہ ڈند پیندے تے سُکدا ویندے ،تے میں تیڈے شاگرداں کُوں آکھیا ہا جو اُونکُوں کڈھ ڈیوݨ پَر اوہ نہ کڈھ سگے ۔

‏19 اُونیں جواب ءچ اُنہاں کُوں اکھیا اے بے اعتقاد قوم، میں کِیں وَیلے تَئیں تُہاڈے نال رَہساں ؟ کِیں وَیلے تَئیں تُہاڈی برداشت کریساں ؟ اُونکُوں میڈے کولھ گھِن آؤ۔ ‏20 بس اوہ اُونکُوں اُوندے کولھ گھِن آئے

تے جیہڑے وَیلے اُونیں اُونکُوں ڈِٹھا تاں فوراً بدرُوح اُونکُوں مروڑیا تے اوہ زمین تے ڈھٹھا تے لیٹڑنیاں مارݨ لگا تے اُوندے مُنہ کنُوں جَھگ نکلنڑ لگ پئی۔ ‏21 یسُوع نیں اُوندے پیُو کنُوں پُچھیا ، ایہہ اِیں کُوں کڈݨ کنُوں ہے؟

اُونیں آکھیا چھوٹے لا کنُوں ۔ ‏22 تے اُونیں اُونکُوں ہلاک کرݨ کیتے کئی واری بھاہ تے پانڑی ءچ سَٹیا پَر جے تُوں کُجھ کر سگدیں تاں سا ڈے اُتے ترس کھا تے ساڈی مدد کر ۔

‏23 یسُوع اُونکُوں آکھیا کیا! جے تُوں کر سگدیں ؟ جیہڑا اعتقاد رکھیندے اُوندے کیتے سبھ کُجھ تھی سگدے ۔

‏24 اُوں چھوہر دے پیُو فوراً چیخ تے آکھیا میں اعتقاد رکھیندا ہاں ، تُوں میڈی بے اعتقادی دا عِلاج کر ۔

‏25 جِیں وَیلے یسُوع ڈِٹھا جو لوک بھج بھج تے جمع تھیندے پئے ہِن تاں اُونیں بدرُوح کُوں دَڑکا ڈے تے آکھیا اے گونگی ڈوری بدرُوح ! میں تیکُوں حکم ڈیندا ہاں ، اِیں ءچوں نِکل آ تے وَلا کڈھائیں اِیندے ءچ داخل نہ تھیویں ۔

‏26 اوہ چیخ مار تے اُونکُوں بہُوں مروڑ تے نِکل آئی تے اوہ مُردے وانگوں تھی گِیا ایہہ تَئیں جو بہُوں سارے آکھنڑ پئے گئے جو اوہ مَر گِیا ۔ ‏27 پَر یسُوع اُوندا ہَتھ پکڑ تے اُونکُوں چاتا تے اوہ اُٹھی کھڑا تھیّا ۔

‏28 جِیں وَیلے یسوع گھر ءچ داخل تھیّا تاں اُوندے شاگرد اں کلیھپے ءچ اُوں کنُوں پُچھیا جو اَساں اُونکُوں کیوں نہ کڈھ سگے ؟

‏29 یسوع اُنہاں کُوں جواب ڈِتا جو ایہہ قِسم دُعا دے سِوا کہیں بئے طریقے نال نئیں نِکل سگدی ۔

‏30 وَل اوہ اُتھوں کنُوں روانہ تھئے تے گلیل دے علاقے کنُوں لنگھدے پئے ہَن، تے یسوع نہ چاہندا ہا جو کہیں کُوں خبر تھیوے ۔ ‏31 اِیں واسطے جو اوہ آپنڑے شاگرداں کُوں تعلیم ڈیندا تے اُنہاں کُوں اَکھیندا ہا جو ابن ِآدم آدمیاں دے حوالے کیتا ویسی تے اوہ اُونکُوں قتل کریسن تے اوہ قتل تھیوݨ دے تَرے ڈینہہ بعد زندہ تھیویسی ۔

‏32 پَر اوہ اِیں گالھ کُوں نہ سمجھدے ہَن تے اُونکُوں پُچھنڑ تُوں ڈر دے ہَن ۔

‏33 وَل اوہ کفرنحُوم ءچ آئے تے جیہڑے وَیلے اوہ گھر ءچ ہا تاں اُونیں اُنہاں کنُوں پُچھیا جو تُساں رستے ءچ کیا بحث کریندے ہِوے؟

‏34 اوہ چُپ ریہے کیوں جو رستے ءچ آپس ءچ ایہہ بحث کریندے ہَن جو وڈا کوݨ ہے ؟ ‏35 وَل اُونیں بہہ تے اُنہاں بارہاں کُوں سڈیا تے اُنہاں کُوں آکھیا جو جے کوئی اوّل درجہ پاوݨ چاہندے تاں ساریاں کنُوں چھیکڑ تے ساریاں دا خادم بنڑے ۔ ‏36 تے ہِک بال کُوں گھِن تے اُنہاں دے اَدھ ءچ کھڑا کیتا ۔ وَل اُونکُوں جھولی ءچ گھِن تے اُنہاں کُوں آکھیا ‏37 جیہڑا کوئی میڈے ناں ءچ ایجھے بال کُوں قبول کریندے اوہ میکُوں قبول کریندے ،تے جیہڑا کوئی میکُوں قبول کریندے اوہ میکُوں نئیں بلکہ میڈے بھیجنڑ آلے کُوں قبول کریندے ۔

‏38 یُوحنّا اُونکُوں آکھیا اے اُستاد !اَساں ہِک شخص کُوں تیڈے ناںءچ بدرُوحاں کڈھیندے ڈِٹھا تے اَساں اُونکُوں منع کرݨ لگے کیوں جو اوہ ساڈی پیروی نئیں کریندا ۔

‏39 پَر یسُوع آکھیا اُونکُوں منع نہ کرائے کیوں جو ایجھا کوئی نئیں جیہڑا میڈے ناںءچ معجزے ڈِکھاوے تے فوراً میکُوں بُرا بھلا آکھ سگے ۔ ‏40 کیوں جو جیہڑا ساڈے خِلاف نئیں اوہ ساڈے نال ہے ۔ ‏41 تے جیہڑا کوئی تُہاکُوں اِیں واسطے ہِک پیالہ پانڑی پلیندے جو تُساں المسیح دے ہِوے، میں تُہاکُوں سچ آہدھاہاں جو اوہ آپنڑا اَجر ہر گز نہ ونجیسی۔

‏42 پَر جیہڑا کوئی اِنہاں چھوٹیاں ءچوں جیہڑے میڈے اُتے اِیمان گھِن آئے ہِن کہیں کیتے ٹھوکر دا باعث بنڑدے، اُوندے کیتے اِیہو چنگا ہے جو چکی دا پُڑ اُوندی گردن ءچ پاتے اُونکُوں سمندر ءچ سَٹ ڈِتا وَنجے ۔ ‏43 جے تیڈا ہَتھ تیکُوں ٹھوکر کھواوے تاں اُونکُوں کَپ سَٹ کیوں جو ٹُنڈا تھی تے زندگی ءچ داخل تھیونڑ ، ڈو ہَتھا ں دے نال دوزخ دی اُوں بھاہ ءچ سَٹے وَنجنڑ کنُوں چنگا ہے جیہڑی کڈھائیں وی نئیں وِسمدی۔ ‏44 (جِتھاں اُنہاں دا کیڑا نئیں مردا تے بھاہ نئیں وِسمدی ۔) ‏45 تے جے تیڈا پیر تیکُوں ٹھوکر کھواوے تاں اُونکُوں کَپ سَٹ کیوں جو تیڈے کیتے مَنڈا تھی تے زِندگی ءچ داخل تھیونڑ ، ڈوپیراں دے نال دوزخ ءچ وَنجنڑ کنُوں چنگا ہے ۔ ‏46 (جِتھاں اُنہاں دا کیڑا نئیں مردا تے بھاہ نئیں وِسمدی ۔) ‏47 تے جے تیڈی اَکھ تیکُوں ٹھوکر کھواوے تاں اُونکُوں کڈھ سَٹ کیوں جو کانڑاں تھی تے خُدا دی بادشاہی ءچ داخل تھیونڑ ، ڈو اَکھیں رکھیندے ہوئے دوزخ ءچ وَنجنڑ کنُوں چنگا ہے ۔ ‏48 جِتھاں اُنہاں دا کیڑا نئیں مردا تے بھاہ نئیں وِسمدی ۔

‏49 کیوں جو ہر بندہ بھاہ کنُوں نمکین کیتا ویسی، ( تے ہر قربانی نمک نال نمیکن کیتی ویسی۔)

‏50 نمک چنگا ہے پَر جے اُوندی نمکینی وَیندی رَہے تاں اُونکُوں کیڑھی چیز نال نمکین کریسو؟

آپنڑے ءچ نمک رکھو تے آپس ءِ چ میل ملاپ نال رَہو۔