‏8 یسوع دے گالھیں اُنہاں کُوں یاد آئیاں، ‏9 تے قبر کنُوں وَل تے اُنہاں گیارہ تے باقی سارے لوکاں کُوں اِنہاں سارے گالھیں دی خبر ڈِتی ۔ ‏10 جنہاں رسُولاں کُوں اِنہاں گالھیں دی خبر ڈِتی اوہ مریم مگدلینی تے یوأنہ تے یعقوب دی ماں مریم تے اُنہاں دے نال دیاں باقی عورتاں ہَن ، ‏11 پَر اُنہاں کُوں ایہہ گالھیں خیالی قِصے وانگوں لگیاں تے اُنہاں اِنہاں دا یقین نہ کِیتا ۔ ‏12 اِیں تُوں پطرس اُٹھی تے قبر تَئیں بھجیا گِیا تے جُھک تے ڈِٹھا تاں اُونکُوں صرف کفن ای نظر آیا ۔تے اوہ اِیں ماجرے کُوں ڈیکھ تے حیران تھینداہویا آپنڑے گھر چلیا گِیا ۔

‏13 تے ڈیکھو ، اُنہاں ءچوں ڈو آدمی اُونہئی ڈینہہ اُوں دیہات دو ویندے پئے ہَن ، جِیندا ناں اِمّاؤُس ہے ۔ اوہ یروشلِیم کنُوں تقریباً سَت مِیل پَرے ہے ۔ ‏14 ٹُردے ٹُردے اوہ آپس ءچ اُنہاں واقعات دے بارے ءچ گالھیں کریندے ویندے ہَن جیہڑے تھئے ہَن ۔ ‏15 جِیں وَیلے اوہ گالھیں تے آپس ءچ گالھ مُہاڑ کریندے پئے ہَن تاں اِیویں تھیّا جو یسُوع خود نیڑے آ تے اُنہاں دے نال ٹُرݨ لگا ۔ ‏16 پَر اوہ اُونکُوں پچھاݨ نہ سگے کیوں جو اِیویں لگا جیویں اُنہاں دیاں اَکھیں بند کیتیاں گئیاں ہَن ۔ ‏17 اُونیں اُنہاں کُوں آکھیا تُساں آپس ءچ کیا گالھیں کریندے ویندے ہِوے ؟

اوہ غمگین کھڑے تھی گئے ۔ ‏18 وَل اوہ جِیندا ناں کلِیُپاس ہا ، اُونکُوں آکھنڑ لگا ، کیا تُوں یروشلِیم شہر ءچ کلھا پردیسی ہیں جیہڑا ایہہ وی نئیں جانڑدا جو اِنہاں ڈینہاں ءچ کیا تھئے ؟

‏19 اُونیں اُنہاں کُوں آکھیا کیا تھئے ؟

اُنہاں اُونکُوں جواب ءچ آکھیا یسُوع ناصری دا واقعہ ، جیہڑا آپنڑے کَم تے کلام دی وجہ کنُوں خُدا دی نگاہ ءچ تے سارے لوکاں دے نیڑے قُدرت آلا نبی ہا، ‏20 تے سردار کاہناں تے ساڈے حاکماں اُونکُوں پکڑوا ڈِتا تاں جو اُوندے قتل دا حکم ڈِتا وَنجے، تے اُونکُوں صلیب چڑھا ڈِتا ، ‏21 پَر ساکُوں اُمید ہئی جو ایہو اِسرائیل کُوں رہائی ڈیسی۔ تے اِیندے علاوہ اِنہاں واقعات کُوں تھئے اَج تَریجھا ڈینہہ ہے۔ ‏22 ساڈے ءچوں کُجھ عورتاں نیں ساکُوں حیران کر ڈِتا جیہڑیاں سویر نال اُوندی قبر اُتے گئیاں ہَن ۔ ‏23 جِیں وَیلے اُنہاں کُوں اُوندی لاش نہ مِلی تاں ایہہ آہدھیاں ہوئیاں آئیاں جو اَساں رویا ءچ فرشتیاں کُوں ڈِٹھے جنہاں دا آکھنڑ ہا جو اوہ زندہ ہے ۔ ‏24 تے ساڈے کُجھ دوست قبر اُتے گئے تے جیویں عورتاں آکھیا ہا اُونویں ای ڈِٹھا پَر اُونکُوں نہ ڈِٹھا ۔

‏25 یسوع اُنہاں کُوں آکھیا اے نادانو تے نبیاں دے سبھ گالھیں کُوں مَننڑ ءچ سُست اعتقادو! ‏26 کیا المسیح کیتے لازم نہ ہا جو اوہ ڈُکھاں کُوں برداشت کر تے آپنڑے جلال ءچ داخل تھیندا؟ ‏27 وَل موسیٰ کنُوں گِھن تے سارے نبیاں دے گالھیں جیہڑیاں اُوندے حق ءچ لکھیاں ہوئیاں ہِن ، اُنہاں کُوں سمجھا ڈِتیاں ۔

‏28 اِتی دیر ءچ اوہ اُوں دیہات دے نیڑے پُجے جِتھاں اُنہاں وَنجنڑاں ہا تے اُوندے انداز کنُوں اِیویں لگیا جیویں اوہ اَگُوں وَنجنڑ چاہندا ہے ۔ ‏29 اُنہاں اُونکُوں ایہہ آکھ تے مجبور کیتا جو ساڈے کولھ ٹِک پو کیوں جو شام تھیوݨ آلی ہے تے ڈینہہ بہُوں لہہ گِیا ہے ، بس اوہ رَہنڑ کیتے اُنہاں دے نال اندر چلیا گِیا۔ ‏30 جِیں وَیلے اوہ کھانڑا کھاوݨ کیتے اُنہاں دے نال بیٹھا تاں اِیویں تھیّا جو اُونیں روٹی گِھن تے برکت ڈِتی تے تَروڑ تے اُنہاں کُوں ڈیوݨ لگا ۔ ‏31 اِیں تُوں اُنہاں دے اَکھیں کُھل گئیاں تے اُنہاں پچھاݨ گِھدا تے اوہ اُنہاں دی نظر کنُوں غائب تھی گِیا ۔ ‏32 اُنہاں ہِک ڈوجھے کُوں آکھیا جو جِیں وَیلے اوہ رَستے ءچ ساڈے نال گالھیں کریندا تے ساکُوں خُدا دے کلام دی گالھیں سمجھیندا پیا ہا تاں کیا ساڈے دِل خوشی کنُوں نہ بھریج گئے ہَن ؟

‏33 بس اوہ اُونہئی وَیلے اُٹھی تے یروشلِیم دو وَل گئے تے اُنہاں گیارہ تے اُنہاں دے ساتھیاں کُوں ہِک جاہ تے کَٹھے ڈِٹھا ۔ ‏34 اوہ آہدھے پئے ہَن جو خُداوند سچ مُچ زندہ تھی گئے تے شمعون کُوں ڈِکھالی ڈِتے ۔

‏35 تے اُنہاں رَستے دیاں سارے گالھیں ڈسائیاں تے ایہہ وی جو اُنہاں کیویں اُونکُوں روٹی توڑیندے وَیلے پچھانڑیا ۔

‏36 اوہ ایہہ گالھیں کریندے ای پئے ہَن جو یسُوع خود اُنہاں دے اَدھ ءچ آ کھڑا تھیّا تے اُنہاں کُوں آکھیا تُہاڈی سلامتی ہووے ۔

‏37 پَر اُنہاں گھبرا تے ، تے خوف کھا تےایہہ سمجھیا جو اوہ کہیں بھوت کُوں ڈیدھے پئے ہِن ۔ ‏38 اُونیں اُنہاں کُوں آکھیا تُساں کیوں گھبریندے ہِوے تے تُہاڈے دِلاں ءچ شک کیوں پیدا تھیندے ؟ ‏39 میڈے ہَتھ تے پیر ڈیکھو جو میں ای ہاں۔ میکُوں ہَتھ لا تے ڈیکھو کیوں جو رُوح دی ہڈی تے گوشت نئیں ہوندا جیویں میڈے ءچ ڈیدھے ہِوے ۔

‏40 ایہہ آکھنڑ دے بعد اُونیں اُنہاں کُوں آپنڑے ہَتھ تے پیر ڈِکھائے ۔ ‏41 پَر خوشی تے حیرت کنُوں اُنہاں کُوں یقین نہ آندا پیا ہا تے اُونیں اُنہاں کُوں آکھیا کیا اِتھاں تُہاڈے کولھ کُجھ کھاوݨ کیتے ہے ؟ ‏42 اُنہاں اُونکُوں بُھنی ہوئی مچھی دا ٹکڑا ڈِتا ۔ ‏43 اُونیں گِھن تے اُنہاں دے سامنڑے کھادا ۔

‏44 وَل اُونیں اُنہاں کُوں آکھیا جِیں وَیلے میں تُہاڈے نال ہم تاں تُہاکُوں ایہہ گالھیں ڈسا ڈِتیاں ہَن جو موسیٰ دی تَورَیت ، نبیاں دے صحائف تے زبُور ءچ میڈے بارے جیہڑا کُجھ لکھیا ہے ، اُنہاں دا پورا تھیوݨ ضرور ہا ۔

‏45 وَل اُونیں اُنہاں دا ذہن کھولیا تاں جو خُدا دے کلام کُوں سمجھنڑ ، ‏46 تے اُنہاں کُوں آکھیا اِیویں لکھیا ہے جو المسیح ڈُکھ چاسی تے تَریجھے ڈینہہ مُردیاں ءچوں زندہ تھی ویسی ۔ ‏47 تے اُوندے ناں ءچ یروشلِیم کنُوں شروع کر تے ساری قوماں ءچ توبہ تے گناہاں دی معافی دی تبلیغ کیتی ویسی۔ ‏48 تُساں اِنہاں گالھیں دے گواہ ہِوے۔ ‏49 تے ڈیکھو ، میڈے باپ نیں جِیندا وعدہ کیتے ^a، میں اُونکُوں تُہاڈے اُتے نازل کریساں ، پَر جئیں تَئیں تُہاکُوں اَسمان کنُوں قوت نہ مِلے اِیں شہر ءچ ٹِکے رَہو۔

‏50 وَل اوہ اُنہاں کُوں بیت عنیاہ تَئیں باہر گِھن گِیا تے آپنڑے ہَتھ چا تے اُنہاں کُوں برکت ڈِتی ۔ ‏51 تے اِیویں تھیّا جو جیں وَیلے اوہ برکت ڈیندا پیا ہا تاں اُنہاں کنُوں اَنج تھی گِیا تے اَسمان اُتے چا گِھدا گِیا ، ‏52 تے اوہ اُونکُوں سِجدہ کر تے بہُوں خوشی نال یروشلِیم دو وَل گئے ۔ ‏53 تے اوہ ہیکل ءچ حاضر تھی تے ہر وَیلے خُدا دی حمد کریندے رہندے ہَن ۔