ایہہ اِنجیل یسُوع المسیح دی مَوت تے یسُوع المسیح دے زندہ تھی وَنجنڑ دے بہُوں سال بعد ٩٠ کنُوں ٩٦ عیسوی دے درمیان لکھی گئی ۔اِیں اِنجیل دے مُصنف مُقدّس یُوحنّا رسُول ہِن ۔اِیں اِنجیل دا مَقصد ایہہ ہے جو اِیندے پڑھن آلے یسُوع المسیح اُتے اِیمان گِھن آوݨ تے یسُوع المسیح دے ناں نال ہمیشاں دی زندگی پاوݨ (٢٠ ٣١ )۔ اِیں اِنجیل کنُوں ظاہر ہے جو یسُوع المسیح محض ہِک عظیم ہستی ای نئیں بلکہ ذات ِ الٰہی ہِن ۔ یسُوع المسیح دے معجزے تے بہُوں ساری تعلیمات جیہڑی ڈوجھے کتاباں ءچ نئیں لکھیاں گئیاں ، اِیں اِنجیل ءچ لکھیاں ہِن ۔ یسُوع المسیح دی مَوت تے زندہ تھی وَنجنڑ دے بعد آپنڑے شاگرداں اُتے ظاہر تھیوݨ دے واقعات اِیں اِنجیل ءچ خاص طور نال بیان کیتے گئے ہِن ۔ایہہ اِنجیل یسُوع المسیح دی الوہیت تے یسُوع المسیح دی زندگی دی تفسیر تے تعبیر اُتے بہُوں زیادہ زور ڈیندی ہے ۔

یسُوع المسیح دی شخصیت دے اظہار کیتے بہُوں سارے استعارے استعمال کیتے گئے ہِن ۔ مثلاً نُور ، حق ، محبت ، چنگا آجڑی ، بہشتی دروازہ، قیامت تے زندگی ، حقیقی روٹی وغیرہ ۔ باب ١٤ کنُوں ١٧ تَئیں جیہڑا بیان کیتا گِیا ہے اُوں کنُوں یسُوع المسیح دی اُوں گھاٹی محبت دا جیہڑا یسُوع آپنڑے اِیمان گِھننڑ آوݨ آلیاں نال رکھیندے ہِن تے اُوں تسلی دا جیہڑا یسُوع المسیح اُتے اِیمان گِھننڑ نال حاصل تھیندے ، چنگی طرح اندازہ لایا وَنج سگدے ۔