‏3 پِیلاطُس اُوں کنُوں پُچھیا کیا تُوں یہُودیاں دا بادشاہ ہیں ؟

یسُوع جواب ءچ اُونکُوں آکھیا تُوں خود آہدھیں ۔

‏4 پِیلاطُس سردار کاہناں تے عوام کُوں آکھیا میں اِیں شخص ءچ کوئی قصور نئیں ڈیدھا۔

‏5 پَر اوہ ضِد کر تے آکھنڑ لگے جو اوہ تمام یہُودیہ ءچ بلکہ گلیل تُوں گِھن تے اِتھاں تئیں لوکاں کُوں سِکھا سِکھا تے وَرغلیندے ۔

‏6 پِیلاطُس ایہہ سُنڑیا تاں اُوں کنُوں پُچھیا کیا ایہہ آدمی گلیلی ہے ؟ ‏7 تے جیویں ای اُونکُوں معلوم تھیّا جو اوہ ہیرودیس دے علاقہ دا ہے ، اُونکُوں ہیرودیس دے کولھ بھیجیا کیوں جو اوہ اُنہاں ڈینہاں ءچ خود وی یروشلِیم ءچ ہا ۔ ‏8 ہیرودیس یسُوع کُوں ڈِٹھا تاں بہُوں خوش تھیّا کیوں جو اُونکُوں بہُوں عرصے کنُوں یسوع کُوں ڈیکھنڑ دی خواہش ہئی ، اِیں واسطے جو اُونیں اُوندے متعلق بہُوں گالھیں سُنڑیاں ہَن ،تے اُونکُوں اُمید ہئی جو اُوں کنُوں کوئی معجزہ تھیندا ڈیکھ سگسی ۔ ‏9 تے اوہ بہُوں سارے سوال اُوں کنُوں پُچھدا ریہا ، پَر اُونیں اُونکُوں کوئی جواب نہ ڈِتا ، ‏10 تے سردار کاہن تے فقیہہ کھڑے تھی تے بہُوں زور شور نال اُوندے اُتے اِلزام لَیندے ریہے ۔ ‏11 وَل ہیرودیس نیں آپنڑے سپاہیاں دے نال رَل تے اُونکُوں ذلیل کیتا تے اُوندا مذاق اُڈایا تے ہِک چمکنڑاں چوغہ پوا تے اُونکُوں پِیلاطُس دے کولھ واپس بھیج ڈِتا ۔ ‏12 اُونہئی ڈینہہ پِیلاطُس تے ہیرودیس ہِک ڈوجھے دے دوست بنڑ گئے کیوں جو پہلاں اُنہاں دی دشمنڑی ہئی ۔

‏13 وَل پِیلاطُس نیں سردار کاہناں تے سرداراں تےعوام کُوں جمع کر تے ‏14 اُنہاں کُوں آکھیا جو تُساں اِیں شخص کُوں ایہہ آکھ تے گِھن آئے ہِوے جو ایہہ لوکاں کُوں وَرغلیندا ہے تے ڈیکھو میں خود وی تُہاڈے سامنڑے تفتیش کیتی ہے پَر جیہڑے جُرم دا اِلزام تُساں اُوندے اُتے لَیندے ہِوے ، میں اُونکُوں مُجرم نئیں ڈیدھا ، ‏15 تے نہ ہیرودیس ، کیوں جو اُونیں اُونکُوں ساڈے کولھ واپس بھیج ڈِتے ، تے ڈیکھو اُوں کنُوں کوئی ایجھا کَم نئیں تھیّا جِیندی وجہ تُوں اُونکُوں قتل دی سزا ڈِتی وَنجے ۔ ‏16 بس میں اُونکُوں کُٹوا تے چھوڑ ڈیندا ہاں ۔ ‏17 (اُوندے کیتے لازم ہا جو ہر عید اُتے مُجرماں ءچوں کہیں ہِک کُوں لوکاں دی خاطر چھوڑ ڈیوے ۔)

‏18 اوہ سارے ہِک آواز تھی تے چیخنڑ لگے جو اِیں آدمی کُوں گِھن وَنج تے برابّا کُوں ساڈے کیتے چھوڑ ڈے ۔ ‏19 (برابّا کہیں بغاوت دی وجہ کنُوں جیہڑی شہر ءچ تھئی ہئی تےقتل دے جُرم ءچ ، قید ہا )۔

‏20 پَر پِیلاطُس یسُوع کُوں چھوڑ ڈیوݨ دے ارادہ نال ، اُنہاں کنُوں وَلا پُچھیا۔ ‏21 پَر اوہ چیخدے ریہے جو اُونکُوں مصلُوب کر، مصلُوب!

‏22 اُونیں تَریجھی پھیری اُنہاں کنُوں پُچھیا کیوں ؟ آخر اُونیں کیہڑا جُرم کیتے ؟ میں اُوندے ءچ قتل دی کوئی وجہ نئیں پاتی ، بس میں اُونکُوں کُٹوا تے چھوڑ ڈیندا ہاں ۔ ‏23 پَر اوہ چیخ چیخ تے مطالبہ کرݨ لگے جو اوہ مصلُوب کیتا وَنجے، تے اُنہاں دے چیخنڑ نال اُنہاں دی سُنڑی گئی ۔ ‏24 بس پِیلاطُس نیں اُنہاں دی درخاست دے مطابق مَوت دا حکم ڈے ڈِتا ، ‏25 تے جیہڑا آدمی بغاوت تے خون دے جُرم ءچ قید ہا تے جِیندی رِہائی کیتے اُنہاں درخاست کیتی ہئی اُونکُوں چھوڑ ڈِتا پَر یسُوع کُوں اُنہاں دی منشا دے مطابق سپاہیاں دے حوالے کر ڈِتا ۔

‏26 جِیں وَیلے اُونکُوں گِھدی وَیندے ہَن تاں اُنہاں شمعون کُرینی کُوں جیہڑا دیہات کنُوں آندا پیا ہا ، پکڑ گِھدا تے صلیب اُوندے اُتے رکھ ڈِتی تاں جو اوہ اُونکُوں چا تے یسُوع دے پِچُھوں پِچُھوں ٹُرے ۔

‏27 لوکاں دی ہِک بِھیڑ تے بہُوں ساریاں عورتاں جیہڑیاں اُوندے کیتے وِینڑ تے ماتم کریندیاں ہَن ، اُوندے پِچُھوں ٹُریاں ۔ ‏28 یسُوع مُڑ تے اُنہاں کُوں آکھیا اے یروشلِیم دی دِھیو! میڈے کیتے نہ رو وو بلکہ آپنڑے تے آپنڑے بالاں کیتےرو وو ، ‏29 کیوں جو اوہ ڈینہہ آوݨ آلے ہِن جِیں وَیلے تُساں ایہہ اَکھیسو جو اوہ بانجھ عورتاں مُبارک ہِن جنہاں دے رحِم خالی ریہے تے اوہ چھاتیاں جنہاں کھیر نئیں پِلایا۔ ‏30 وَل اوہ پہاڑاں کُوں اَکھیسن جو ساڈے اُتے ڈھے پوو تے ٹِبیاں کُوں جو ساکُوں لُکا گِھنو۔ ‏31 جے اوہ ساوے درخت نال ایہہ سبھ کُجھ کریندے ہِن تاں سُکے درخت نال کیا کُجھ نہ کریسن ؟

‏32 تے ڈو مُجرم بئے وی ہَن جنہاں کُوں اُوندے نال گِھدی وَیندےہَن تاں جو اووی قتل کیتے وَنجنڑ ۔ ‏33 جِیں وَیلے اوہ اُوں جاہ اُتے پُجے جِینکُوں کھوپڑی آہدھے ہِن تاں اُنہاں اُتھاں اُوں کُوں صلیب چڑھا ڈِتا تے اُنہاں ڈو مُجرماں کُوں وی ، ہِک کُوں سجے پاسوں تے ڈوجھے کُوں کھبے پاسوں ۔ ‏34 یسُوع آکھیا اے باپ ! اِنہاں کُوں معاف کر کیوں جو ایہہ نئیں جانڑدے جو کیا کریندے ہِن ۔

تے اُنہاں قُرعہ پا تے اُوندے کپڑے آپس ءچ وَنڈ گِھدے ، ‏35 تے لوک کھڑے ڈیدھے پئے ہَن تے سردار وی ٹھٹھے مار مار تے آہدھے ہَن جو اِیں بئیاں کُوں بچایا جے ایہہ خُدا دا المسیح تےاُوندا چُنڑیا ہویا ہے تاں آپنڑے آپ کُوں وی بچاوے ۔

‏36 سپاہیاں وی اُوندا مذاق اُڈایا تے پیہوݨ کیتے اُونکُوں سِرکہ پیش کیتا تے آکھیا جو ‏37 جے تُوں یہُودیاں دا بادشاہ ہیں تاں آپنڑے آپ کُوں بچا ۔

‏38 تے اُوندے سِر اُتے ہِک نوشتہ ^aوی لایا گِیا ہا جو ایہہ یہُودیاں دا بادشاہ ہے۔

‏39 وَل جیہڑے مُجرم صلیب اُتے چڑھائے گئے ہَن ، اُنہاں ءچوں ہِک اُونکُوں طعنہ ڈے تے آکھیا کیا تُوں المسیح نئیں ؟ تُوں آپنڑے آپ کُوں تے ساکُوں بچا ۔

‏40 پَر ڈوجھے نیں اُونکُوں جھڑک تے آکھیا کیا تیکُوں خُدا دا ڈر کائنیں حالانکہ تُوں خود وی اُونہئی سزا ءچ گرفتار ہیں ؟ ‏41 ساڈی سَزا تاں جائز ہے کیوں جو اَساں آپنڑے کَماں دا بدلہ پَیندے پئے ہاں پَر اِیں کوئی ایجھا کَم نئیں کیتا ، ‏42 وَل اُونیں آکھیا اے یسُوع ! جِیں وَیلے تُوں آپنڑیں بادشاہی ءچ آنویں تاں میکُوں یاد کریں ۔

‏43 اُونیں اُونکُوں آکھیا میں تیکُوں سچ آہدھا ہاں جو تُوں اَج ای میڈے نال فِردوس ءچ ہوسیں ۔

‏44 وَل ڈوپہر کنُوں تَریجھے پہر تَئیں پورے مُلک ءچ اندھارا چھایا ریہا ، ‏45 تے سورج اَندھا تھی گِیا تے مَقدِس دا پردہ پَھٹ تے ڈو ٹوٹے تھی گِیا ۔ ‏46 وَل یسُوع اُچی آواز نال پُکار تے آکھیا اے باپ! میں آپنڑیں رُوح تیڈے ہَتھاں ءچ ڈیندا ہاں۔ تے ایہہ آکھ تے جان ڈے ڈِتی ۔

‏47 جِیں وَیلےصوبہ دار نیں ایہہ حال ڈِٹھا تاں خُدا دی تعریف کریندے ہوئے آکھیا بے شک ایہہ راستباز آدمی ہا ۔

‏48 تے سبھ لوک جیہڑے اُتھاں جمع ہَن ایہہ منظر ڈیکھ تے چھاتی پِٹیندے ہوئے پِچُھوں وَل گئے ۔ ‏49 تے اُوندے سبھ جاݨ پچھاݨ آلے تے اوہ عورتاں جیہڑیاں گلیل کنُوں اُوندے نال آئیاں ہَن ، پَرے کنُوں ایہہ سبھ ڈیدھیاں پیاں ہَن ۔

‏50 تے ڈیکھو یُوسف ناں دا ہِک نیک تے راستباز شخص ہا جیہڑا صدر عدالت دا ممبر ہا ، ‏51 پَر اُنہاں دی صلاح تے فیصلہ اُتے عمل دے حق ءچ نہ ہا ۔ ایہہ یہُودیاں دے شہر اَرِمَتیہ دا باشندہ ہا تے خُدا دی بادشاہی دا منتظر ہا ۔ ‏52 اُونیں پِیلاطُس دے کولھ وَنج تے یسُوع دی لاش منگی ، ‏53 تے اُونکُوں لہا تے مہین چادر ءچ وَلھیٹیا تے اُونکُوں ہِک قبر ءچ جیہڑی چٹان ءچ کھودی گئی ہئی ، رکھ ڈِتا ۔ اُوں قبر ءچ پہلے کوئی نہ رکھیا گِیا ہا ۔

‏54 اوہ تیاری دا ڈینہہ ہا تے سَبت دا ڈینہہ شروع تھیوݨ آلا ہا ۔

‏55 اوہ عورتاں جیہڑیاں گلیل کنُوں اُوندے نال آئیاں ہَن ، یُوسف دے پِچُھوں پِچُھوں گئیاں تے اُنہاں اُوں قبر کُوں ڈِٹھا تے ایہہ وی جو اُوندی لاش کُوں کیویں رکھیا گِیا ہے ۔ ‏56 تے واپس وَنج تے اُنہاں خوشبودارمصالحے تے عِطر تیار کِیتا پَر سَبت دے ڈینہہ اُنہاں حُکم دے مطابق آرام کیتا ۔