اُنہاں آکھیا اَساں وی تیڈے نال جُلدے ہاں ۔ اوہ نِکل تے کشتی ءچ وَنج بیٹھے پَر اُوں رات کُجھ نہ پکڑیا۔

‏4 تے سویر نال ای یسُوع کنارے اُتے آ کھڑا تھیّا پَر شاگرداں نہ پچھانڑیا جو اوہ یسُوع ہے ۔ ‏5 بس یسُوع اُنہاں کُوں آکھیا بالو ! کیا تُہاڈے کولھ کُجھ کھاوݨ کُوں ہے ؟ اُنہاں جواب ڈِتا کائناں !

‏6 اُونیں اُنہاں کُوں آکھیا جال کُوں کشتی دے سجے پاسوں سَٹو تاں پکڑیسو ۔ اِیں واسطے اُنہاں اِیویں ای کیتا تے وَل مچھیاں دی کثرت کنُوں چھیک نہ سگے ۔

‏7 اِیں واسطے اُوں شاگرد نیں جِینکُوں یسُوع عزیز رکھیندا ہا، پطرس کُوں آکھیا جو ایہہ تاں خُداوند ہے ۔ جیویں ای شمعون پطرس نیں ایہہ سُنڑیا جو ایہہ تاں خُداوند ہے اُونیں آپنڑا چولاکمر نال بَدھیا کیوں جو اوہ کَم کیتے ننگا ہا ^aتے پانڑی ءچ ٹَپا مار ڈِتا ‏8 تے باقی شاگرد کشتی تے سوار مچھیاں دا جال چھکیندے ہوئے آئے کیوں جو اوہ کنارے کنُوں بہُوں پَرے نہ ہَن تے اَندازاً ڈو سو ہَتھ دا فاصلہ^b ہا ۔ ‏9 جِیں وَیلے کنارے اُتے لَتھے تاں ڈِٹھا جو کولیاں دی بھاہ ہے تے اُوندے اُتے مچھی رکھی ہوئی تے روٹی ڈِٹھی ۔ ‏10 یسُوع اُنہاں کُوں آکھیا جیہڑیاں مچھیاں تُساں ہُنڑ پکڑیاں ہِن اُنہاں ءچوں کُجھ گِھن آؤ ۔

‏11 شمعون پطرس کشتی اُتے چڑھ گِیا تے جال کُوں کنارے اُتے چھیک آیا، جیہڑا ہِک سو ترونجھا وَڈی وَڈی مچھیاں کنُوں بھریا ہا ، پَر مچھیاں دی کثرت دے باوجود جال وَلا وی نہ پھٹیا ۔ ‏12 یسُوع اُنہاں کُوں آکھیا آؤ کھانڑا کھا گِھنو تے شاگرداں ءچوں کہیں کُوں وی جرأت نہ تھئی جو پُچھے جو تُوں کوݨ ہیں ؟ کیوں جو اوہ جانڑدے ہَن جو خُداوند ای ہے ۔ ‏13 یسُوع آ تے روٹی گِھدی تے اُنہاں کُوں ڈِتی تے اِیویں ای مچھی وی ڈِتی ۔

‏14 یسُوع مُردیاں ءچوں زندہ تھی وَنجنڑ دے بعد ایہہ تَریجھی پھیری آپنڑے شاگرداں اُتے ظاہر تھیّا ۔

‏15 جِیں وَیلے اُنہاں کھانڑا کھا گِھدا تاں یسُوع نیں شمعون پطرس کُوں آکھیا اے شمعون یُوحنّا دے پوتر ! کیا تُوں میکُوں اِنہاں کنُوں زیادہ عزیز رکھیندیں ؟

اُونیں اُونکُوں آکھیا ہاں خُداوند تُوں تاں جانڑدا ای ہیں جو میں تیکُوں عزیز رکھیندا ہاں۔ اُونیں اُونکُوں آکھیا تُوں میڈے برّے چَرا ۔ ‏16 اُونیں اُونکُوں وَلا آکھیا اے شمعون یُوحنّا دے پوتر !کیا تُوں میکُوں عزیز رکھیندیں ؟

اُونیں آکھیا ہاں خُداوند تُوں تاں جانڑدا ای ہیں جو میں تیکُوں عزیز رکھیندا ہاں ۔ اُونیں اُونکُوں آکھیا تُوں میڈیاں بھیڈاں دی گلہ بانی کر ۔ ‏17 اُونیں تَریجھی پھیری وَلا اُونکُوں آکھیا اے شمعون یُوحنّا دے پوتر ! کیا تُوں میکُوں عزیز رکھیندیں ؟

پطرس ڈُکھی تھی گِیا کیوں جو اُونیں اُونکُوں تَریجھی پھیری آکھیا ہا جو کیا تُوں میکُوں عزیز رکھیندیں ؟ تے اُونکُوں آکھیا اے خُداوند ! تُوں تاں سبھ کُجھ جانڑدا ہیں ۔ تیکُوں پتا ہے جو میں تیکُوں عزیز رکھیندا ہاں ۔

یسُوع اُونکُوں آکھیا تُوں میڈیاں بھیڈاں چَرا ۔ ‏18 میں تیکُوں سچ آہدھا ہاں جو جِیں وَیلے تُوں جوان ہانویں تاں آپ ای آپنڑیں کمر بَدھیندا ہانویں تے جِتھاں دِل آہدھاہا ٹُر پوندا ہانویں پَر جِیں وَیلے تُوں بُڈھا تھی ویسیں تاں تُوں آپنڑے ہَتھ وَدھیسیں تے کوئی ڈوجھا تیڈی کمر بَدھیسی تے جِتھاں تُوں وَنجنڑ وی نہ چاہسیں ، تیکُوں گِھن ویسی ۔ ‏19 اُونیں اِنہاں گالھیں تُوں اِشارہ کر ڈِتا جو پطرس کیجھی مَوت تُوں خُدا دا جلال ظاہر کریسی تے ایہہ آکھ تے اُونکُوں آکھیا میڈے پچُھوں تھی پو۔

‏20 پطرس مُڑ تے اُوں شاگرد کُوں پچُھوں آندے ڈِٹھا جِینکُوں یسُوع عزیز رکھیندا ہا تے جئیں شام دے کھانڑے وَیلے یسُوع دو جُھک تے پُچھیا ہا اے خُداوند ! اوہ کوݨ ہے جیہڑا تیکُوں پکڑویسی ؟ ‏21 پطرس اُونکُوں ڈیکھ تے یسُوع کُوں آکھیا اے خُداوند! اِیں آدمی دا کیا تھیسی ؟

‏22 یسُوع نیں اُونکُوں آکھیا جے میں چاہواں جو ایہہ میڈے وَلنڑ تَئیں زندہ رہوے تاں اِیندے نال تیکُوں کیا ؟ تُوں میڈے پچُھوں ٹُر ۔

‏23 بس بِھراواں ءچ ایہہ گالھ مشہور تھی گئی جو اوہ شاگرد نہ مَر سی۔ پَر یسُوع اُونکُوں ایہہ نہ آکھیا ہا جو اوہ نہ مَرسی بلکہ ایہہ آکھیا ہا جو جے میں چاہواں تاں اوہ میڈے وَلنڑ تَئیں زندہ رہوے تاں اِیں گالھ نال تیکُوں کیا ؟

‏24 ایہہ اُوہو شاگرد ہے جیہڑا اِنہاں گالھیں دی گواہی ڈیندے تے جئیں اِنہاں کُوں لکھیا ہے تے اَساں جانڑدے ہاں جو اُوندی گواہی سچی ہے ۔

‏25 بئے وی بہُوں سارے کَم ہِن جیہڑے یسُوع نیں کیتے ۔ جے ہر ہِک دے متعلق لکھیا وَیندا تاں میں سمجھدا ہاں جو جیہڑیاں کِتاباں لکھیاں وَیندیاں اُنہاں کیتے دُنیا ءچ گُنجائش نہ ہوندی ۔