اِیں کِتاب دے مُصنف وی مُقدّس لُوقا ہِن ۔اُنہاں اِینکُوں ٦٥ کنُوں ٧٠ عیسوی دے درمیان ءچ لکھیا۔ یسوع المسیح دے اَسمان اُتے چا تے وَنجنڑ دے بعد یسوع المسیح دے شاگرد اِنجیل دی تبلیغ کیتے جیہڑا کُجھ کیتا اُونکُوں اِیں کِتاب ءچ لکھ ڈِتے ۔اِیندے ءچ یروشلیم شہر دے اِیمانداراں دی جماعت دا حال ، سامریہ ءچ اِنجیل دی تبلیغ، مُقدّس پطرس دی مصروفیات تے اِیمانداراں دی شروع ءچ اِیذا رسانی، ایجھے واقعات وی بیان کیتے گئے ہِن ۔ بعد دے حالات مُقدّس پولُس رسُول کنُوں تے اُنہاں دی غیر یہُودی علاقیاں ءچ تبلیغی مصروفیات نال تعلق رکھیندے ہِن۔ تُساں تَرے تبلیغی سفر کیتے تے اُنہاں دے حالات وی تفصیل نال بیان کیتے گئے ہِن ۔ایہہ کِتاب ِمُقدس پولُس دے شہر روم ءچ ہِک قیدی وانگوں زندگی گزارݨ دے واقعات اُتے ختم تھیندی ہے۔

مُقدّس لُوقا ایہہ کِتاب لکھ تے اقوامِ عالم کُوں ایہہ ڈساوݨ دی کوشش کیتی ہے جو اِنجیل کیویں یہُودی علاقیاں کنُوں شروع تھی تے غیر یہُودی علاقیاں تَئیں پھیل گئی۔ بلکہ خُدا دی مرضی وی ایہو ہئی جو یسوع المسیح دی مَوت دے بعد یسوع المسیحدے زندہ تھیوݨ دی خوش خبری ساری دُنیا ءچ پھیل وَنجے۔ رسُولاں کُوں اِیں فرض کُوں پورا کرݨ کیتے رُوح القُدس دا زور بخشیا گِیا۔ اِیں واسطے اِیذا رسانی دے باوجود اُنہاں انجیل دی تبلیغ جاری رکھی۔ اُنہاں دے سارے اعمال دے پچُھوں خُدا قادرِ مطلق دا غیبی ہَتھ ڈِکھائی ڈیندے۔