‏3 جِیں وَیلے پَولُس نیں لَکڑیاں دا گَٹھا جمع کر تے بھا ءچ سَٹیا تاں بھا دی گرمی دی وجہ کنُوں ہِک سَپ باہر نِکل تے اُوندے ہَتھ اُتے وَلھٹیج گِیا۔ ‏4 جِیں وَیلے جزیرہ دے لوکاں سَپ کُوں اُوندے ہَتھ نال لٹکدے ڈِٹھا تاں آپس ءچ آکھنڑ لگے جو ”بے شک ایہہ آدمی کوئی خونی ہے۔ ایہہ سمندر ءچ مَرݨ کنُوں تاں بچ گِیا ہے پَر اِنصاف اُونکُوں زندہ نہ چھوڑیسی۔“ ‏5 پَر پَولُس نیں سَپ کُوں بھا ءچ چھنڈک ڈِتا تے اُونکُوں کوئی تکلیف نہ تھئی۔ ‏6 اوہ لوک اِنتظار ءچ ہَن جو اِیندا جِسم سُج سی تے اوہ مَر تے ڈھے پوسی پَر بہُوں اِنتظار دے بعد جِیں وَیلے پَولُس کُوں کوئی تکلیف نہ تھئی تاں اُنہاں دا خیال بدل گِیا تے آکھیا جو ”ایہہ ضرور کوئی دیوتا ہے۔“

‏7 اوہ علاقہ اُوں جزیرہ دے حاکم پُبلِیُس دی جاگیر ہا۔ اوہ ساکُوں قبول کر تے آپنڑے گھر گِھن گِیا تے تَرے ڈینہہ تئیں ساڈی چنگی خدمت داری کیتی۔ ‏8 تے اِینویں تھیّا جو پُبلِیُس دا پیُو بُخار تے دَست دے سببّوں بیمار ہا۔ پَولُس اُوندی عیادت کرݨ گِیا تے دُعا دے بعد آپنڑے ہَتھ اُوندے اُتے رکھے تے اُونکُوں شِفا ڈِتی۔ ‏9 جِیں وَیلے اِینویں تھیّا تاں اُوں جزیرے دے باقی مریض وی آ تے شِفا پاوݨ لگے۔ ‏10 اُنہاں ساکُوں بہُوں عزت ڈِتی تے اَگُوں وَنجنڑ دے وقت سفر کیتے ساڈی ضرورت دیاں ساریاں چیزاں جہاز اُتے رکھوا ڈِتیاں۔

‏11 تَرے مہینے بعد اَساں اِسکندریہ دے ہِک جہاز کنُوں روانہ تھئے جیہڑا سیالا گُزارݨ کیتے اُوں جزیرے ءچ رُکیا پِیا ہا۔ اِیں جہاز دا نِشان جُڑواں دیوتا ہا۔ ‏12 پہلے اَساں سرَکُوسہ پُجے تے تَرے ڈینہہ اُتھاں ریہے۔ ‏13 اُتھوں کنُوں اَساں چکر لا تے ریگِیُم ءچ گئے، ڈوجھے ڈینہہ جنوبی ہوا گُھلی تے اَساں ہِک ڈینہہ بعد پُتیُلِی وَنج پُجے۔ ‏14 اُتھاں ساکُوں بِھرا مِلے۔ اُنہاں دی دعوت اُتے اَساں سَت ڈینہہ تئیں اُنہاں دے کولھ ریہے۔ اِیندے بعد اَساں رُوم وَنج پُجے۔

‏15 اُتھاں دے بِھراواں ساڈی خبر سُنڑ تے ساڈے اِستقبال کیتے اَپّیُس دے چوک تے تَرے سرائے تئیں آئے۔ پَولُس اُنہاں کُوں ڈیکھ تے خُدا دا شُکر ادا کِیتا تے اُونکُوں بہُوں حوصلہ تھیّا۔

‏16 رُوم ءچ پُجنڑ دے بعد پَولُس کُوں اِجازت مِل گئی جو اوہ کلھا ہِک پہرے دار دی نِگرانی ءچ جِتھاں چاہوے رَہوے۔

‏17 جِیں وَیلے تَرے ڈینہہ گُزر گئے تاں پَولُس نیں یہُودیاں دے اُمراء کُوں سَڈوایا۔ جِیں وَیلے اوہ جمع تھئے تاں پَولُس نیں اُنہاں کُوں آکھیا، ”بِھراؤ ، میں آپنڑی اُمت دے تے پیُو ڈاڈا دی رسماں دے خلاف کوئی کَم نئیں کِیتا وَل وی میکُوں یروشلیم ءچ گرفتار کر تے رُومیاں دے حوالے کر ڈِتا گِیا۔ ‏18 اوہ تفتیش دے بعد میکُوں چھوڑ ڈیونڑا چاہندے ہَن کیوں جو میں کوئی ایجھا کَم نہ کیتا ہا جو میکُوں سزائے موت ڈِتی وَنجے۔ ‏19 پَر جِیں وَیلے یہُودیاں مخالفت کیتی تاں میں مجبوراً قیصر دے حضور اپیل کر ڈِتی، پَر اِیں واسطے نئیں جو میں آپنڑی ای قوم اُتے کوئی اِلزام لاوݨ چاہندا ہم۔ ‏20 بس میں تُہاکُوں سَڈوایا جو تُہاڈے نال مُلاقات کراں تے گالھ کراں کیوں جو میں بنی اِسرائیل دی اُمید دی وجہ کنُوں زنزیراں نال بَدھیا پِیا ہاں۔“

‏21 اُنہاں جواب ڈِتا، ”ساکُوں یہُودیہ کنُوں تہاڈے بارے ءچ نہ تاں کوئی خط مِلے تے نہ اُتھوں کنُوں آوݨ آلے بِھراواں نیں ساکُوں تہاڈی کوئی خبر ڈِتی، تے نہ ای تہادڈے خلاف کُجھ آکھیا۔ ‏22 پَر اَساں تہاڈے خیال جاننڑاں چاہندے ہئیں۔ ایہہ تاں ساکُوں معلوم ہے جو لوک ہر جاہ اِیں فرقہ دے خلاف گالھیں کریندے ہِن۔“

‏23 وَل اُنہاں پَولُس دے گالھیں سُننڑ کیتے ہِک ڈینہہ مُقرر کیتا۔ جِیں وَیلے اوہ ڈینہہ آیا تاں اوہ پہلے کنُوں وی زیادہ تعداد ءچ اُوندے کولھ جمع تھئے۔ پَولُس نیں اُنہاں کُوں خُدا دی بادشاہی دی شہادت ڈے ڈے تے یسوع دے بارے ءچ موسیٰ دی تَورَیت تے نبیاں دی کِتاباں ءچوں اُنہاں کُوں قائل کرݨ دی کوشش کیتی۔ ایہہ سلسلہ سویر کنُوں شام تئیں جاری ریہا۔ ‏24 کُجھ اُوندے گالھیں سُنڑ تے قائل تھی گئے پَر کُجھ نہ مَنے۔ ‏25 جِیں وَیلے اوہ آپس ءچ مُتفق نہ تھئے تاں پَولُس نیں اُنہاں دے روانہ تھیوݨ کنُوں پہلے ایہہ گالھ آکھی جو ”رُوح القُدس نیں یسعیاہ نبی دی معرفت ساڈے پیُو ڈاڈا دے بارے ءچ ٹھیک ای آکھیا ہا جو

‏28 اِیں واسطے میں چاہندا ہاں جو تُساں جاݨ گِھنو جو خُدا دی نجات دا پیغام غیریہُودیاں دے کولھ وی بھیجیا گِیا ہے تے اوہ اُونکُوں سُنڑ سن۔“ ‏29 [جِیں وَیلے پَولُس نیں ایہہ آکھیا تاں یہُودی آپس ءچ تکرار کریندے ہوئے اُتھوں کنُوں چلے گئے ] ۔

‏30 پَولُس پورے ڈو سال تئیں آپنڑے کرایہ دے مکان ءچ ریہا تے جیہڑے اُوندے نال مُلاقات کرݨ آندے ہَن، اُنہاں ساریاں کُوں خوشی نال مِلدا ریہا۔ ‏31 اوہ بہُوں دلیری نال خُدا دی بادشاہی دی خوشخبری سُنڑیندا تے خُداوند یسوع المسیح دے بارے ءچ تعلیم ڈیندا ریہا تے کہیں نیں اُونکُوں روکنڑ دی کوشش نہ کیتی۔