‏3 پرسِکہ^a تے اَکوِلہ کُوں میڈا سلام آکھو۔ اوہ مسیح یسوع ءچ میڈے ہم خدمت ہِن۔ ‏4 اُنہاں میڈی جان کیتے آپنڑے آپ کُوں خطرے ءچ پاتا ہویا ہا تے فقط میں ای نئیں بلکہ غیر قوماں دی سبھ کلیسیاواں وی اُنہاں دی شُکر گُزار ہِن۔ ‏5 تے اُوں کلیسیا کُوں وی سلام آکھو جیہڑی اُنہاں دے گھر ءچ ہے۔

میڈے عزیز اِپینِتُس کُوں سلام آکھو جیہڑا آسیہ ءچ مسیح اُتے اِیمان گِھن آوݨ آلا پہلا شخص ہا۔ ‏6 مریم کُوں سلام آکھو، جئیں تُہاڈے واسطے بہُوں محنت کیتی۔ ‏7 اندرُنِیکُس تے یُونِیاس کُوں سلام آکھو۔ اوہ میڈے رشتہ دار ہِن تے میڈے نال قید تھئے ہَن تے رسُولاں ءچ مشہور ہِن تے مَیں کنُوں پہلے مسیح ءچ شامل تھئے۔

‏8 اَمپلیاطُس کُوں سلام آکھو جیہڑا خُداوند ءچ میڈا عزیز ہے۔ ‏9 اُربانُس کُوں جیہڑا مسیح ءچ ساڈا ہم خدمت ہے تے میڈے عزیز استخُس کُوں سلام آکھو۔ ‏10 اَپلِّیس کُوں سلام آکھو جیہڑا مسیح ءچ مقبول ہے۔ اَرسِتُبُولُس دے گھر آلیاں کُوں سلام آکھو۔ ‏11 میڈے رشتہ دار ہیرودیون کُوں سلام آکھو۔ نَرکِسُّس دے اُنہاں گھر آلیاں کُوں سلام آکھو جیہڑے خُداوند ءچ ہِن۔

‏12 ترُوفَینہ تے ترُوفوسہ کُوں سلام آکھو جیہڑیاں خُداوندکیتے محنت کریندیاں ہِن۔ میڈی عزیز پرسِس کُوں سلام آکھو جئیں خُداوند کیتے بہُوں محنت کیتی۔ ‏13 روفُس جیہڑا خُداوند دا برگزیدہ ہے تے اُوندی ماں جیہڑی میڈی ماں وانگوں ہے، ڈوہاں کُوں سلام آکھو۔ ‏14 اَسُنکرِتُس، فلِگون ،ہِرمیس، پترُباس، ہرماس تے اُنہاں بِھراواں کُوں جیہڑے اُنہاں دے نال ہِن، سلام آکھو۔ ‏15 فِلُلگُس، یُولیہ، نیریُوس تے اُوندی بھینڑ تے اُلُمپاس تے اُنہاں سبھ مُقدّساں کُوں جیہڑے اُنہاں دے نال ہِن، سلام آکھو۔

‏16 آپس ءچ پاک بوسہ گِھن تے ہِک ڈوجھے کُوں سلام کرو۔ مسیح دیاں ساریاں کلیسیاواں تُہاکُوں سلام آہدھیاں ہِن۔

‏17 ہُنڑ اے بِھراؤ! میں تُہاکُوں درخاست کریندا ہاں جو جیہڑے لوک تُہاڈی اُوں تعلیم دے خِلاف جیہڑی تُہاکُوں مِلی ہے، پُھٹ پاوݨ تے ٹھوکر دا باعث ہِن، اُنہاں کُوں پچھانڑو تے اُنہاں تُوں دُور رَہو۔ ‏18 کیوں جو ایجھے لوک ساڈے خُداوند مسیح دی نئیں بلکہ آپنڑے پیٹ دی خدمت کریندے ہِن۔ اوہ آپنڑے چِکنی چُپڑی گالھیں نال اُنہاں لوکاں کُوں بےوقوف بنڑیندے ہِن، جیہڑے کُجھ نئیں جانڑدے۔ ‏19 تُہاڈی فرمانبرداری ساریاں ءچ مشہور تھی گئی ہے، اِیں واسطے میں تُہاڈے بارے ءچ خوش ہاں پَر ایہہ چاہندا ہاں جو تُساں نیکی دے اعتبار تُوں دانا بنڑ وَنجو تے بَدی دے اعتبار تُوں بھولے بنڑے رَہو۔ ‏20 تے خُدا جیہڑا اِطمینان دا سرچشمہ ہے، شیطان کُوں تُہاڈے پیر نال جلد کُچلوا ڈیسی۔

ساڈے خُداوند یسوع مسیح دا فضل تُہاڈے نال رَہوے۔

‏21 میڈا ہم خدمت تِیمُتھِیُس تے میڈے رشتہ دار لُوکِیُس، یاسون تے سوسِپطرُس تُہاکُوں سلام آہدھے ہِن۔

‏22 اِیں خَط دا لکھنڑ آلا ترتِیُس یعنی میں^b تُہاکُوں خُداوند ءچ سلام آہدھا ہاں۔

‏23 گیُس میڈا تے اَتھاں دی ساری کلیسیا دا میزبان تُہاکُوں سلام آہدھا ہے۔ اِراستُس شہر دا خزانچی تے کوارتُس بِھرا تُہاکُوں سلام آہدھے ہِن۔ ‏24 [ساڈے خُداوند یسوع مسیح دا فضل تُہاڈے نال ہووے۔ آمین ] ۔

‏25 خُدا دی تمجید ہووے جیہڑا تُہاکُوں میڈی خوشخبری یعنی یسوع مسیح دی منادی دے وسیلے مضبوط کر سگدا ہے، اُوں بھید دے مُکاشفہ دے مُطابق جیہڑا اَزل کنُوں لُکیا ریہا ‏26 پَر ہُنڑ ظاہر تھی تے خُدائے اَزلی دے حُکم دے مطابق نبیاں دی کتاباں دے ذریعے ساریاں قوماں کُوں ڈسایا گِیا ہے تاں جو اِیمان دے تابع تھی وَنجنڑ۔

‏27 تے ہُنڑ یسوع مسیح دے وسیلے نال اُوں حکیم تے واحد خُدا دی اَبد تئیں تمجید تھیندی رَہوے۔ آمین۔