مُقدساں کیتے چندہ
16
1 جیہڑا چندہ مُقدساں کیتے جمع کیتا وَیندے اُوندے بارے ءچ تُساں اِیں ہدایت اُتے عمل کرو جیہڑی میں گلِتیہ دی کلیسیاواں کُوں ڈِتی ہے، 2 یعنی ہر ہفتے دے پہلے ڈینہہ aتُساں ءچوں ہر شخص آپنڑی آمدنی دے مطابق کُجھ آپنڑے کولھ جمع کر تے رکھیندا رَہوے تاں جو میڈے آوݨ اُتے تُہاکُوں چندہ جمع کرݨ دی ضرورت نہ ہووے۔ 3 تے جِیں وَیلے میں آساں تاں جِنہاں کُوں تُساں منظور کریسو میں اُنہاں کُوں خط ڈے تے بھیج ڈیساں تاں جو تُہاڈی خیرات یروشلیم پُچا ڈیوݨ۔ 4 جے میڈا وَنجنڑ وی مناسب ہوسی تاں اوہ میڈے نال ای ویسن۔پَولُس دے منصوبے
5 میں مَکِدُنیہ کنُوں تھیندا ہویا تُہاڈے کولھ آساں کیوں جو میکُوں مَکِدُنیہ تُوں تھی تے وَنجنڑاں تاں ہے۔ 6 تے شاید تُہاڈے نال رَہواں بلکہ سیالا وی تُہاڈے کولھ گُزاراں تاں جو جِتھاں میکُوں وَنجنڑ ہوسی، تُساں میڈی مدد کر تے میکُوں بھیج ڈیسو۔ 7 میں ایہہ نئیں چاہندا جو میڈی ملاقات تُہاڈے نال رستے ءچ تھیوے بلکہ میکُوں اُمید ہے جو خُداوند دی مرضی تھئی تاں کُجھ عرصہ تُہاڈے کولھ رَہساں۔
8 پَر عید ِپنتِیکُست تئیں میں اِفِسُس ءچ رَہساں، 9 کیوں جو اِتھاں میڈے کیتے تبلیغ کرݨ دا ہِک وَڈا دروازہ کُھلیا پِیا ہے، بھانویں جو مخالفت کرݨ آلے وی بہُوں ہِن۔
10 جے تِیمُتھِیُس پُج وَنجے تاں خیال رکھائے جو اوہ تُہاڈے کولھ بے دھڑک ٹِکے کیوں جو اوہ وی میڈے وانگوں خُداوند دی خدمت کریندا پِیا ہے۔ 11 بس کوئی اُونکُوں حقیر نہ سمجھے بلکہ اُونکُوں صحیح سلامت بھیج ڈیوائے جو میڈے کولھ آ وَنجے کیوں جومیں اُوندا تے بئے بِھراواں دا اِنتظار کرینداں پِیا ہاں۔
12 اپُلوس بِھراکُوں میں بہُوں پھیری آکھیا جو اوہ وی مسیحی بِھراواں دے نال تُہاڈے کولھ آوے پَر اِیں وقت اوہ راضی نہ تھیّا۔ بعد ءچ مناسب موقع مِلیا تاں اوہ آسی۔
اِختتامی گالھیں
13 جاگدے رَہو۔ اِیمان ءچ قائم رَہو۔ دلیر تھیؤ تے مضبوط تھیندے وَنجو۔ 14 جیہڑا کُجھ کریندے ہِیوے مُحبت نال کرو۔
15 بِھراؤ! تُساں ستِفناس دے خاندان دے بارےءچ تاں جانڑدے ہِیوے جو اوہ اَخِیہ دے ساریاں کنُوں پہلے پھل ہِن ،تے مُقدساں دی خدمت کرݨ ءچ لگے ہوئے ہِن۔ 16 میں تُہاڈی مِنت کریندا ہاں جو ایجھے لوکاں دے تابع رَہو بلکہ ہِر ہِک دے، جیہڑا اِیں کَم تے محنت ءچ شریک ہے۔
17 میں ستِفناس، فرتُوناتُس تے اخیکُس دے آوݨ تُوں خوش ہاں کیوں جو اُنہاں میڈی مدد کر تے تُہاڈی غیر حاضری کُوں پورا ڈِتا۔ 18 اُنہاں میڈی تے تُہاڈی رُوح کُوں تازہ کیتا۔ بس ایجھیاں دی قدر کیتا کرو۔
19 آسیہ دی کلیسیاواں تُہاکُوں سلام آہدھیاں ہِن۔ اَکوِلہ تے پَرِسکہ، اُوں کلیسیا سمیت جیہڑی اُنہاں دے گھر ءچ جمع تھیندی ہے، تُہاکُوں خُداوند دے ناں ءچ بہُوں بہُوں سلام آہدھے ہِن۔ 20 سارے بِھرا تُہاکُوں سلام آہدھے ہِن۔ پاک بوسہ گھِن تے ہِک بئے کُوں سلام آکھو۔
21 میں پَولُس، آپنڑے ہَتھ نال سلام لکھدا ہاں۔
22 جیہڑا کوئی خُداوند نال مُحبت نئیں رکھیندا اوہ ملعون تھیوے ۔ساڈا خُداوندآوے !
23 خُداوند یسوع مسیح دا فضل تُہاڈے نال رَہوے۔
24 میڈی مُحبت مسیح یسوع ءچ تُہاڈے ساریاں دے نال رَہوے۔( آمین )