پَولُس نیں ایہہ خط وی اِفِسُس کنُوں کُرِنتُھس دی کلیسیا کُوں ٥٧ عیسوی دے درمیان لکھیا ہا تے اِینکُوں طِطُس دے ہَتھ روانہ کیتا ہا ۔اُوندے پہلے خط تُوں کلیسیا دی کُجھ غلط فہمیاں دُور تھی گئیاں ہَن۔ اِیندے باوجود پَولُس دے مخالفین اُوندی رسالت دے بارے ءچ لوکاں دے دِلاں ءچ شکوک پیدا کرݨ دی کوشش کریندے رَہندے ہَن۔ اُونکُوں ایجھے لوکاں دی حرکتاں کنُوں ڈُکھ تھیندا ہا ۔اُونیں ایہہ خط بھیج تے لوکاں کُوں ہوشیار رَہنڑ دی تاکید کیتی۔ اِیہو وجہ ہے جو اِیں خط ءچ پَولُس دا مزاج کُجھ سخت ہے۔

اِیں خط ءچ پَولُس آپنڑے عجیب و غریب ذاتی تجربے بیان کیتے ہِن۔(باب ١: ١٠ ـ ١٢ )۔ نال ای اُونیں جماعت کُوں درخاست کیتی ہے جو اوہ یہُودیہ دےضرورت مند مسیحیاں کیتے چندہ جمع کرݨ۔

پَولُس اِیں خط ءچ آپنڑے دعویٰ اُتے جو اوہ خُداوند یسوع مسیح دا مُقرر کیتا ہویا رسُول ہے، اُونیں وَڈا زور ڈِتے جو اوہ آپنڑے مخالفاں کُوں اُنہاں دے اعتراضات داجواب ڈیوݨ کیتے تیار ہِن۔