‏3 چُنانچہ میں تُہاکُوں سبھ کنُوں ضروری گالھ پُچا ڈِتی ہے جیہڑی میکُوں پُجی ہئی جو خُدا دے کلام دے مطابق مسیح ساڈے گُناہاں کیتے مویا، ‏4 تے دفن تھیّا تےخُدا دے کلام دے مطابق تَریجھے ڈینہہ زندہ تھی گِیا۔ ‏5 تے کیفا کُوں تے وَلا بارہاں کُوں ڈِکھالی ڈِتا۔ ‏6 اُوندے بعد پَنج سو تُوں زیادہ بِھراواں کُوں ہِکو واری ڈِکھالی ڈِتا جِنہاں ءچوں اکثر ہُنڑ تئیں زندہ ہِن، تے کُجھ سَم گئے ہِن۔ ‏7 وَل یعقوب کُوں ڈِکھالی ڈِتا تے اِیندے بعد سارے رسُولاں کُوں۔

‏8 تے ساریاں کنُوں آخر ءچ اوہ میکُوں ڈِکھالی ڈِتا جیہڑا جومیں ادُھورے ڈینہاں دا جایا ہاں۔ ‏9 کیوں جو میں رسُولاں ءچوں ساریاں کنُوں کمتر ہاں بلکہ رسُول اَکھواوݨ دے لائق وی نئیں، اِیں واسطے جو میں خُدا دی کلیسیا کُوں سَتیندا ہم۔ ‏10 پَر ہُنڑ میں جیہڑا کُجھ ہاں، خُدا دے فضل نال ہاں تے اُوندا فضل جیہڑا میڈے اُتے تھیّا، اوہ ضائع نئیں تھیّا کیوں جو میں ساریاں تُوں زیادہ محنت کیتی، حالانکہ ایہہ محنت میں آپنڑی کوشش نال نئیں کیتی بلکہ خُدا دے فضل نال جیہڑا میڈے اُتے ہا۔ ‏11 بس خواہ میں ہوواں خواہ ڈوجھے ہووݨ، اَساں ہِکو خوشخبری دی تبلیغ کریندے ہئیں تے اِنہئی اُتے تُساں اِیمان وی گِھن آئے۔

‏12 بس جِیں وَیلے مسیح دے مُردیاں ءچوں زندہ تھیوݨ دی تبلیغ کیتی وَیندی ہے تاں تُساں ءچوں کُجھ کیویں آہدھے ہِن جو مُردیاں دی قیامت نئیں؟ ‏13 جے مُردیاں دی قیامت نئیں تاں مسیح وی زندہ نئیں تھیّا۔ ‏14 تے جے مسیح زندہ نئیں تھیّا تاں ساڈی تبلیغ دا کوئی فائدہ نئیں تے تُہاڈا اِیمان گِھن آوݨ وی بے فائدہ تھیّا۔ ‏15 تے اَساں خُدا دے کُوڑے گواہ تھئے کیوں جو اَساں گواہی ڈِتی ہے جو خُدا نیں مسیح کُوں مُردیاں ءچوں زندہ کیتا۔ پَر خُدا نیں اُونکُوں زندہ نئیں کیتا جے حقیقت ءچ مُردے زندہ نئیں تھیندے۔ ‏16 بس جے مُردے زندہ نئیں تھیندے تاں مسیح وی زندہ نئیں تھیّا۔ ‏17 تے جے مسیح زندہ نئیں تھیّا تاں تُہاڈا اِیمان بے فائدہ ہے تے تُساں ہُنڑ تئیں آپنڑے گُناہاں ءچ بَدھے پئے ہِیوے۔ ‏18 بلکہ جیہڑے مسیح ءچ سَم گئے ہِن اوہ وی ہلاک تھئے۔ ‏19 جے مسیح اُتے ساڈی اُمید فقط اِیں زندگی کیتے ہے تاں اَساں ساریاں لوکاں کنُوں زیادہ بدنصیب ہئیں۔

‏20 پَر حقیقت تاں ایہہ ہے جو مسیح مُردیاں ءچوں زندہ تھی گئے تےاوہ مُردیاں ءچوں زندہ تھیوݨ آلیاں ءچوں پہلا پھل ہے۔ ‏21 کیوں جو جِیں وَیلے ہِک آدمی دے ذریعے مَوت دُنیا ءچ آئی تاں مُردیاں دی قیامت وی ہِک آدمی ای دے ذریعے آئی۔ ‏22 تے جِیویں آدم ءچ سارے مَردے ہِن اُونویں ای مسیح ءچ سارے زندہ کیتے ویسن۔ ‏23 پَر ہر ہِک آپنڑی آپنڑی واری نال۔ ساریاں کنُوں پہلے مسیح جیہڑا پہلا پھل ہے، وَل مسیح دے آوݨ اُتے اُوندےلوک۔ ‏24 وَل آخرت ہوسی۔ اُوں وَیلے مسیح ساری حکومت ، سارا اِختیار تے قُدرت فنا کر تے بادشاہی کُوں خُدا یعنی باپ دے حوالے کر ڈیسی۔ ‏25 کیوں جو جِیں وَیلے تئیں مسیح سارے دُشمنڑاں کُوں آپنڑے پیراں تَلے نہ کر گِھنے، اُونکُوں بادشاہی کرݨ ضروری ہے۔ ‏26 آخری دُشمنڑ جیہڑا فنا کیتا ویسی اوہ مَوت ہے۔ ‏27 کیوں جو لِکھیا ہےجو ”خُدا نیں سبھ کُجھ اُوندے پیراں تَلے کر ڈِتے ۔“ پَر جِیں وَیلے کلام آہدھے جو ”سارا کُجھ“ اُوندےتابع کر ڈِتا گِیا ہے تاں ظاہر ہے جو خُدا جئیں سارا کُجھ مسیح دے تابع کر ڈِتے، خود شامِل نئیں ہے۔ ‏28 بلکہ جِیں وَیلے سارا کُجھ پوتر دے تابع تھی ویسی تاں پوتر خود وی خُدا دے تابع تھیویسی جئیں سارے چیزاں پوتر دے تابع کر ڈِتیاں تاں جو خُدا ای ہر لحاظ نال سبھ کُجھ ہووے۔

‏29 جے مُردیاں دی قیامت ہوندی ای نئیں تاں اوہ لوک کیا کریسن جیہڑے مُردیاں دی خاطر بپتسمہ گِھندے ہِن؟ جے مُردے زندہ ای نئیں تھیندے تاں وَل اُنہاں کیتے بپتسمہ کیوں گِھندے ہِن؟ ‏30 تے اَساں کئیں واسطے ہر وَیلے خطرے ءچ رَہندے ہئیں؟ ‏31 بِھراؤ! میں ساڈے خُداوند یسوع مسیح ءچ ہوندے ہوئے تُہاڈے اُتے فخر کریندا ہاں تے اِیں فخر دی قَسم کھا تے آہدھا ہاں جو میں تاں ہر روز مَردا ہاں۔ ‏32 جے میں اِنسان وانگوں اِفِسُس ءچ درندیاں نال لَڑ یا تاں میکُوں کیا فائدہ تھیّا؟ جے مُردے زندہ نہ کیتے ویسن، تاں ”آؤ کھاؤں پیؤں کیوں جو کل تاں مَرنڑا ای ہے^a ۔“

‏33 دھوکے نہ کھاؤ ، بُریاں صُحبتاں چنگیاں عادتاں کُوں وِگاڑ ڈیندیاں ہِن۔ ‏34 راستباز ہووݨ کیتے ہوش ءچ آؤ تے گُناہ نہ کرو۔ کیجھی شرم دی گالھ ہے جوہُنڑ وی تُہاڈے ءچوں کُجھ خُدا کُوں نئیں جانڑدے۔

‏35 ہُنڑ کوئی ایہہ اَکھیسی جو ”مُردے کیویں زندہ تھی سگدے ہِن تے اُنہاں دا جِسم کیجھا ہوسی؟ “ ‏36 اے نادان! جئیں تئیں بیج مِٹی ءچ ختم نئیں تھی وَیندا، وَدھدا نئیں۔ ‏37 تے جیہڑا تُوں رَہیندا ہیں ایہہ اوہ جِسم نئیں جیہڑا پیدا تھیوݨ آلا ہے۔ اوہ فقط دانڑا ہے بھانویں کنڑک دا ہووے یا کہیں فصل دا۔ ‏38 پَر خُدا اُوں دانڑیں کُوں آپنڑی منشا دے مطابق جِسم عطا فرمیندے بلکہ ہر بیج کُوں اُوندی قِسم دے مطابق خاص جِسم ڈیندے۔

‏39 سبھ گوشت ہِکو جیہا نئیں ہوندا۔ آدمیاں دا گوشت بِیا ہے، جانوراں دا بِیا، پَکھیں دا بِیا تے مچھی دا بِیا ہے۔

‏40 اَسماناں اُتے جِسم وی ہِن تے زمین اُتے وی پَر اَسمانیاں دا جلال بِیا ہے تے زمینیاں دابِیا۔ ‏41 آفتاب دا جلال بِیا ہے، مہتاب دا بِیا، ستاریاں دا بِیا بلکہ ہر ستارے دے جلال ءچ فرق ہے۔

‏42 مُردیاں دی قیامت وی اِینویں ای ہے۔ مَوت دے وقت جِسم فنا دی حالت ءچ رَہایا وَیندے تے غیر فانی حالت ءچ زندہ تھی وَیندے۔ ‏43 اوہ شکستگی دی حالت ءچ رَہایا وَیندے تے جلال دی حالت ءچ زندہ تھی وَیندے ۔کمزوری دی حالت ءچ رَہایا وَیندے تے قوت دی حالت ءچ زندہ تھی وَیندے۔ ‏44 نفسانی جِسم دفن کیتا وَیندے تے رُوحانی جِسم زندہ تھی وَیندے۔ جے نفسانی جِسم ہے تاں رُوحانی وی ہے۔ ‏45 اِیں واسطے کلام ءچ لکھیا وی ہے جو ”پہلا آدمی یعنی آدم زندہ شخص بنڑیا۔“ آخری آدم یعنی مسیح زندگی بخشنڑ آلی رُوح بنڑیا۔ ‏46 یعنی رُوحانی پہلے نہ ہا بلکہ نفسانی جِسم ہا۔ بعد ءچ رُوحانی تھیّا۔ ‏47 پہلا آدمی زمین دی مِٹی کنُوں بنڑایا گِیا پَر ڈوجھا آدمی اَسمان کنُوں ہے۔ ‏48 خاکی اِنسان خاکی آدم دے وانگوں ہِن پَر اَسمانی اِنسان، اَسمان کنُوں آئےہوئے دے وانگوں ہِن۔ ‏49 جِیویں اَساں اُوں خاکی دی صورت اُتے پیدا تھئے، اُونویں ای اَساں اُوں اَسمانی دی صورت اُتے وی ہوسُوں۔

‏50 بِھراؤ! میڈا ایہہ مطلب ہے جو خون تے گوشت خُدا دی بادشاہی دے وارث نئیں تھی سگدے تے نہ فنا غیر فانی دی وارث تھی سگدی ہے۔

‏51 ڈیکھو میں تُہاکُوں ہِک راز دی گالھ ڈسیندا ہاں۔ اَساں سارے مَوت دی نیندر تاں نہ سَم سُوں پَر سارے بدل ویسوں۔ ‏52 تے ایہہ ہِک دم اَکھ جھمکدیاں ای تھی ویسی جِیں وَیلے نرسنگا وَجایا ویسی۔ کیوں جو نرسنگا وَجایا ویسی، تے مُردے غیر فانی جِسم دی حالت ءچ زندہ تھی ویسن تے اَساں سارے بدل ویسوں۔ ‏53 کیوں جو ضرور ہے جو ایہہ فانی جِسم حیاتی دا لباس پاوے تے ایہہ مَرݨ آلا جِسم ہمیشاں دی زندگی دا لباس پاوے۔ ‏54 تے جِیں وَیلے ایہہ فانی جِسم حیاتی دا لباس پا گِھن سی تے ایہہ مَرݨ آلا جِسم ہمیشاں دی حیاتی دا لباس پا گِھنسی تاں اوہ قول پورا تھیسی جیہڑا لکھیا ہے جو مَوت فتح دا گِراں تھی گئی۔

‏58 اِیں کیتے میڈے عزیز بِھراؤ! مضبوط تے قائم رَہو تے خُدا دی خدمت ءچ ہمیشاں جوش نال بھرے رَہو کیوں جو تُساں جانڑدے ہِیوے جو خُداوند ءچ تُہاڈی محنت بے فائدہ نئیں۔